ບໍລິສັດ ຮຸ້ນສ່ວນ ທ່າກໍາປັ່ນສາກົນລາວ – ຫວຽດ

ບໍລິສັດ ຮຸ້ນສ່ວນ ທ່າກໍາປັ່ນສາກົນ ລາວ – ຫວຽດ, ໄດ້ຮັບການສ້າງຕັ້ງຂື້ນໃນປີ 1992, ມີຂະແໜງການທຸລະກິດຕົ້ນຕໍແມ່ນຂົນສົ່ງທາງທະເລພາຍໃນ ແລະ ຕ່າງປະເທດ, ຂົນສົ່ງລົດໃຫຍ່, ສະໜອງຕົວແທນຈໍາໜ່າຍ ແລະ ຄົນກາງໃຫ້ເຊົ່າກໍາປັ່ນທະເລ; ຕົວແທນແຈ້ງພາສີແລະບໍລິການດ້ານອື່ນໆ.

ທ່ານ ຫງວຽນ ແຢັງ ເກື່ອງ, ຮອງຜູ້ອໍານວຍການ ບໍລິສັດ ຮຸ້ນສ່ວນ ທ່າກໍາປັ່ນສາກົນລາວ – ຫວຽດນາມ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວ ແລະນັກຂ່າວວິທະຍຸກະຈາຍສຽງຫວຽດນາມ ຫລື VOV ເມື່ອບໍ່ດົນມານີ້ວ່າ: ໂດຍປະຕິບັດຕາມແຜນນະໂຍບາຍຂອງ 2 ລັດຖະບານ ຫວຽດນາມ ແລະ ລາວ, ບໍລິສັດໄດ້ດໍາເນີນການປັບໂຄງປະກອບທຶນຈົດທະບຽນ ແລະ ຮຸ້ນສ່ວນຄືນໃໝ່ ເພື່ອໃຫ້ບໍລິສັດ ປະສົມ ລາວພັດທະນາທ່າກໍາປັ່ນ ຫວຸງອ່າງ ປະກອບທຶນເຂົ້າໃນບໍລິສັດ ມາຮອດວັນທີ 24/05/2011 ໄດ້ເຂົ້າດໍາເນີນການຢ່າງເປັນທາງການ ໃນຊື່ໃໝ່ແມ່ນ “ບໍລິສັດ ຮຸ້ນສ່ວນ ທ່າກໍາປັ່ນ ຫວຸງອາງ ຫວຽດ – ລາວ” , ໃນນັ້ນ, ອັດຕາສ່ວນການປະກອບທຶນຂອງຮຸ້ນສ່ວນຝ່າຍລາວແມ່ນ 20% ແລະ ບັນດາຮຸ້ນສ່ວນ ຫວຽດນາມແມ່ນ 80%,

– ຮອດວັນທີ 15/12/2017 ບໍລິສັດ ໄດ້ປ່ຽນຊື່ມາເປັນ ບໍລິສັດຮຸ້ນສ່ວນ ທ່າກໍາປັ່ນສາກົນ ລາວ – ຫວຽດ ຄືໃນປັດຈຸບັນ.

– ຮອດປັດຈຸບັນ, ບໍລິສັດກໍາລັງດໍາເນີນການປັບໂຄງສ້າງຄືນໃໝ່ ເພີ່ມອັດຕາທຶນປະກອບຂອງຮຸ້ນສ່ວນຝ່າຍລາວ ຈາກ 20% ຂື້ນເປັນ 60% ທຶນຈົດທະບຽນ ຕາມສົນທິສັນຍາ ແລະ ອະນຸສັນຍາ ລະຫວ່າງ ລັດຖະບານ ສສ ຫວຽດນາມ ແລະ ລັດຖະບານ ສປປ ລາວ ວ່າດ້ວຍການຮ່ວມມືລົງທຶນພັດທະນາທ່ານກໍາປັ່ນ ຫວຸງອາງ.

ໃນຊຸມປີຜ່ານມານີ້ ບໍລິສັດໄດ້ໃຫ້ບໍລິການສິນຄ້າຜ່ານທ່າກໍາປັ່ນບັນລຸ 3.500.000 ໂຕນ/ປີ; ລາຍຮັບເກືອບຮອດ 200ຕື້ດົ້ງ/ປີ, ລາຍຮັບສະເລ່ຍຂອງຜູ້ອອກແຮງງານບັນລຸຫລາຍກວ່າ 10ລ້ານດົ້ງ/ຄົນ/ເດືອນ.

ນັບແຕ່ປີ 2011ເປັນຕົ້ນມາ ພາຍຫລັງບໍລິສັດໄດ້ຫັນປ່ຽນມາເປັນ ບໍລິສັດຮຸ້ນສ່ວນ ທ່າກໍາປັ່ນ ຫວຽດ – ລາວ, ບໍລິສັດຍາມໃດກໍ່ໄດ້ຮັບຄວາມເອົາໃຈໃສ່ ແລະ ສ້າງເງື່ອນໄຂອັນສະດວກຈາກລັດຖະບານ, ກະຊວງ, ຂະແໜງການທີ່ກ່ຽວຂ້ອງຂອງ 2 ປະເທດ, ຄະນະກໍາມະການສອງຝ່າຍ ວ່າດ້ວຍການຮ່ວມມື ຫວຽດນາມ – ລາວ, ສະພາການຄ້າລາວ, ອົງການປົກຄອງ ແລະ ບັນດາພະແນກການ, ແຂວງ ຮ່າຕິ໋ງ, ບໍລິຄໍາໄຊ, ສະຫວັນນະເຂດ ແລະແຂວງຄໍາມ່ວນ ໄດ້ສ້າງເງື່ອນໄຂໃຫ້ບໍລິສັດຮ່ວມກັບບັນດາຄູ່ຮ່ວມມືຢູ່ລາວ ຈັດກອງປະຊຸມພົບປະລູກຄ້າຢູ່ ນະຄອນຫຼວງວຽງຈັນ, ແຕ່ງຕັ້ງຄະນະສໍາຫຼວດ, ເຮັດວຽກ, ແນະນໍາ, ດຶງດູດການລົງທຶນ ເພື່ອເພີ່ມທະວີປະລິມານສິນຄ້າຜ່ານແດນຂອງລາວ ຜ່ານທ່າກໍາປັ່ນ ຫວຸງອາງໃຫ້ຫລາຍຂຶ້ນ.

ພິເສດ, ປີ 2021 ແຂວງ ຮ່າຕິ໋ງ ໄດ້ປະກາດໃຊ້ນະໂຍບາຍຊ່ວຍເຫຼືອບັນດາບໍລິສັດກໍາປັ່ນທະເລ ເພື່ອເປີດເສັ້ນທາງຂົນສົ່ງ ຕູ້container ແລະ ເປົ້າໝາຍມີສິນຄ້າຂົນສົ່ງດ້ວຍ ຕູ້container ຜ່ານທ່າກໍາປັ່ນ ຫວຸງອ່າງ, ສ້າງເງື່ອນໄຂເພື່ອໃຫ້ບໍລິສັດເປີດ ແລະ ຮັກສາເສັ້ນທາງຂົນສົ່ງ ຕູ້container ຫ້າຍຟ່ອງ – ຫວຸງອ່າງ – ນະຄອນ ໂຮ່ຈິມິງ 4 ຖ້ຽວ/ເດືອນ.

ທ່ານ ຫງວຽນ ແຢັງ ເກື່ອງ, ຮອງຜູ້ອໍານວຍການ ບໍລິສັດ ຮຸ້ນສ່ວນ ທ່າກໍາປັ່ນສາກົນລາວ – ຫວຽດ ໃຫ້ຮູ້ບາງຜົນງານອັນພົ້ນເດັ່ນໃນການກໍາເນີນທຸລະກິດ ຂອງບໍລິສັດຕື່ມວ່າ: ພວກຂ້າພະເຈົ້າຕີລາຄາວ່າ, ນອກຈາກການເຮັດສໍາເລັດໜ້າທີ່ເປັນຢ່າງດີໃນການດໍາເນີນທຸລະກິດ, ຮັບປະກັນຄວາມສອດຄ່ອງຜົນປະໂຫຍດໃຫ້ແກ່ວິສາຫະກິດ, ຮຸ້ນສ່ວນ ແລະ ຜູ້ອອກແຮງງານ ເຊິ່ງສະແດງໃຫ້ເຫັນຜົນໄດ້ຮັບໃນການດໍາເນີນທຸລະກິດໃນແຕ່ລະປີ, ເຊິ່ງການເຄື່ອນໄຫວຂອງບໍລິສັດໃນໄລຍະຜ່ານມາ ໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ ຢູ່ເຂດພາກກາງຂອງ ຫວຽດນາມ ແລະ ລາວ, ເປັນຕົ້ນ ໄດ້ສ້າງເງື່ອນໄຂອັນສະດວກໃນການຮັບເອົາອຸປະກອນ, ວັດສະດຸ, ວັດຖຸດິບຮັບໃຊ້ການກໍ່ສ້າງ ແລະ ບໍລິຫານບັນດາໂຄງການຈຸດສຸມໃນພາກພື້ນ, ເປັນຕົ້ນໂຮງງານ Formosa, ໂຮງງານໄຟຟ້າຖ່ານຫີນຫວຸງອ່າງ 1 ແລະ 2 ຢູ່ທີ່ ຮ່າຕິ໋ງ ແລະ ໂຮງງານແປ້ງເຈ້ຍ Sun Paper, ໂຮງງານໄຟຟ້າຖ່ານຫີນ ເຊໂປນ ຢູ່ແຂວງສະຫວັນນະເຂດ, ໂຮງງານຊີມັງ KCL ຢູ່ແຂວງຄໍາມ່ວນ.

ພ້ອມກັນນັ້ນ, ໃນຂະບວນການເຄື່ອນໄຫວດໍາເນີນທຸລະກິດ ບໍລິສັດຍາມໃດກໍມີນະໂຍບາຍ ໃຫ້ບຸລິມະສິດແກ່ເດີ່ນ ແລະ ສາງ, ສ້າງເງື່ອນໄຂອັນສະດວກໃຫ້ແກ່ສິນຄ້າຜ່ານແດນຂອງລາວ ມາຜ່ານທ່າກໍາປັ່ນ ຫວຸງອ່າງ. ເຊິ່ງໄດ້ເຮັດໃຫ້ອັດຕາສິນຄ້າຜ່ານແດນຂອງລາວ ທັງໝົດທີ່ຜ່ານທ່າກໍາປັ່ນ ຫວຸງອ່າງເພີ່ມຂຶ້ນຢ່າງຕໍ່ເນື່ອງ: ບັນລຸ 18,3% (ປີ 2016) ແລະ ເພີ່ມຂຶ້ນ 41,5% (ປີ 2021), ຄາດວ່າຈະໃຫ້ບັນລຸຫຼາຍກວ່າ 42% ໃນປີ 2022.

ນອກຈາກນັ້ນ, ດ້ານວຽກງານການຕ່າງປະເທດ, ໃນຊຸມປີຜ່ານມາ, ບໍລິສັດໄດ້ຈັດຕັ້ງການຕ້ອນຮັບ ແຂກຂອງລັດຖະບານ, ບັນດາກະຊວງ, ອົງການປົກຄອງທ້ອງຖີ່ນບັນດາແຂວງ, ບັນດາອົງການຄົ້ນຄວ້າ, ທີ່ປຶກສາຂອງລາວ ທີ່ມາຢ້ຽມຢາມ ແລະ ເຮັກວຽກ, ປະກອບສ່ວນສີມສ້າງໄມຕີຈິດມິດຕະພາບອັນເປັນມູນເຊື້ອ ຄວາມສາມັກຄີພິເສດ ລະຫວ່າງ ຫວຽດນາມ – ລາວ.