ແຂວງບໍ່ແກ້ວ ໄຂສົກຮຽນໃໝ່ 2024-2025 ທົ່ວແຂວງ ກໍຄືທົ່ວປະເທດ ໃນວັນທີ 2 ກັນຍາ 2024 ທີ່ໂຮງຮຽນ ມສ ສັນ ຕິພາບ ແຂວງບໍ່ແກ້ວ ໂດຍການເຂົ້າຮ່ວມຂອງທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ, ທ່ານ ວັນດີ ທໍາມະວົງ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄູ-ອາຈານ, ພໍ່ແມ່ຜູ້ປົກຄອງ ແລະ ນ້ອງນ້ອງນັກຮຽນເຂົ້າຮ່ວມ.
ທ່ານ ບຸນມີ ສັດຍະວົງ ອໍານວຍການໂຮງຮຽນ ມສ ສັນຕິ ພາບ ໄດ້ກ່າວວ່າ: ແຜນການຮຽນ-ການສອນ ປະຈຳສົກຮຽນ 2024-2025, ມີນັກຮຽນມາສະເໜີຕົວແລ້ວ 1.005 ນ້ອງ ຍິງ 508 ນ້ອງ, ຍັງບໍ່ທັນມາສະເໜີຕົວ 174 ນ້ອງ ຍິງ 47 ນ້ອງ (ທຽບໃສ່ ສົກຮຽນ 2023-2024 ເຫັນວ່າ ເພີ່ມຂຶ້ນ 2,08%), ມີ 28 ຫ້ອງຮຽນ, ມີຄູສອນ 47 ຄົນ ຍິງ 24 ຄົນ ທຽບໃສ່ຈຳນວນຫ້ອງຮຽນ ແລະ ຈັດແບ່ງຊົ່ວໂມງຕາມໂຄງການຫລັກສູດ ເຫັນວ່າພຽງພໍ, ແຕ່ຖ້ານັກຮຽນມາສະເໜີຕົວເພີ່ມ ອາດເຮັດໃຫ້ຫ້ອງຮຽນບໍ່ພຽງພໍ ແລະ ຄູສອນບາງວິຊາກໍ່ຂາດ ເປັນຕົ້ນ ຄູສອນວິຊາຄະນິດສາດ, ພາສາອັງກິດ, ພະລະສຶກສາ.
ໃນສົກຮຽນໃໝ່ນີ້, ໂຮງຮຽນ ມສ ສັນຕິພາບ ຈະສືບຕໍ່ເອົາ ໃຈໃສ່ເຮັດວຽກງານ ສຶກສາອົບຮົມການເມືອງ, ແນວຄິດ ໃຫ້ພະ ນັກງານ-ຄູອາຈານ ແລະ ນ້ອງນັກຮຽນໃຫ້ມີຄວາມໜັກແໜ້ນ, ເຂັ້ມແຂງ ຢ່າງເປັນປົກກະຕິ ແລະ ທົ່ວເຖິງ ພ້ອມທັງເນັ້ນການສ້າງຄວາມສາມັກຄີພາຍໃນ ໃຫ້ເປັນປຶກແຜ່ນແໜ້ນໜາ ແລະ ຄວາມສາມັກຄີພາຍນອກໃຫ້ກວ້າງຂວາງ, ເອົາໃຈໃສ່ການສັບຊ້ອນຄູ- ອາຈານສອນ ໃຫ້ຖືກຕ້ອງກັບວຸດທິ ແລະ ເໝາະສົມສອດຄ່ອງກັບສະພາບຕົວຈິງ ລວມທັງການຈັດແບ່ງໜ້າທີ່ຮັບຜິດຊອບ ໃນໜ້າວຽກຕ່າງໆ ຂອງພະນັກງານ-ຄູສອນ ກໍໃຫ້ເໝາະສົມ ກັບຄວາມຮູ້ຄວາມສາມາດຂອງແຕ່ລະຄົນ. ນອກນີ້, ຍັງໄດ້ຊຸກຍູ້, ສົ່ງເສີມການຮຽນ-ການສອນ ໃຫ້ເປັນຂະບວນຟົດຟື້ນ ໂດຍເນັ້ນໃສ່ຄຸນນະພາບ ເປັນຕົ້ນຕໍ, ຊຸກຍູ້, ສົ່ງເສີມວຽກງານຂະບວນການຕ່າງໆ ໃຫ້ມີລະບຽບ ແລະ ເປັນຂະບວນຟົດຟື້ນ,ສຸມໃສ່ແກ້ໄຂບັນຫານັກຮຽນທີ່ຜິດລະບຽບ, ຜົນການຮຽນຕໍ່າ ແລະ ຂາດຮຽນບໍ່ມີເຫດຜົນ, ເນື່ອງມາຈາກບັນຫາຄອບຄົວ ແລະ ສັງຄົມ, ສຸມໃສ່ສ້າງນັກຮຽນດີ-ນັກຮຽນເກັ່ງ ໃນທຸກຂັ້ນຮຽນ ໂດຍສະ ເພາະ ແມ່ນຂັ້ນ ມ4 ແລະ ມ7 ເພື່ອເຂົ້າຮ່ວມການສອບເສັງແຂ່ງ ຂັນນັກຮຽນເກັ່ງ ໃນລະດັບຕ່າງໆ, ສຸມໃສ່ການປະເມີນຜົນການຮຽນ ປະຈຳເດືອນ, ປະຈຳພາກຮຽນ ຂອງນັກຮຽນ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.
ຂ່າວ: ຄໍາເພັງ ສີສະຫວ່າງ
