ບໍລິສັດ ທາງລົດໄຟລາວ-ຈີນ ຈັດການຝຶກຊ້ອມແຜນການຮັບມືກັບເຫດການສຸກເສີນ
ປີນີ້ເປັນປີທ່ອງທ່ຽວລາວ ພ້ອມທັງເປັນເຈົ້າພາບ ແລະ ເປັນປະທານອາຊຽນ, ເຊິ່ງມີຄະນະຜູ້ແທນທາງການ,ນັກການທູດ,ນັກທຸລະກິດຈາກຫຼາຍປະເທດທີ່ກ່ຽວ ຂ້ອງເຂົ້າມາຢ້ຽມຢາມ ແລະ ເຂົ້າຮ່ວມກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບ ທີ່ນະຄອນຫຼວງວຽງຈັນ ແລະ ນັກທ່ອງທ່ຽວເປັນທີ່ມາຈາກຫລາຍປະເທດເປັນຈໍານວນຫລາຍ,ສ່ວນຫຼາຍແມ່ນຈະເລືອກໃຊ້ບໍລິການເດີນທາງດ້ວຍລົດໄຟລາວ-ຈີນ.
ເພື່ອເປັນການຮັບມືກັບເຫດການສຸກເສີນທີ່ອາດຈະເກີດຂື້ນຢ່າງບໍ່ຄາດຄິດໃນສະຖານີຫຼືສະຖານທີ່ທີ່ມີຝູງຊົນຈຳນວນຫຼາຍໃຫ້ມີປະສິດທິຜົນ,ວ່ອງໄວ ແລະ ຮັບການຊ່ວຍເຫຼືອໄດ້ທັນເວລາ. ໃນຕອນເຊົ້າວັນທີ 19 ມິຖຸນາ 2024 , ບໍລິສັດທາງລົດໄຟລາວ-ຈີນ ຈຳກັດ ໄດ້ຈັດການຝຶກຊ້ອມແຜນການຮັບມືເຫດການສຸກເສີນພາຍໃຕ້ການຊີ້ນຳຂອງສະຖານທູດທູດທະຫານ ສປຈີນປະຈຳ ສປປ ລາວ ແລະ ກົມຕຳຫຼວດທາງລົດໄຟ ກະຊວງປ້ອງກັນຄວາມສະຫງົບ ຢູ່ທີ່ສະຖານີລົດໄຟນະຄອນຫຼວງວຽງຈັນໄດ້ສຳເລັດຢ່າງຈົບງາມ; ເຊິ່ງເຂົ້າຮ່ວມຊີ້ນໍາການຝຶກຊ້ອມດັ່ງກ່າວ ປະກອບມີ: ທ່ານ ຫຼີ ປິງ ທີ່ປຶກສາທູດຝ່າຍທະຫານ ສປ ຈີນ ປະຈຳ ສປປ ລາວ, ທ່ານ ພັອ ກົງສີ ສຸວັນນະຕຸ້ມ ຫົວໜ້າກົມຕຳຫຼວດທາງລົດໄຟ ກະຊວງປ້ອງກັນຄວາມສະຫງົບ ແລະ ທ່ານ ຫຼິວ ຫົງ ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ ຈໍາກັດ.
ໃນວາລະການຝຶກຊ້ອມດັ່ງກ່າວນີ້ ທ່ານ ຫຼິວ ຫົງ ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ ຈໍາກັດ ໄດ້ມີຄໍາເຫັນວ່າ: ຂໍໃຫ້ບຸກຄະລາກອນທຸກຄົນອີງໃສ່ສະພາບ ການໂດຍລວມຕາມແຜນແມ່ບົດວ່າດ້ວຍການສ້າງຄູ່ຮ່ວມສະຕາກຳລາວ-ຈີນ ແລະ ການກະກຽມຄວາມພ້ອມຮັບໃຊ້ວຽກງານທີ່ສຳຄັນໃນການເປັນເຈົ້າພາບ ແລະ ປະທານອາຊຽນທີ່ໝູນວຽນມາຮອດຂອງລາວ. ຜ່ານການຈັດຝຶກຊ້ອມຮັບມືສຸກເສີນຄັ້ງນີ້ໄດ້ສະແດງໃຫ້ເຫັນເຖິງການສ້າງສະພາບແວດລ້ອມທີ່ປອດໄພຂອງທາງລົດໄຟລາວ-ຈີນໃຫ້ແກ່ຜູ້ໂດຍສານທຸກທ່ານທີ່ມາໃຊ້ບໍລິການ. ການຈຳລອງເຫດການສຸກ ເສີນ ແລະ ວິທີການຮັບມືຂຶ້ນຢູ່ທາງເຂົ້າສະຖານີລົດໄຟ ດັ່ງກ່າວ ໄດ້ຖືກຈັດຂື້ນເລີ່ມແຕ່ເວລາ 09:50 ໂມງ ຂອງວັນທີ 19 ມິຖຸນາ 2024 ໂດຍໄດ້ຈໍາລອງເຫດການ ຄື:
1) ການຝຶກຊ້ອມຫົວຂໍ້ທີ 1 ແມ່ນ: ໃນຂະນະທີ່ຜູ້ໂດຍສານກໍາລັງພາກັນລຽນຄິວເຂົ້າສະຖານີເປັນຈຳນວນຫຼາຍ ແລະ ພະນັກງານທີ່ກວດປີ້ເຂົ້າສະຖານີໄດ້ກວດກາປີ້ຂອງຜູ້ໂດຍສານທີ່ເຂົ້າມາໃນສະຖານີຢ່າງເປັນລະບຽບ; ເວລານັ້ນ ໄດ້ກວດພົບເຫັນມີຜູ້ເຂົ້າສະຖານີສອງຄົນທີ່ເອກະສານປະຈຳໂຕບໍ່ສອດຄ່ອງກັບຂໍ້ມູນໃນປີ້ລົດໄຟ ແລະ ໄດ້ແຈ້ງໃຫ້ພວກກ່ຽວບໍ່ສາມາດອະນຸຍາດໃຫ້ເຂົ້າໄປໃນສະຖານີໄດ້. ຫຼັງຈາກນັ້ນ ຈິ່ງເກີດມີການຂັດແຍ່ງ ແລະ ໂຕ້ຖຽງກັນເກີດຂຶ້ນ; ທັນທີທັນໃດຜູ້ຊາຍສອງຄົນໄດ້ເອົາປືນອອກມາ ແລະ ຂົ່ມຂູ່ໃສ່ຜູ້ໂດຍສານຈຳນວນຫຼາຍ ເຮັດໃຫ້ເກີດເຫດການ “ກໍ່ການຮ້າຍ (ຍິງປືນແກັບ)” ຂຶ້ນ,ຜູ້ໂດຍສານພາກັນແລ່ນແຕກຕື່ນດ້ວຍຄວາມຕົກໃຈ ແລະ ກໍ່ໃຫ້ເກີດມີຜູ້ບາດເຈັບ.
ພາຍຫຼັງທີ່ໄດ້ເກີດ “ເຫດການກໍ່ການຮ້າຍ” ຈໍາລອງນີ້ຂຶ້ນ,ພະນັກງານກວດປີ້ລວມເຖິງພະນັກງານຮັກສາຄວາມປອດໄພ ໄດ້ຈັດຕັ້ງຝຶກຊ້ອມດໍາເນີນຕາມຂັ້ນຕອນຄວາມປອດໄພ ໂດຍໄດ້ໃຊ້ກົນໄກການສື່ສານລາຍງານຕໍ່ຫົວຫນ້າສະຖານີ ແລະ ພາກ ສ່ວນທີ່ກ່ຽວຂ້ອງຕາມລຳດັບ; ພ້ອມໆກັບການຝຶກຊ້ອມທັງເຄື່ອນຍ້າຍຜູ້ໂດຍອອກຈາກບ່ອນເກີດເຫດຢ່າງຮີບດ່ວນ ແລະ ປອດໄພ; ເຈົ້າໜ້າທີ່ປະຈຳສະຖານີ ແລະ ພະ ນັກງານຮັກສາຄວາມປອດໄພ ກໍໄດ້ໂທຫາຕຳຫຼວດ ເພື່ອລາຍງານຕໍ່ພາກສ່ວນທີ່ສຳຄັນໃນສະຖານີ ໂດຍສະເພາະຫ້ອງຄວບຄຸມການເດີນລົດ, ຕິດຕໍ່ຫາໂຮງຫມໍ103 ຮຽກຂໍລົດກູ້ໄພສຸກເສີນມາທີ່ສະຖານີໂດຍດ່ວນ ເພື່ອຊ່ວຍເຫຼືອຜູ້ທີ່ຮັບບາດເຈັບ; ຕຳຫລວດທາງລົດໄຟກໍຮີບຮ້ອນແບ່ງກຳລັງຄົນເຂົ້າໄປໃນຫ້ອງລໍຖ້າຂຶ້ນລົດ ເພື່ອຮັກສາຄວາມປອດໄພໃຫ້ຜູ້ໂດຍສານ. ພາຍຫຼັງທີ່ເຈົ້າໜ້າທີ່ຕຳຫຼວດຈຳນວນຫຼາຍໄປຮອດສະຖານທີ່ເກີດເຫດ “ຜູ້ກໍ່ການຮ້າຍ” ສອງຄົນເຫັນວ່າສະຖານະການບໍ່ດີຈິ່ງໄດ້ຈັບເອົາຜູ້ຍິງສອງຄົນມາເປັນຕົວປະກັນເພື່ອຕໍ່ລອງກັບເຈົ້າຫນ້າທີ່ຕຳຫຼວດ.
ພະນັກງານລົດໄຟປະຈຳສະຖານີກໍໄດ້ເຄື່ອນຍ້າຍຜູ້ໂດຍສານໄປບ່ອນທີ່ປອດໄພຢ່າງຮີບດ່ວນ,ໂດຍດຳເນີນການຢ່າງຖືກວິທີອອກຈາກສະຖານີດ້ວຍປະຕູໜີໄພດ້ານຫຼັງທັງສອງຂ້າງຂອງສະຖານີໄດ້ຢ່າງປອດໄພ ແລະ ໄດ້ໃຊ້ຄວາມຮູ້ທີ່ໄດ້ຜ່ານການຝຶກຊ້ອມມາຊ່ວຍປະຖົມພະຍາບານເບື້ອງຕົ້ນໃຫ້ແກ່ຜູ້ໂດຍສານທີຮັບບາດເຈັບ ແລະ ທາງສະຖານີກໍໄດ້ເປີດນໍາໃຊ້ສຽງແຈ້ງເຕືອນອັນຕະລາຍ ເພື່ອໃຫ້ຜູ້ໂດຍສານທ່ານອື່ນທີ່ຢູ່ນອກສະຖານີຮັບຮູ້ ແລະ ຫຼີກໜີຢ່າງທັນເວລາ.
ບໍລິສັດທາງລົດໄຟລາວ-ຈີນ ຈຳກັດ ໄດ້ນໍາໃຊ້ມາດຕະການທີ່ຮັດກຸມ,ຈັດຕັ້ງທີມຮັບມືສຸກເສີນຕໍ່ເຫດການທີ່ບໍ່ຄາດຄິດ, ເພີ່ມທະວີການປະສານງານທີ່ມີປະສິດທິພາບ ແລະ ວ່ວງໄວເຊັ່ນ: ແຈ້ງຢຸດຈອດລົດໄຟທີ່ຈະເຂົ້າ-ອອກສະຖານີຊົ່ວຄາວ, ຮັບປະກັນຄວາມປອດໄພໃນທຸກພາກສ່ວນທີ່ສຳຄັນ, ການສະກັດກັ້ນອັກຄີໄພ ແລະ ປ້ອງກັນການລັກລອບໃນສະຖານີ, ການປະສານງານກັບຕໍາຫຼວດທາງລົດໄຟ ແລະ ບໍລິສັດຮັກສາຄວາມປອດໄພ,ການກະກຽມອຸປະກອນປ້ອງກັນຢາງຄົບຊຸດ, ເພີ່ມມາດຕະການກວດກາລາດຕະເວນ,ເກັບກໍາຂໍ້ມູນທີ່ລະອຽດເພື່ອລາຍງານຕໍ່ພາກສ່ວນທີ່ກ່ຽວຂ້ອງ, ທາງພາກສ່ວນຕໍາຫຼວດກໍໄດ້ຈັດຕັ້ງທີມສະກັດກັ້ນຜູ້ກໍ່ການຮ້າຍ, ເພື່ອໃຫ້ການປະຕິບັດຫນ້າທີ່ມີປະສິດທິພາບຂຶ້ນໄດ້ຈັດທີມທີ່ມີທັກສະໃນການຊ່ວຍເຫຼືອຕົວປະກັນ, ການຕໍ້ສູ້ ແລະ ວິທີການເຈລະຈາກັບຜູ້ກໍ່ການຮ້າຍຈົນສຳເລັດການຊ່ວຍເຫຼືອ, ຫຼັງຈາກທີ່ຊ່ວຍເຫຼືອຕົວປະກັນສຳເລັດແລ້ວກໍນຳສົ່ງໄປໂຮງໝໍ 103 ເພື່ອດໍາເນີນການປິ່ນປົວຢ່າງຮີບດ່ວນ.
2) ການຝຶກຊ້ອມຫົວຂໍ້ທີ 2 ແມ່ນ: ການຈຳລອງເຫດການ ເກັບກູ້ລະເບີດທີ່ສົງໄສຢູ່ໃນສະຖານີຫ້ອງລໍຖ້າຂື້ນລົດ. ເວລາ 10:30 ໂມງ ເຈົ້າໜ້າທີ່ຮັກສາຄວາມປອດໄພໄດ້ໃຊ້ອຸປະກອນກວດພົບເຫັນກະເປົາທີ່ສົງໃສວ່າມີລະເບີດຢູ່ທາງໃນ, ເຈົ້າໜ້າທີ່ຮັກສາຄວາມປອດໄພຈິ່ງໄດ້ຄວບຄຸມຕົວຜູ້ໂດຍສານທັນທີ ແລະ ໃຊ້ອຸປະກອນກັນລະເບີດປົກໄວ້ ເພື່ອລໍຖ້າຫນ່ວຍງານທີ່ກ່ຽວຂ້ອງມາເກັບກູ້ລະເບີດຢ່າງຖືກຕ້ອງ. ຫຼັງຈາກນັ້ນ ໄດ້ໃຊ້ມາດຕະການຮັບມືຕາມຂັ້ນຕອນຕ່າງໆ ເຊັ່ນ: ການແຈ້ງຢຸດເດີນຂະບວນລົດໄຟ,ແຈ້ງປະກາດ,ການເຄື່ອນຍ້າຍຜູ້ໂດຍສານ,ການປິດລ້ອມສະຖານທີ່ ,ການກຽມອຸປະກອນດັບເພີງ ແລະ ການຊ່ວຍເຫຼືອທາງການແພດ,ໜ່ວຍງານເຈົ້າໜ້າທີ່ຕໍາຫຼວດໄດ້ສົ່ງສະມາຊິກຕໍາຫຼວດພິເສດ ແລະ ຜູ້ຊ່ຽວຊານດ້ານການເກັບກູ້ລະເບີດເຂົ້າໄປກວດສອບແລະເກັບກູ້ໄດ້ຢ່າງສຳເລັດ.
ຜ່ານການຝຶກຊ້ອມຮັບມືເຫດການສຸກເສີນຄັ້ງນີ້ນີ້ໄດ້ສ້າງປະສົບການໃຫ້ແກ່ພະ ນັກງານບໍລິສັດລົດໄຟລາວ-ຈີນ ຈໍາກັດ,ພະນັກງານປະຈຳສະຖານີລົດໄຟ, ບໍລິສັດຮັກສາຄວາມປອດໄພ,ໂຮງຫມໍ ແລະ ຫນ່ວຍງານຕໍາຫຼວດໃນການຮ່ວມມືປະສານງານກັນ,ການສົ່ງຂໍ້ມູນທີ່ຖືກຕ້ອງ,ວິທີຮັບມືໃນເວລາເກີດເຫດການກໍ່ການຮ້າຍຢ່າງກະທັນຫັນ,ຍົກລະດັບຄວາມສາມາດຂອງບັນດາຜູ້ຝຶກຊ້ອມທຸກຄົນໃນການປົກປ້ອງຊີວິດແລະຊັບສິນຂອງຕົນເອງ ແລະ ຜູ້ໂດຍສານທຸກຄົນຢ່າງມີປະສິດທິພາບ.
ທີ່ມາ: ບໍລິສັດ ທາງລົດໄຟ ລາວ-ຈີນ
