ບໍລິສັດ ເຄແອນຊີ ກຣຸບ ມອບການສະໜັບສະໜູນຈັດກອງປະຊຸມສຸດຍອດທຸລະກິດ ແລະ ລົງທຶນອາຊຽນ 2024

ວັນທີ 26 ສິງຫາ 2024 ທີ່ ຫ້ອງການສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ມີພິທີເຊັນສັນຍາສະໜັບ ສະ ໜູນການເປັນເຈົ້າພາບຈັດກອງປະຊຸມສຸດຍອດທຸລະກິດ ແລະ ລົງທຶນອາຊຽນ 2024 (ASEAN Business and Investment Summit 2024) ລະຫວ່າງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ບໍລິສັດ ເຄແອນຊີ ກຣຸບ ຈຳກັດຜູ້ດຽວ ( K & C Group Co., Ltd.) ໃຫ້ກຽດລົງນາມເຊັນສັນຍາດັ່ງກ່າວໂດຍ ທ່ານ ດາວວອນ ພະຈັນທະວົງ, ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ທ່ານ ນາງ ຈັນທະຈອນ ວົງໄຊ, ຮອງປະທານ ບໍລິສັດ ເຄແອນຊີ ກຣຸບ ຈຳກັດຜູ້ດຽວ ພ້ອມດ້ວຍ ທ່ານ ນາງ ເກດສະຫວັນ ປັນ ຍາທິບ ວົງໄຊ, ອຳນວຍການ ບໍລິສັດ ເຄແອນຊີ ກຣຸບ ຈຳກັດຜູ້ດຽວ ເຊິ່ງເປັນຈຳນວນເງິນທັງຫມົດ 250,000,000 ກີບ

ການສະໜັບສະໜູນໃນຄັ້ງນີ້ ເພື່ອເປັນການຜັກດັນຊຸກຍູ້ ດ້ານການຈັດຕັ້ງປະຕິບັດແຜນງານຕະຫລອດໄລຍະການເປັນປະທານສະພາທີ່ປຶກສາທຸລະກິດອາຊຽນ 2024 ຂອງ ສປປ ລາວ ກໍຄື ສະພາການຄ້າ ແລະ ອຸດສາຫະກຳ ແຫ່ງຊາດລາວ ທີ່ຕາງຫນ້າໃຫ້ກັບອົງກອນພາກທຸລະກິດ ໃນການເປັນປະທານຈັດກອງປະຊຸມສຸດຍອດທຸລະກິດ ແລະ ລົງທຶນອາຊຽນ 2024 ພ້ອມທັງເປັນການສ້າງສາຍສໍາພັນອັນດີ ລະຫວ່າງ ສະພາການຄ້າ ແລະ ອຸດສາຫະກໍາ ແຫ່ງຊາດລາວ ແລະ ບໍລິສັດ ເຄແອນຊີ ກຣຸບ ຈຳກັດຜູ້ດຽວໃນການສົ່ງເສີມ ແລະ ເສີມຂະຫຍາຍດ້ານການ ຮ່ວມມື, ມີສ່ວນຮ່ວມເຊິ່ງກັນແລະກັນ ໃນການປະກອບສ່ວນ ສ້າງສາພັດທະນາເສດຖະກິດ-ສັງຄົມຂອງຊາດ ລວມທັງເສີມສ້າງຄວາມເຂັ້ມເເຂງ ໃຫ້ແກ່ບັນດາທຸລະກິດລາວ ໃນການດຳເນີນທຸ ລະກິດທັງພາຍໃນ ແລະ ຮ່ວມມືກັບບັນດາປະເທດຕ່າງໆ ໃນລະ ດັບພາກພື້ນອີກດ້ວຍ.

ສໍາລັບກອງປະຊຸມສຸດຍອດທຸລະກິດ ແລະ ລົງທຶນອາຊຽນ 2024 (ASEAN Business and Investment Summit 2024) ແມ່ນຈະໄດ້ຈັດຂື້ນໃນລະຫວ່າງວັນທີ 8-11 ຕຸລາ 2024 ທີ່ ນະຄອນຫຼວງວຽງຈັນ.