ບໍລິສັດ ດາ ຊິກເນເຈີ ມອບນ້ຳດື່ມໃຫ້ຊຸດຝຶກອົບຮົມທິດສະດີການເມືອງສະເພາະດ້ານ ຂະແໜງການສື່ມວນຊົນ

ທ່ານ ນາງ ດາລຸນນີ ສຸທຳມະວົງ ຜູ້ອຳນວຍການ ບໍລິສັດ ດາ ຊິກເນເຈີ ຕົບແຕ່ງພາຍໃນ ໄດ້ນຳເອົານ້ຳດື່ມ ຈຳນວນ 50 ແພັກ ມາມອບໃຫ້ບັນດາສຳມະນາກອນ ໃນຊຸດຝຶກອົບຮົມທິດສະດີການເມືອງສະເພາະດ້ານ ຂະແໜງການສື່ມວນຊົນ ຈັດຂຶ້ນໂດຍ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນວັນທີ 18 ທັນວາ 2023 ທີ່ສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ຊຶ່ງຕາງໜ້າໃຫ້ສຳມະນາກອນຮັບໂດຍ ທ່ານ ອາຈານ ປທ ແສງຈັນ ຈັນທະສຸກ ຮອງຫົວໜ້າຄະນະກໍ່ສ້າງພັກ ແລະ ປະຫວັດສາດພັກ ສະຖາບັນການເມືອງ ແລະ ການປົກຄອງແຫ່ງຊາດ ຫຼື ສມປຊ.

ໂອກາດນີ້, ທ່ານ ນາງ ດາລຸນນີ ສຸທຳມະວົງ ກ່າວວ່າ: ຮູ້ສຶກດີໃຈຫຼາຍທີ່ໄດ້ເປັນສ່ວນໜຶ່ງໃນການອຸປະຖຳນ້ຳດື່ມໃນຄັ້ງນີ້ ຊຶ່ງເປັນການປະກອບສ່ວນສຳຄັນໃຫ້ສຳມະນາກອນ ມີນ້ຳດື່ມໃນໄລຍະການຝຶກອົບຮົມ ພ້ອມທັງອວຍພອນໃຫ້ຊຸດຝຶກອົບຮົມຄັ້ງນີ້ ປະສົບຜົນສຳເລັດຕາມແຜນການທີ່ວາງໄວ້.

ຈາກນັ້ນ, ທ່ານ ອາຈານ ປທ ແສງຈັນ ຈັນທະສຸກ ກໍໄດ້ຕາງໜ້າໃຫ້ສຳມະນາກອນ ມອບໃບຂອບໃຈ ເພື່ອເປັນການສະແດງຄວາມຊົມເຊີຍຕໍ່ບໍລິສັດ ທີ່ໃຫ້ການສະໜັບສະໜູນ ແລະ ອວຍພອນໃຫ້ທ່ານ ນາງ ດາລຸນນີ ສຸທຳມະວົງ ຈົ່ງມີສຸຂະພາບແຂງແຮງ, ປະສົບຄວາມສຳເລັດໃນການດຳເນີນທຸລະກິດໃຫ້ຈະເລີນຍິ່ງຂຶ້ນ.