ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍລິສັດ ພັນທະມິດກໍ່ສ້າງຂົວທາງຈຳກັດ ມອບເຄື່ອງຊ່ວຍເຫລືອມູນຄ່າ 50 ລ້ານກີບ ໃຫ້ຄະນະສະເພາະກິດ ແຂວງຫຼວງພະບາງ:

ໃນວັນທີ່ 20 ເມສາ 2020 ທີ່ພະແນກສາທາລະນະສຸກແຂວງຫຼວງພະບາງ, ບໍລິສັດ ພັນທະມິດກໍ່ສ້າງຂົວທາງຈຳກັດ ໄດ້ນຳເອົາເຄື່ອງຊ່ວຍເຫລືອປະເພດຜ້າອັດປາກ-ດັງ, ເຈວລ້າງມື ແລະ ເຄື່ອງປ້ອງກັນ PPE ລວມມູນຄ່າ 50 ລ້ານກີບ ມາມອບໃຫ້ແກ່ຄະນະສະເພາະກິດເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ແຂວງຫຼວງພະບາງ ເພື່ອເປັນການປະກອບສ່ວນເຂົ້າໃນວຽກງານປ້ອງກັນ, ຄວບຄຸມ, ຕ້ານ ແລະ ສະກັດກັ້ນ ພະຍາດໂຄວິດ-19 ຢູ່ແຂວງ ຫຼວງພະບາງ.

ຕາງໜ້າມອບເຄື່ອງຊ່ວຍເຫລືອດັ່ງກ່າວໃນຄັ້ງນີ້, ແມ່ນທ່ານ ສີທົນ ກຽງຄຳ, ປະທານບໍລິສັດພັນທະມິດກໍ່ສ້າງຂົວທາງ ຈຳກັດ ແລະ ຕາງໜ້າຮັບ ແມ່ນ ທ່ານ ວົງສະຫວັນ ເທບພະຈັນ, ຮອງເຈົ້າແຂວງໆຫຼວງພະບາງ, ຫົວໜ້າຄະນະສະເພາະກິດເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ແຂວງຫຼວງພະບາງ. ໃນໂອກາດນີ້, ທ່ານຮອງເຈົ້າແຂວງໆຫຼວງພະບາງ ໄດ້ກ່າວຂອບໃຈຕໍ່ບໍລິສັດພັນທະມິດກໍ່ສ້າງຂົວທາງ ຈຳກັດ ທີ່ໄດ້ໃຫ້ການປະກອບສ່ວນຊ່ວຍເຫຼືອອຸປະກອນສຳຄັນໃຫ້ແກ່ໂຮງໝໍແຂວງ, ໂດຍທາງຄະນະສະເພາະກິດ ຈະນຳເອົາເຄື່ອງດັ່ງກ່າວນັ້ນ ໄປໝູນໃຊ້ເຂົ້າໃນວຽກງານຕົວຈິງໃຫ້ເກີດປະໂຫຍດສູງສຸດ. ຂ່າວໃຫ້ຮູ້ຕື່ມວ່າ: ໃນວັນທີ່ 18 ເມສາ 2020 ຜ່ານມາ, ຄອບຄົວຂອງທ່ານ ຄໍາຜາຍ ບົວຜາ, ເຈົ້າຂອງທຸລະກິດໂຮງສີເຂົ້າ ບ້ານເມືອງງາ, ນະຄອນຫລວງພະບາງ ກໍ່ໄດ້ລົງແຈກຢາຍເຂົ້າສານໜຽວ ປະມານ 500 ກິໂລ ໃຫ້ແກ່ປະຊາຊົນ ສອງບ້ານຄື ບ້ານນູນສະຫວາດ ແລະ ບ້ານເມືອງງາ ເພື່ອເປັນການຊ່ວຍບັນເທົາທຸກໃຫ້ປະຊາຊົນ ໃນຊ່ວງເກີດວິກິດການແຜ່ລະບາດຂອງພະຍາດໂຄວິດ 19 ໃນປະຈຸບັນນີ້.

ຂ່າວ: ວໍລະນຸດ ສີລິກຸນ