ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍລິສັດ ຟໍເຕ ໂຕໂກ ປະກັນໄພ ຮ່ວມອະນຸລັກ ແລະ ສົ່ງເສີມສຽງແຄນລາວໃຫ້ຄົງຢູ່ຄູ່ກັບສັງຄົມລາວຕະຫລອດໄປ

ບໍລິສັດ ຟໍເຕ ໂຕໂກ ປະກັນໄພ ມອບເງິນສະໜັບສະໜັບສະໜູນໂຄງການແຂ່ງຂັນສຽງແຄນລາວໃນລາຍການໂທລະພາບຂອງນັກຮຽນປະຖົມ-ມັດທະຍົມ 9 ຕົວເມືອງໃນນະຄອນຫລວງວຽງຈັນ ຈໍານວນ 50 ລ້ານກີບ. ໂຄງການນີ້ມີຈຸດປະສົງເພື່ອຊຸກຍູ້ ແລະ ປຸກລະດົມຂະບວນການສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ປະຊາຊົນ ປະຕິວັດລາວ, ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 65 ປີ, ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 100 ປີ, ວັນສະຖາປະນາ ສປປ ລາວ ຄົບຮອບ 45 ປີ ແລະ ວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ຄົບຮອບ 65 ປີ, ພ້ອມນີ້ ຍັງເປັນການສືບຕໍ່ເສີມຂະຫຍາຍຜົນສໍາເລັດທີ່ສຽງແຄນລາວໄດ້ຖືກຮັບຮອງຈາກອົງການອຸຍເນັສໂກໃຫ້ເຂົ້າເປັນມໍລະດົກໂລກດ້ານນາມມະທໍາ ແລະ ເປັນການປຸກລະດົມກໍາລັງໃຈຂອງຂະບວນການສີລະປະວັດທະນະທໍາແຄນລາວ ເພື່ອພ້ອມກັນອະນຸລັກ ແລະ ສົ່ງເສີມໃຫ້ເຍົາວະຊົນ, ຊາວໜຸ່ມ ກໍ່ຄື ຄົນຮຸ່ນໃໝ່ໄດ້ສືບສານມໍລະດົກແຄນລາວ, ປົກປັກຮກສາ ແລະ ເສີມຂະຫຍາຍສຽງແຄນເຊື້ອຊາດລາວມໍລະດົກໂລກໃຫ້ຍືນຍົງຄົງຢູ່ຄູ່ກັບສັງຄົມລາວ ແລະ ຊາດລາວຕະຫລອດໄປ, ນອກຈາກນີ້ ຍັງເປັນການປູກຈິດສໍານຶກ ແລະ ສົ່ງເສີມໃຫ້ເຍົາວະຊົນ ແລະ ຊາວໜຸ່ມ 9 ຕົວເມືອງພາຍໃນນະຄອນຫລວງວຽງຈັນ ກ້າສະແດງອອກຄວາມສາມາດຂອງຕົວເອງ.

ໂຄງການດັ່ງກ່າວ ແມ່ນໂທລະພາບແຫ່ງຊາດເປັນເຈົ້າຂອງໂຄງການ ໂດຍຈະເລີ່ມຕົ້ນຈັດຕັ້ງປະຕິບັດໃນວັນທີ 2 ມີນາ 2020 ເປັນຕົ້ນໄປ ເລີ່ມຈາກການແຂ່ງຂັນຮອບຄັດເລືອກ ຄັ້ງທີ 1 ຢູ່ທັງ 9 ຕົວເມືອງ, ຄັດເລືອກເອົາເມືອງລະ 10 ນ້ອງ ຫລື ຕາມເງື່ອນໄຂຕົວຈິງຂອງແຕ່ລະເມືອງ, ວັນທີ 1 ເມສາ 2020 ແຂ່ງຂັນຮອບຄັດເລືອກ ຄັ້ງທີ 2 ຈັດຢູ່ເມືອງໃດໜຶ່ງ ໂດຍຄັດເລືອກເອົາ 50 ນ້ອງ, ວັນທີ 1 ພຶດສະພາ 2020 ແຂ່ງຂັນຮອບຄັດເລືອກ ຄັ້ງທີ 3 ຈັດຢູ່ສະຕູດີໂອໂທລະພາບແຫ່ງຊາດ ຄັດເລືອກເອົາ 25 ນ້ອງ ແລະ ວັນທີ 1 ກໍລະກົດ 2020 ແຂ່ງຂັນຮອບຊີງຊະນະເລີດ ຈັດຢູ່ສະຕູດີໂອໂທລະພາບແຫ່ງຊາດ ໂດຍຄັດເລືອກເອົາ 10 ນ້ອງໃນຄັ້ງທີ 1 ຈາກນັ້ນຄັດເລືອກເອົາທີ 1,2,3 ແລະ ລາງວັນຊົມເຊີຍ ໂດຍຈະມີການບັນທຶກພາບ ແລະ ສຽງ ເພື່ອຜະລິດເປັນລາຍການກະຈາຍອອກອາກາດທາງໂທລະພາບແຫ່ງຊາດ. ສໍາລັບການແຂ່ງຂັນຄັ້ງນີ້ ມີທັງໝົດ 2 ຮຸ່ນ ຄື: ຮຸ່ນອາຍຸ 10-14 ປີ ຊາຍ-ຍິງ ແລະ ຮຸ່ນອາຍຸ 15-18 ປີ ຊາຍ-ຍິງ. ສ່ວນລາງວັນການແຂ່ງຂັນແມ່ນໄດ້ຮັບເທົ່າກັນໝົດໃນແຕ່ລະລາງວັນ ຄື: ຊະນະເລີດຈະໄດ້ຮັບ ຈໍານວນ 5 ລ້ານກີບ, ຮອງຊະນະເລີດອັນດັບທີ 1 ຈໍານວນ 3 ລ້ານກີບ, ຮອງຊະນະເລີດອັນດັບທີ 2 ຈໍານວນ 2 ລ້ານກີບ ແລະ ລາງວັນຊົມເຊີຍ ຈໍານວນ 5 ແສນກີບ.

ພິທີມອບ-ຮັບເງິນຊ່ວຍເຫລືອຢ່າງເປັນທາງການຈັດຂຶ້ນຢູ່ໂທລະພາບແຫ່ງຊາດ, ນະຄອນຫລວງວຽງຈັນ ໃນຕອນບ່າບວັນທີ 17 ມັງກອນ 2020 ໂດຍການມອບຂອງ ທ່ານ Charle Cheo ປະທານບໍລິສັດ ຟໍເຕ ໂຕໂກ ປະກັນໄພ ແລະ ຮັບໂດຍ ທ່ານ ບຸນເຈົ້າ ພິຈິດ ຜູ້ອໍານວຍການໃຫຍ່ໂທລະພາບແຫ່ງຊາດ ໂດຍການໃຫ້ກຽດເຂົ້າຮ່ວມຂອງ ທ່ານ ບົວເງິນ ຊາພູວົງ, ລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ພ້ອມດ້ວຍພະນັກງານທີ່ກ່ຽວຂ້ອງຂອງສອງຝ່າຍ.

ໂດຍ: ບຸນຕຽງ ຈັນທະວົງ