ພິທີເປີດການນໍາໃຊ້ຫໍພັກສຳລັບຄອບຄົວຂອງບໍລິສັດ ຊີໂນ-ອາກຣີ ໂປຕາສ ໄດ້ຈັດຂຶ້ນໃນຕອນເຊົ້າຂອງວັນທີ 15 ມິຖຸນານີ້, ທີ່ບໍລິສັດ ຊີໂນ-ອາກຣີ ໂປຣຕາສ ບ້ານດົງໃຕ້, ເມືອງທ່າແຂກ, ແຂວງຄໍາມ່ວນ. ໂດຍການເປັນປະທານຂອງທ່ານ ຈູ່ ຊຽງລີ້ ຮອງຜູ້ອໍານວຍການບໍລິສັດ ຊີໂນ-ອາກຣີ ໂປຕາສ ພ້ອມດ້ວຍຄະນະ, ມີບັນດາພະນັກງານ ແລະ ຄອບຄົວພາຍໃນບໍລິສັດດັ່ງກ່າວເຂົ້າຮ່ວມ.
ກ່ອນເຂົ້າສູ່ພິທີແມ່ນໄດ້ຮັບຊົມການສະແດງສິລະປະ ບົດຟ້ອນຂອງພະນັກງານເພດຍິງ ຈາກພະແນກບໍລິຫານ-ສັງລວມຂອງບໍລິສັດ. ໃນພິທີທ່ານ ຫຼິວເຟີຍຫຼົງ ຜູ້ຊ່ວຍຜູ້ອຳນວຍການບໍລິສັດກໍໄດ້ກ່າວມີຄໍາເຫັນຕໍ່ພິທີເປີດການນໍາໃຊ້ຫໍພັກ ສໍາລັບຄອບຄົວພະນັກງານບໍລິສັດຢ່າງເປັນທາງການ ຊຶ່ງທ່ານໄດ້ກ່າວວ່າ: ຫໍພັກຄອບຄົວພະນັກງານບໍລິສັດເປັນສ່ວນໜຶ່ງທີ່ສໍາຄັນ ຂອງສິ່ງອໍານວຍຄວາມສະດວກໃນການດໍາລົງຊີວິດຂອງເມືອງອັດສະລິຍະ ອາຊີ ໂປຕາສ. ຫຼັງຈາກສໍາເລັດການກໍ່ສ້າງເຮືອນວິນລາສໍາລັບຜູ້ບໍລິຫານລະດັບກາງ, ລະດັບສູງ ແລະ ຫໍພັກພະນັກງານ. ຊຶ່ງບໍລິສັດໄດ້ປະຕິບັດຕາມ “ແຜນການສ້າງເຮືອນຂອງພະນັກງານທີ່ເປັນຮູບແບບສວນ” ທີ່ທ່ານປະທານບໍລິສັດໄດ້ຍົກຂຶ້ນເປັນອີກເປົ້າໝາຍໜຶ່ງ ກໍເພື່ອປັບປຸງຄຸນນະພາບຊີວິດຂອງພະນັກງານ “ເຄົາລົບແຖວໜ້າ, ເຊື່ອມໂຍງແຖວໜ້າ, ຮັບໃຊ້ແຖວໜ້າ” ແມ່ນແນວຄິດພັດທະນາຄວາມສາມາດຂອງບຸກຄະລາກອນ ທີ່ບໍລິສັດໄດ້ຍຶດໝັ້ນຕະຫຼອດມາພາຍໃຕ້ການຊີ້ນໍາຍຸດທະສາດ ຂອງທ່ານປະທານບໍລິສັດ, ເມືອງອັດສະລິຍະ ອາຊີໂປຕາສ ໄດ້ໃຊ້ເວລາພຽງ 2 ປີກວ່າເທົ່ານັ້ນ ໂດຍເລີ່ມຈາກແຜນການເບື້ອງຕົ້ນ ຈົນເຖິງປັດຈຸບັນໄດ້ສໍາເລັດການກໍ່ສ້າງອາຄານຕ່າງໆເຊັ່ນ: ຫໍພັກພະນັກງານຈໍານວນ 16 ຕຶກ(ລວມລາວ-ຈີນ) ເຮືອນວິນລາສໍາລັບຄະນະບໍລິຫານຈໍານວນ 40 ຫຼັງ, ນອກນັ້ນຍັງໄດ້ກໍ່ສ້າງຮ້ານອາຫານສໍາລັບພະນັກງານຫຼັງໃໝ່ອີກຈໍານວນ 1 ຕຶກ, ຕຶກການຄ້າຈໍານວນ 2 ອາຄານ ແລະ ອາຄານສໍານັກງານ “ຮູບແບບກໍາລັງອອກບິນ” ຈະສໍາເລັດ ແລະ ເປີດນໍາໃຊ້ໃນໄວໆນີ້ ຊຶ່ງໄດ້ກາຍເປັນບ້ານທີ່ອົບອຸ່ນ ແລະ ທົນທານທີ່ຊາວອາຊີ ໂປຕາສ ສາກົນໄດ້ຮ່ວມກັນກໍ່ສ້າງໃນປະເທດລາວ. ຫໍພັກຄອບຄົວພະນັກງານ 2 ຕຶກ 5 ຊັ້ນທີ່ໄດ້ເປີດນໍາໃຊ້ໃນມື້ນີ້ແມ່ນເປັນໂຄງການໃນໄລຍະທໍາອິດຂອງບໍລິສັດ ຊຶ່ງໂຄງການແມ່ນກໍ່ສ້າງຕຶກຫໍພັກຫໍຄອບຄົວພະນັກງານ ຈໍານວນ 16 ຕຶກ, ທີ່ສາມາດຮອງຮັບໄດ້ທັງໝົດ 60 ຄອບຄົວ, ໃນຈໍານວນຜູ້ເຂົ້າພັກຊຸດທໍາອິດປະກອບມີພະນັກງານຄອບຄົວຄົນຈີນ, ຄອບຄົວພະນັກງານຄົນລາວ ແລະ ກໍ່ມີທັງຄອບຄົວປະສົມປະສານທັງຄົນຈີນ ແລະ ຄົນລາວ ຊຶ່ງແຕ່ລະຫ້ອງມີເນື້ອທີ່ປະມານ 50-67 ຕາແມັດ, ຮູບແບບຕົບແຕ່ງແມ່ນພິຈາລະນາເຖິງຄວາມຕ້ອງການຂອງຊີວິດຄອບຄົວ, ນໍາໃຊ້ຮູບແບບທີ່ທັນສະໄໝ, ພ້ອມທັງມີເຄື່ອງເຟີນີເຈີ ແລະ ເຄື່ອງໃຊ້ໄຟຟ້າຄົບຖ້ວນ. ໃນໄລຍະຕໍ່ໄປບໍລິສັດຈະສືບຕໍ່ກໍ່ສ້າງຫໍພັກຄອບຄົວພະນັກງານ ແລະ ສະຖານທີ່ບໍລິການດ້ານການຄ້າຕາມແຜນການ, ດໍາເນີນການປັບປຸງສະຖານທີ່ອໍານວຍຄວາມສະດວກ, ປັບປຸງສະພາບແວດລ້ອມ, ສ້າງສະພາບແວດລ້ອມໃນການດໍາລົງຊີວິດຂອງພະນັກງານໃຫ້ດີຂຶ້ນ.
ພ້ອມນັ້ນທ່ານ ຫຼິວເຟີຍຫຼົງ ກໍໄດ້ສະແດງຄວາມຂອບໃຈເປັນພິເສດມາຍັງພະແນກການກໍ່ສ້າງ ແລະ ໜ່ວຍງານກໍ່ສ້າງທີ່ກ່ຽວຂ້ອງທີ່ໄດ້ທຸ້ມເທເຮັດວຽກທັງກາງເວັນ ແລະ ກາງຄືນຕະຫຼອດເຖິງພະແນກບໍລິຫານ-ສັງລວມທີ່ໄດ້ສຸມທຸກເຫື່ອແຮງ, ສະຕິປັນຍາ ແລະ ເອົາໃຈໃສ່ສ້າງສະພາບແວດລ້ອມການເປັນຢູ່ທີ່ອົບອຸ່ນໃຫ້ກັບທຸກຄົນ. ຫໍພັກຄອບຄົວພະນັກງານ ແຫ່ງນີ້ແມ່ນສະແດງເຖິງຄວາມເປັນຫ່ວງເປັນໃຍ ແລະ ຄວາມປາດຖະໜາຂອງບໍລິສັດຕໍ່ພະນັກງານ ແລະ ຫວັງວ່າພະນັກງານເຫຼົ່ານັ້ນຈະໄດ້ຮັບຮູ້ເຖິງຄວາມອົບອຸ່ນ, ສາມາດດໍາລົງຊີວິດ, ເຮັດວຽກໂດຍບໍ່ມີຄວາມກັງວົນ ແລະ ຕັ້ງຫຼັກປັກຖານພັດທະນາຢູ່ບໍລິສັດ.
ນອກຈາກນັ້ນແລ້ວທາງບໍລິສັດຍັງຈະໄດ້ສືບຕໍ່ຂະຫຍາຍວຽກງານ ບໍລິການສຸຂາພິບານໃຫ້ໃຫ້ແກ່ພະນັກງານຢ່າງຕໍ່ເນື່ອງ, ປັບປຸງເງື່ອນໄຂ ແລະ ສະພາບແວດລ້ອມຊີວິດການເປັນຢູ່, ຍົກລະດັບສະຫວັດດີການເພື່ອໃຫ້ທຸກຄົນສາມາດເຮັດວຽກ, ດໍາລົງຊີວິດ ແລະ ພັດທະນາຢູ່ໃນບໍລິສັດຢ່າງມີຄວາມສຸກ, ພາກພູມໃຈ ແລະ ປາສະຈາກຄວາມກັງວົນໃຈ.
ໃນພິທີຍັງໄດ້ຜ່ານກົດລະບຽບຂອງຫໍພັກຄອບຄົວພະນັກງານ ແລະ ຕົວແທນພະນັກງານອ່ານໜັງສືສັນຍາການເຂົ້າຢູ່. ຫຼັງຈາກນັ້ນຄະນະອໍານວຍການບໍລິສັດກໍໄດ້ມີການມອບເຄື່ອງໃຊ້ ທີ່ມີຄວາມຈໍາເປັນໃນການຢູ່ອາໄສ ແລະ ຖົງຂອງຂວັນໃຫ້ແກ່ຄອບຄົວພະນັກງານ. ໂດຍຕາງໜ້າຄອບຄົວພະນັກງານກໍໄດ້ກ່າວສະແດງຄວາມຮູ້ບຸນຄຸນ ແລະ ຂອບໃຈມາຍັງບໍລິສັດທີ່ມີນະໂຍບາຍທີ່ເໝະສົມໃຫ້ແກ່ພະນັກງານ.
ໃນໂອກາດດັ່ງກ່າວທາງຄະນະອໍານວຍການບໍລິສັດ ກໍໄດ້ຍ່າງເລາະເບິ່ງສະພາບຫ້ອງຕະຫຼອດ ເຖິງສິ່ງອໍານວຍຄວາມສະດວກຕ່າງໆ ພາຍໃນຫ້ອງຂອງສອງອາຄານດັ່ງກ່າວຕື່ມອີກ.
(ຂ່າວ-ພາບ: ແດງສະຫວັດ ແສນພານິດ)
