ບໍລິສັດ ຂົນສົ່ງສາກົນຈຳກັດ ມອບເງິນຈໍານວນ 50 ລ້ານກີບ ໃຫ້ແກ່ຄະນະສະເພາະກິດແຂວງຄຳມ່ວນ ເພື່ອນຳໃຊ້ຕ້ານການແຜ່ລະບາດພະຍາດໂຄວິດ-19.

ໃນວັນທີ 27 ເມສາ 2021 ບໍລິສັດ ຂົນສົ່ງສາກົນຈຳກັດສາຂາແຂວງຄຳມ່ວນ ໄດ້ມອບເງິນຈຳນວນ 50 ລ້ານກີບ ໃຫ້ແກ່ແຂວງຄຳມ່ວນ  ເພື່ອປະກອບສ່ວນເຂົ້າໃນວຽກງານປ້ອງກັນ ແລະ ສະກັດກັ້ນພະຍາດໂຄວິດ-19. ເປັນກຽດກ່າວຮັບໂດຍ  ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ. ມອບໂດຍ  ທ່ານ ວຽງໄຊ ໄຊຍະວົງ ຕາງໜ້າບໍລິສັດຂົນສົ່ງສາກົນຈຳກັດສາຂາແຂວງຄຳມ່ວນ. ໂດຍມີທ່ານຫົວໜ້າຫ້ອງວ່າການແຂວງຄຳມ່ວນ ເຂົ້າຮ່ວມເປັນສັກຂີພິຍານ.

ໂອກາດນີ້ທ່ານເຈົ້າແຂວງຄຳມ່ວນ ກໍ່ໄດ້ກ່າວສະແດງຄວາມຂອບໃຈມາຍັງບໍລິສັດ ທີ່ໄດ້ປະກອບສ່ວນຊ່ວຍ ເຫຼືອໃນຄັ້ງນີ້ ແລະ ຈະນຳໃຊ້ງົບປະມານດັ່ງກ່າວເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ເກີດປະໂຫຍດສູງສຸດ. ພ້ອມນີ້ຍັງໄດ້ຮຽກຮ້ອງມາຍັງບໍລິສັດ ກໍ່ຄືພະນັກງານຂັບລົດຂົນສົ່ງໃນເວລາປະຕິບັດໜ້າທີ່ ໃຫ້ຮ່ວມໃຈກັນຮັກສາມາດຕະການ ແລະ ລະບຽບການ ຂອງຄະນະສະເພາະກິດຢ່າງເຂັ້ມງວດ ເພື່ອເຮັດແນວໃດໃຫ້ສາມາດຜ່ານພົ້ນວິກິດນີ້ໄປໄດ້ດ້ວຍດີ.

ຂ່າວ-ພາບ:ນັກຂ່າວວິທະຍຸແຂວງຄໍາມ່ວນ