ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍ່ແກ້ວ ປະກາດລົບລ້າງ 7 ໂຄງການທີ່ໄດ້ຮັບການອະນຸມັດໄປແລ້ວແຕ່ບໍ່ຈັດຕັ້ງປະຕິບັດ

ແຂວງບໍ່ແກ້ວ ພວມເລັ່ງແກ້ໄຂບັນຫາໂຄງການລົງທຶນຂອງນັກລົງທຶນທັງພາຍໃນ ແລະ ຕ່າງປະເທດ ທີ່ໄດ້ຮັບການອະນຸມັດລົງທຶນໄປແລ້ວ ແຕ່ບໍ່ຈັດຕັ້ງປະຕິບັດເຮັດໃຫ້ແກ່ຍາວເວລາ ແລະ ບໍ່ຖືກຕ້ອງ, ຄຽງຄູ່ກັບການກວດກາຄືນບັນດາໂຄງການລົງທຶນປູກກ້ວຍເພື່ອໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ.

ໃນໂອກາດລາຍງານຕໍ່ ທ່ານ ຄໍາເຈນ ວົງໂພສີ, ຮອງຫົວໜ້າຄະນະໂຄສະນາອົບຮົມສູນກາງພັກ, ພ້ອມດ້ວຍຄະນະ ທີ່ເຄື່ອນໄຫວເຮັດວຽກຢູ່ແຂວງບໍ່ແກ້ວ ເມື່ອບໍ່ດົນມານີ້ ທ່ານ ບົວຄົງ ນາມມະວົງ, ເຈົ້າແຂວງບໍ່ແກ້ວ ໃຫ້ຮູ້ເຖີງຜົນສໍາເລັດໃນການຈັດ ຕັ້ງປະຕິບັດຫຼາຍວຽກງານສໍາຄັນ ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງແຂວງບໍ່ແກ້ວ ນັບມື້ດີຂຶ້ນ. ຫນຶ່ງໃນນັ້ນ ແມ່ນການກວດກາຄືນບັນດາໂຄງ ການລົງທຶນພາຍໃນແຂວງທີ່ໄດ້ຮັບອະນຸຍາດລົງທຶນໄປແລ້ວແຕ່ບໍ່ຈັດຕັ້ງປະຕິບັດ ເຊີ່ງຖືເປັນການຈັບຈອງທີ່ແກ່ຍາວເວລາ, ກົດໜ່ວງທ່ວງດຶງການພັດທະນາ ແລະ ເປັນການດໍາເນີນທຸລະກິດທີ່ບໍ່ຖືກຕ້ອງຕາມລະບຽບກົດໝາຍ, ເຊີ່ງທາງແຂວງໄດ້ດໍາເນີນການກວດກາ ແລະ ລົບລ້າງໄປແລ້ວ 7 ໂຄງການ. ໄປພ້ອມຯ ກັນນີ້ ຍັງໄດ້ເຄື່ອນໄຫວກວດກາ ແລະ ຊຸກຍູ້ບັນດາໂຄງການລົງທຶນປູກກ້ວຍພາຍໃນແຂວງ 60 ບໍລິສັດ, ໃນນີ້ ພົບເຫັນມີພຽງ 13 ບໍລິສັດທີ່ປະກອບເອກະສານຖືກຕ້ອງ ແລະ ຄົບ ຖ້ວນ, ດັ່ງນັ້ນ ຈິ່ງໄດ້ຊຸກຍູ້ໃຫ້ເຈົ້າຂອງໂຄງການປະກອບເອກະສານຄືນໃໝ່ໃຫ້ຖືກ ຕ້ອງ ເຮັດໃຫ້ມາຮອດປັດຈຸບັນ ຈໍານວນບໍລິສັດທີ່ລົງທຶນປູກກ້ວຍໄດ້ປະກອບເອກະ ສານຖືກຕ້ອງ ແລະ ຄົບຖ້ວນເພີ່ມຂຶ້ນເປັນ 38 ບໍລິສັດແລ້ວ, ສ່ວນທີ່ຍັງເຫລືອຍັງບໍ່ສາມາດແກ້ໄຂໄດ້ຍ້ອນເຈົ້າຂອງໂຄງການໄດ້ເດີນທາງກັບຄືນປະເທດໃນໄລຍະທີ່ມີ ການລະບາດຂອງພະຍາດໂຄວິດ-19 ເຮັດໃຫ້ມີຄວາມຈໍາເປັນຕ້ອງໄດ້ລໍຖ້າຈົນກ່ວາເຂົາເຈົ້າຈະກັບຄືນມາຈິ່ງຈະສາມາດດໍາເນີນຂັ້ນຕອນຕ່າງຯ ຕໍ່ໄປໄດ້.

ເຈົ້າແຂວງບໍ່ແກ້ວ ໃຫ້ຮູ້ຕື່ມວ່າ: ປັດຈຸບັນ ເນື້ອທີ່ປູກກ້ວຍຢູ່ແຂວງບໍ່ແກ້ວ ໄດ້ຫລຸດ ລົງຈາກ 11.000 ກ່ວາເຮັກຕາໃນເມື່ອກ່ອນ ຍັງເຫລືອພຽງ 6.000 ກ່ວາເຮັກຕາ. ສໍາລັບເນື້ອທີ່ທີ່ໄດ້ຢຸດເຊົາປູກກ້ວຍໄປແລ້ວ ທາງແຂວງໄດ້ຊຸກຍູ້ໃຫ້ປະຊາຊົນຫັນໄປປູກພືດຊະນິດອື່ນເປັນສິນຄ້າເພື່ອສົ່ງອອກທັງພາຍໃນ ແລະ ຕ່າງປະເທດ ເຫັນວ່າເປັນຂະບວນກ້ວາງຂວາງ ແລະ ໄດ້ຮັບຜົນດີສົມຄວນ.

ໂດຍ: ມົດແດງນ້ອຍ