ສະຫງວນລິຂະສິດ © ສະຖານນີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 65 ປີ ຢ່າງສຸດໃຈ

ບໍລິສັດ IHC ມອບເຄື່ອງປ້ອງກັນ COVID-19 ໃຫ້ຫ້ອງການ ສນຍ

ໃນຕອນແລງຂອງມື້ນີ້ ວັນທີ 25 ມີນາ 2020 ທີ່ຫ້ອງວ່າການສຳນັກງານນາຍົກລັດຖະມົນຕີ, ນະຄອນຫຼວງວຽງຈັນ, ບໍລິສັດທີ່ປຶກສາດ້ານການລົງທຶນ ແລະ ການກໍ່ສ້າງເຂື່ອນໄຟຟ້າ ຈຳກັດຜູ້ດຽວ (IHC) ໄດ້ນຳເອົາເຄື່ອງໃຊ້ປ້ອງກັນເຊື້ອພະຍາດ COVID-19 ມາມອບໃຫ້ຫ້ອງວ່າການສຳນັກງານນາຍົກລັດຖະມົນຕີ ເພື່ອນຳໄປຊ່ວຍເຫຼືອທ້ອງຖິ່ນ ກໍ່ຄືພາກສ່ວນທີ່ປະຕິບັດວຽກງານທີ່ມີຄວາມສ່ຽງຕໍ່ການຕິດເຊື້ອພະຍາດ ໂຄວິດ-19 ແລະ ຍັງມີຄວາມຂາດເຂີນເຄື່ອງໃຊ້ປະເພດດັ່ງກ່າວ.

ເຄື່ອງທີ່ນຳມາມອບໃນຄັ້ງນີ້ ປະກອບມີຜ້າອັດປາກອະນາໄມ ຈຳນວນ 8 ແກັດ, ລວມທັງໝົດ 20.000 ອັນ ແລະ ເຄື່ອງວັດແທກອຸ່ນຫະພູມຮ່າງກາຍຄົນ ຈຳນວນ 2 ເຄື່ອງ.

ກ່າວມອບເຄື່ອງດັ່ງກ່າວ ແມ່ນທ່ານ ຢ້ຽນ ຢົງ, ຮອງປະທານບໍລິສັດ IHC ແລະ ກ່າວຮັບ ແມ່ນທ່ານ ມະໄລທອງ ກົມມະສິດ, ຮອງລັດຖະມົນຕີ ແລະ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ໂດຍມີພະນັກງານທີ່ກ່ຽວຂ້ອງ ຂອງສອງຝ່າຍ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ມະໄລທອງ ກົມມະສິດ ໄດ້ສະແດງຄວາມຂອບໃຈ ຕໍ່ບໍລິສັດ IHC ທີ່ໄດ້ນຳເອົາເຄື່ອງຊ່ວຍເຫຼືອຊຸດນີ້ມາມອບ ແລະ ຫ້ອງວ່າການສຳນັກງານນາຍົກລັດຖະມົນຕີ ຈະນຳເອົາເຄື່ອງດັ່ງກ່າວ ໄປມອບຕໍ່ໃຫ້ພາກສ່ວນທີ່ກ່ຽວຂ້ອງ ຕາມຈຸດປະສົງ ແລະ ເປົ້າໝາຍຂອງການຊ່ວຍເຫຼືອໃນຄັ້ງນີ້.

ພາບ ແລະ ຂ່າວ: ຫສນຍ