ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍ່ແກ້ວ ສຸມໃສ່ແກ້ໄຂປະກົດການຫຍໍ້ທໍ້ພາຍໃນແຂວງ

ແຂວງບໍ່ແກ້ວ ພວມສຸມໃສ່ແກ້ໄຂປະກົດການຫຍໍ້ທໍ້ທີ່ເກີດຂຶ້ນ ເພື່ອເຮັດໃຫ້ສັງຄົມຂອງແຂວງສືບຕໍ່ມີຄວາມສະຫງົບ ແລະ ເປັນລະບຽບຮຽບຮ້ອຍຢ່າງໜັກແໜ້ນ ເຊີ່ງຖືເປັນວຽກງານສໍາຄັນຫນຶ່ງທີ່ສຸມໃສ່ຈັດຕັ້ງປະຕິບັດເປັນຜົນງານຕ້ອນຮັບກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງບໍ່ແກ້ວ ກໍຄື ກອງປະຊຸມໃຫຍ່ ຄັ້ງ XI ຂອງພັກ ປະຊາຊົນ ປະຕິວັດລາວ ທີ່ຈະຈັດຂຶ້ນໃນຕໍ່ຫນ້າ.

ທ່ານ ບົວຄົງ ນາມມະວົງ, ກໍາມະການສໍາຮອງສູນກາງພັກ, ເລຂາພັກແຂວງ, ເຈົ້າແຂວງຯ ບໍ່ແກ້ວ ໃຫ້ຮູ້ໃນໂອ ກາດລາຍງານຕໍ່ ທ່ານ ຄໍາເຈນ ວົງໂພສີ, ກໍາມະການສູນ ກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ພ້ອມດ້ວຍຄະນະ ເຄື່ອນໄຫວເຮັດວຽກຢູ່ແຂວງບໍ່ແກ້ວ ເມື່ອບໍ່ດົນມານີ້ ວ່າ: ການແກ້ໄຂປະກົດ ການຫຍໍ້ທໍ້ທີ່ເກີດຂຶ້ນ ແມ່ນສຸມໃສ່ 2 ດ້ານ ຄື: ແກ້ໄຂປະກົດການຫຍໍ້ທໍ້ທາງສັງຄົມ ແລະ ແກ້ໄຂປະກົດການຫຍໍ້ທໍ້ຢູ່ຖັນແຖວການຈັດຕັ້ງ ແລະ ສະມາຊິກພັກ. ໃນນີ້ ສະເພາະການແກ້ໄຂປະກົດ ການຫຍໍ້ທໍ້ໃນສັງຄົມ ໄດ້ຫັນເອົາພະນັກງານ, ທະຫານ ແລະ ຕໍາຫລວດ ລົງກໍ່ສ້າງຮາກຖານການເມືອງແກ້ໄຂປະກົດການຫຍໍ້ທໍ້ຕິດພັນກັບວຽກງານສາມສ້າງຢູ່ 39 ບ້ານຈຸດສຸມ ນັບແຕ່ທ້າຍປີ 2018 ຈົນມາຮອດປັດຈຸບັນນີ້ ໂດຍສຸມໃສ່ 8 ວຽກຕົ້ນຕໍ ຄື: ແກ້ໄຂບັນຫາຢາເສບຕິດ, ການຄ້າມະນຸດ, ການຄຸ້ມ ຄອງແຮງງານ, ການເຄື່ອນໄຫວສາສະ ໜາທີ່ບໍ່ຖືກຕ້ອງ, ການເຄື່ອນຍ້າຍຖິ່ນຖານຂອງພົນລະ ເມືອງ, ປັບປຸງສ້າງຄວາມເຂັ້ມແຂງໃຫ້ອົງການປົກຄອງບ້ານ, ຄຸ້ມຄອງສໍາມະໂນຄົວ ແລະ ການຄ້າຂາຍເຖື່ອນ ໂດຍເລີ່ມຈາກເຮັດທົດລອງກ່ອນ ຈາກນັ້ນໄດ້ຖອດຖອນບົດຮຽນ ແລະ ລົງມືຈັດຕັ້ງປະຕິບັດຕົວຈິງຢູ່ແຕ່ລະບ້ານ. ຜ່ານການຈັດ ຕັ້ງປະຕິບັດຕົວຈິງ ສາມາດຂຶ້ນສໍາມະໂນຄົວໃຫ້ຄອບຄົວທີ່ຜ່ສນການກວດກາຄົບຕາມເງື່ອນໄຂ ໄດ້ 1.108 ຫົວ. ໄດ້ແຕ່ງຕັ້ງຄະນະສະເພາະກິດເຄື່ອນໄຫວແກ້ໄຂປະ ກົດການຫຍໍ້ທໍ້ ໂດຍສະເພາະການຄ້າຂາຍເຖື່ອນຫລົບຫລີກພາສີໄດ້ຫລາຍຄັ້ງ, ໃນນີ້ ມີທັງລົດໃຫຍ່, ນໍ້າມັນເຊື້ອໄຟ, ຊີມັງ ແລະ ອື່ນຯ. ນອກຈາກນີ້ ຈາກການຮ່ວມມືກັນລະຫວ່າງຄະນະທີ່ລົງກໍ່ສ້າງຮາກຖານ ແລະ ຄະນະສະ ເພາະກິດ ເຮັດໃຫ້ປີ 2019 ຜ່ານມາ ສາມາດຢຶດຢາເສບຕິດ ໂດຍສະເພາະຢາບ້າໄດ້ 17 ລ້ານກ່ວາເມັດ, ສ່ວນໃນປີ 2020 ນັບແຕ່ຕົ້ນປີມາຮອດປັດຈຸບັນ ຢຶດຢາບ້າໄດ້ 1 ລ້ານກ່ວາເມັດ. ຄຽງຄູ່ກັນນີ້ ໄດ້ແກ້ໄຂຄວາມບໍ່ສະຫງົບ ແລະ ບໍ່ເປັນລະບຽບຮຽບຮ້ອຍຢູ່ເຂດເຊື່ອມຕໍ່ລະຫວ່າງເມືອງຕົ້ນເຜີ້ງກັບເຂດເສດຖະກິດພິເສດສາມຫລ່ຽມຄໍາ, ແກ້ໄຂການດໍາເນີນທຸລະ ກິດ, ການເຄື່ອນໄຫວຂອງຍິງສາວ ແລະ ເລີກຮື້ປ້າຍໂຄສະນາທີ່ບໍ່ຖືກຕ້ອງຕາມລະ ບຽບການໃນເຂດດັ່ງກ່າວ ຕື່ມອີກ.

ເຈົ້າແຂວງບໍ່ແກ້ວ ໃຫ້ຮູ້ຕື່ມວ່າ: ສໍາລັບການແກ້ໄຂປະ ກົດການຫຍໍ້ທໍ້ຢູ່ໃນຖັນແຖວການຈັດຕັ້ງ ແລະ ສະມາຊິກພັກ ໄດ້ປະຕິບັດໄປພ້ອມຯ ກັບການປັບປຸງການຈັດຕັ້ງຂອງບັນ ດາພະແນກການ ແລະ ເມືອງ ໂດຍໄດ້ສໍາຫລວດກວດກາ ແລະ ປະຕິບັດວິໄນຕໍ່ບາງບຸກຄົນ, ນັບທັງການນໍາ, ແລະ ພະນັກງານ-ລັດຖະກອນທີ່ເຮັດຜິດລະ ບຽບກົດໝາຍຢ່າງເດັດຂາດ ເພື່ອເຮັດໃຫ້ກົງຈັກມີຄວາມປອດໃສເຂັ້ມແຂງ, ເປີດການຮຽນວຽກງານປ້ອງກັນຊາດ-ປ້ອງກັນຄວາມສະຫງົບ ແລະສ້າງບ້ານປ້ອງກັນຊາດເຂັ້ມແຂງ-ບ້ານປ້ອງກັນຄວາມສະຫງົບດີນັບແຕ່ຂັ້ນແຂວງລົງສູ່ຮາກຖານເຫັນວ່າໄດ້ຮັບຜົນສໍາເລັດດີ.

ຂ່າວ: ມົດແດງນ້ອຍ