ເນື່ອງຈາກ ແຂວງຫຼວງນໍ້າທາໄດ້ຮັບຜົນກະທົບຈາກໄພນໍ້າຖ້ວມຄັ້ງໃຫຍ່ໃນໄລຍະທີ່ຜ່ານມາ ດັ່ງນັ້ນ ເພື່ອເປັນການຟື້ນຟູສະພາບການເປັນຢູ່ຂອງປະຊາຊົນ ໃນພື້ນທີ່ໄພພິບັດໃຫ້ກັບຄືນສູ່ສະພາບປົກກະຕິ ແລະ ປ້ອງກັນການລະບາດຂອງພະຍາດໄຂ້ເລືອດອອກຫຼັງໄພພິບັດ, ໃນວັນທີ 26 ກັນຍາ 2024 ບໍລິສັດ ທາງລົດໄພລາວ-ຈີນ ຈໍາກັດ ໄດ້ສົມທົບກັບມູນນິທິ GX ຂອງຮົງກົງ ສປ ຈີນ ລົງພື້ນທີ່ປະສົບໄພນ້ຳຖ້ວມຢູ່ເມືອງຫຼວງນ້ຳທາ ແຂວງຫຼວງນ້ຳທາ ໂດຍທາງລົດໄຟລາວຈີນ ແລະ ຜູ້ຊ່ຽວ ຊານຈາກມູນນິທິ GX ໄດ້ລົງສຳຫຼວດພົບປະກັບປະຊາຊົນ ແລະ ນາຍບ້ານຢູ່ເຂດບ້ານວຽງໃຕ້ ແລະ ບ້ານທ່າອໍ້ ເພື່ອເກັບກຳຂໍ້ມູນຄວາມເສຍຫາຍຈາກໄພນ້ຳຖ້ວມ ແລະ ເຜີຍແຜ່ຄວາມຮູ້ກ່ຽວກັບການປ້ອງກັນການລະບາດຂອງພະຍາດໄຂ້ເລືອດອອກ ພ້ອມມອບຊຸດກວດໄຂ້ເລືອດອອກ, ຢາປິ່ນປົວພະຍາດໄຂ້ເລືອດອອກ ແລະ ໂຄມໄຟຈັບຍຸງ ໃຫ້ແກ່ປະຊາຊົນໃນເຂດບ້ານດັ່ງກ່າວ.
ຫຼັງຈາກນັ້ນ ທາງບໍລິສັດ ທາງລົດໄຟລາວ-ຈີນ ແລະ ມູນນິທິ GX ຍັງໄດ້ເຂົ້າໄປຢ້ຽມຢາມຫ້ອງການສາທາລະນະສຸກເມືອງ ແລະ ສາທະລະນະສຸກແຂວງ ເພື່ອແບ່ງປັນປະສົບການກ່ຽວກັບການປ້ອງກັນ ແລະ ການຕ້ານການລະບາດຂອງພະຍາດໄຂ້ເລືອດອອກຫຼັງໄພພິບັດ ເຊິ່ງທາງສາທາລະນະສຸກໄດ້ໃຫ້ຮູ້ວ່າ ໃນປີນີ້ທົ່ວແຂວງຫຼວງນ້ຳທາ ມີຜູ້ຕິດເຊື້ອພະຍາດໄຂ້ເລືອດທັງໝົດ 850 ກວ່າຄົນ ແລະ ຄາດວ່າຫຼັງຈາກໄພພິບັດນໍ້າຖ້ວມຈະມີຈໍານວນຜູ້ຕິດເຊື້ອເພີ່ມຂຶ້ນອີກ ໂດຍກ່ອນໜ້ານີ້ທາງລົດໄຟລາວຈີນ ແລະ ມູນນິທິ GX ກໍໄດ້ຮ່ວມມືກັນໂຄສະນາເຜື່ອແຜ່ຄວາມຮູ້ກ່ຽວກັບການປ້ອງກັນການລະບາດຂອງພະຍາດໄຂ້ເລືອດອອກຢູ່ຕາມແລວທາງລົດໄຟລາວ-ຈີນ ແລະ ຍັງໄດ້ມີການຕິດຕັ້ງໂຄມໄຟຈັບຍຸງຢູ່ຕາມສະຖານີລົດໄຟລາວ-ຈີນ ເພື່ອເປັນການເພີ່ມທະວີຍົກລະດັບຄວາມຮູ້ກ່ຽວກັບການປ້ອງກັນພະຍາດໄຂ້ເລືອດອອກໃຫ້ປະຊາຊົນຕາມແລວທາງລົດໄຟລາວ-ຈີນ.
ນອກຈາກນີ້ ມູນນິທິ GX ຍັງໄດ້ແລກປ່ຽນໃຫ້ຂໍ້ມູນກັບເຈົ້າຫນ້າທີ່ສາທາລະນະສຸກເມືອງ ແລະ ສາທາລະນະສຸກແຂວງ ກ່ຽວ ກັບໂຄງການຊ່ວຍເຫຼືອຜ່າຕັດພະຍາດແກ່ນຕາຂຸ້ນໂດຍບໍ່ເສຍຄ່າ ໂດຍຜ່ານມາທາງມູນນິທິ GX ໄດ້ສຳເລັດການຜ່າຕັດໂດຍບໍ່ເສຍຄ່າ ໃຫ້ຄົນເຈັບທີ່ເປັນພະຍາດແກ່ນຕາຂຸ້ນຢູ່ນະຄອນຫຼວງວຽງ ຈັນ,ຫຼວງພະບາງ ແລະ ຈຳປາສັກແລ້ວຈຳນວນກວ່າ 4500 ກໍລະນີ ແລະ ກຳລັງມີແຜນຈະຮ່ວມມືກັບຫນ່ວຍງານສາທາ ລະນະສຸກ ເພື່ອຊ່ວຍເຫຼືອຜ່າຕັດພະຍາດແກ່ນຕາຂຸ້ນໃຫ້ແກ່ປະຊາຊົນຢູ່ທາງແຂວງພາກເໜືອດ້ວຍ.
