ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍ່ຄວນວິຕົກກັງວົນ ແລະ ຢ້ານກົວຈົນເກີນໄປກັບກໍລະນີນັກທ່ອງທ່ຽວຈີນ 1 ຄົນທີ່ເດີນທາງເຂົ້າມາທ່ອງທ່ຽວລາວໃນທ້າຍເດືອນມັງກອນຜ່ານມາແລ້ວຖືກກວດພົບວ່າເປັນພະຍາດອັກເສບປອດ ສາຍພັນໃໝ່ 2019

ທ່ານຫົວຫນ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຮຽກຮ້ອງໃຫ້ສັງຄົມ ບໍ່ຄວນວິຕົກກັງວົນ ແລະ ຢ້ານກົວຈົນເກີນໄປ ກ່ຽວກັບກໍລະນີທີ່ມີນັກທ່ອງທ່ຽວຈີນ 1 ຄົນເດີນທາງເຂົ້າມາທ່ອງທ່ຽວປະເທດລາວເຮົາໃນທ້າຍເດືອນມັງກອນຜ່ານມາ, ຊຶ່ງເມື່ອກັບຄືນປະເທດໄປແລ້ວ ຜັດກວດພົບວ່າຜູ້ກ່ຽວເປັນພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫລື ໂຄໂຣນາໄວຣັດສ໌ ແລ້ວຈະມີການຕິດຕໍ່ໄປຫາບຸກຄົນໃກ້ຊິດນັ້ນ, ຊຶ່ງຕໍ່ກໍລະນີນີ້, ທາງການລາວກໍ່ໄດ້ມີການຕິດຕາມບຸກຄົນຈໍານວນ 30 ຄົນທີ່ໄດ້ໃກ້ຊິດກັບຜູ້ກ່ຽວທີ່ເປັນພະຍາດນີ້ເປັນຢ່າງດີ, ເພື່ອຕິດຕາມອາການຢ່າງຕໍ່ເນື່ອງ; ໂດຍມາຮອດປັດຈຸບັນ, ບັນດາບຸກຄົນຈໍານວນນີ້ກໍ່ຍັງມີສຸຂະພາບແຂງແຮງດີ. ໃນໂອກາດຖະແຫລງຂ່າວປະຈໍາວັນຕໍ່ສື່ມວນຊົນກ່ຽວກັບການປ້ອງກັນ ແລະ ຄວບຄຸມພະຍາດອັກເສບປອດ ສາຍພັນໃໝ່ໃນຕອນແລງມື້ວານນີ້ (5 ກຸມພາ) ຢູ່ຫ້ອງປະຊຸມກະຊວງສາທາລະນະສຸກ, ທ່ານໝໍ ລັດຕະນະໄຊ ເພັດສຸວັນ, ຫົວຫນ້າກົມຄວບຄຸມພະຍາດຕິດຕໍ່ກະຊວງສາທາລະນະສຸກໃຫ້ຮູ້ວ່າ: ພາຍຫລັງທີ່ມີເຫດການນີ້ເກີດຂື້ນ, ກະຊວງສາທາລະນະສຸກກໍ່ຄື ກົມຄວບຄຸມພະຍາດຕິດຕໍ່ ໄດ້ປະສານສົມທົບກັບຂະແຫນງຄວບຄຸມພະຍາດຕິດຕໍ່ນະຄອນຫລວງວຽງຈັນ, ຫຼວງພະບາງ ແລະ ແຂວງວຽງຈັນ ເຊິ່ງເປັນເຂດທີ່ນັກທ່ອງທ່ຽວຊາວຈີນຜູ້ທີ່ຕິດເຊື້ອພະຍາດນີ້ ໄດ້ເຄີຍເດີນທາງຜ່ານໄປ ໃຫ້ເອົາໃຈໃສ່ຕິດຕາມບຸກຄົນຈໍານວນ 30 ຄົນ ຊຶ່ງປະກອບມີພະນັກງານນໍາທ່ຽວ, ຜູ້ປະກອບກິດຈະການໂຮງແຮມທີ່ນັກທ່ອງທ່ຽວຄົນນີ້ໄປພັກອາໃສຢູ່ ແລະ ຄົນຂັບລົດນໍາທ່ຽວຊຶ່ງເປັນກຸ່ມຄົນທີ່ໄດ້ໃກ້ຊິດກັບນັກທ່ອງທ່ຽວທີ່ເປັນພະຍາດດັ່ງກ່າວຢ່າງຕໍ່ເນື່ອງ ດ້ວຍການກວດຫາເຊື້ອພະຍາດ ແລະ ຕິດຕາມອາການເປັນປະຈໍາໂດຍມີກໍານົດເວລາ 14 ວັນ. ພ້ອມນີ້, ກໍ່ຍັງໄດ້ແນະນໍາໃຫ້ເຂົາເຈົ້າຕ້ອງຮູ້ປ້ອງກັນຕົນເອງຢ່າງເຂັ້ມງວດ ແລະ ຖືເປັນພັນທະຄວາມຮັບຜິດຊອບທີ່ຂາດບໍ່ໄດ້. ມາຮອດປັດຈຸບັນ, ໃນຈໍານວນ 30 ຄົນນີ້ກໍ່ຍັງມີສຸຂະພາບແຂງແຮງດີ ແລະ ຍັງບໍ່ໄດ້ສະແດງອາການໃດໆທີ່ເຂົ້າກັບນິຍາມກໍລະນີສົງໃສ ພ້ອມທັງ ໄດ້ຢັ້ງຢືນຕື່ມອີກວ່າ ທຸກຂັ້ນຕອນໃນການກວດຫາເຊື້ອພະຍາດ ໂຄໂຣນາໄວຣັດສ໌ນີ້ ແມ່ນປະຕິບັດຕາມມາດຕະຖານຂອງອົງການອະນາໄມໂລກ ແລະ ບໍ່ມີການປົກປິດຂໍ້ມູນຄວາມເປັນຈິງແຕ່ຢ່າງໃດ. ທ່ານໝໍ ລັດຕະນະໄຊ ເພັດສຸວັນ ໃຫ້ຮູ້ຕື່ມວ່າ: ເຖິງວ່າໃນປັດຈຸບັນ, ຢູ່ປະເທດລາວ ຈະຍັງບໍ່ທັນພົບຜູ້ຕິດເຊື້ອພະຍາດອັກເສບປອດສາຍພັນໃໝ່ດັ່ງກ່າວນີ້ເທື່ອກໍ່ຕາມ, ແຕ່ກະຊວງສາທາລະນະສຸກ ກໍ່ຄື ພາກສ່ວນສ່ວນກ່ຽວຂອງລາວ ແມ່ນມີຄວາມພ້ອມຮ້ອຍສ່ວນຮ້ອຍໃນການຮັບມືກັບການແຜ່ລະບາດຂອງພະຍາດນີ້ຢ່າງເເຂງແຮງທີ່ສຸດ ໂດຍໄດ້ກະກຽມໂຮງຫມໍ 103 ແລະ ໂຮງຫມໍມິດຕະພາບ 150 ຕຽງ ເປັນສະຖານທີ່ຫຼັກໃນການຮອງຮັບຄົນເຈັບ, ຖ້າມີກໍລະນີເກີດການລະບາດ. ນອກນັ້ນ, ກໍ່ຍັງໄດ້ກະກຽມໂຮງໝໍເສດຖາທິລາດ, ໂຮງໝໍມະໂຫສົດ ແລະ ໂຮງໝໍແຂວງຈໍານວນໜຶ່ງຕື່ມອີກ; ສ່ວນເຄື່ອງມືທີ່ໃຊ້ກວດຫາເຊື້ອພະຍາດນີ້ ແມ່ນໄດ້ມາດຕະຖານສາກົນ ແລະ ພຽງພໍກັບຄວາມຕ້ອງການກວດຫາເຊື້ອພະຍາດ, ໂດຍປະຈຸບັນນີ້ແມ່ນກໍາລັງຈະຂະຫຍາຍຈຸດຕິດຕັ້ງອຸປະກອນວັດເເທກອຸ່ນຫະພູມ ອີກ 2 ຈຸດຢູ່ແຂວງອຸດົມໄຊ ແລະ ຫຼວງນໍ້າທາ, ກະກຽມວັກແຊັງເພື່ອນໍາໄປໃຊ້ປິ່ນປົວຄົນເຈັບ, ລວມເຖິງວຽກງານສໍາຄັນອີກຈໍານວນຫນຶ່ງ. ດັ່ງນັ້ນ ມາຮອດນີ້ ຈຶ່ງຢາກຂໍຮຽກຮ້ອງໃຫ້ທຸກຄົນໃນສັງຄົມ ຈົ່ງເປັນເຈົ້າການຊ່ວຍກັນໃນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດນີ້ຢ່າງເປັນຂະບວນກວ້າງຂວາງ; ຖ້າຫາກເກີດມີອາການສົງໃສເປັນຕົ້ນ: ມີໄຂ້, ໄອ, ຫາຍໃຈຍາກ ກໍ່ໃຫ້ເຂົ້າໄປພົບແພດໝໍຕາມຈຸດທີ່ກໍານົດໄວ້ໂດຍດ່ວນ ຫລື ໂທແຈ້ງສາຍດ່ວນຂອງກະຊວງສາທາລະນະສຸກ, ໝາຍເລກ 166 ໄດ້ຕະຫລອດ 24 ຊົ່ວໂມງ.