ໃນວັນທີ 20 ສິງຫາ 2023 ເຈົ້າໜ້າທີ່ ປກສ ເມືອງຈໍາພອນ ແຂວງສະຫວັນນະເຂດ ໄດ້ລົງແກ້ໄຂກັກລົດຈັກຊາວໜຸ່ມ ທີ່ດັດແປງສະພາບເຕັກນິກ ມາຂັບຂີ່ຢູ່ອ່າງຝາຍນໍ້າສຸຍ ເຂດບ້ານທີ 10 ເມືອງຈໍາພອນ ໄດ້ກັກລົດຈັກ ຈໍານວນ 48 ຄັນ.
ພັນໂທ ບຸນລໍ້າ ເລັ່ງສະຫວັນ ຫົວໜ້າກອງບັນຊາການ ປກສ ເມືອງຈໍາພອນ ແຂວງສະຫວັນນະເຂດ ໃຫ້ຮູ້ວ່າ: ເຈົ້າໜ້າທີ່ ປກສ ເມືອງໄດ້ຮັບການລາຍງານຈາກພົນລະເມືອງດີວ່າ ໃນເວລາ 10:00 ໂມງ ຂອງວັນທີ 20 ສິງຫາ 2023 ໄດ້ພົບເຫັນກຸ່ມຊາວໜູຸ່ມຈໍານວນຫຼາຍ ລວມຕົວກັນຂັບຂີ່ລົດຈັກດັດແປງສະພາບຢູ່ເຂດອ່າງຝາຍນໍ້າສຸຍຈຸດທ່ອງທ່ຽວ. ຈາກນັ້ນ ກອງບັນຊາການ ປກສ ເມືອງ ຈຶ່ງໄດ້ແຕ່ງຕັ້ງ ເຈົ້າໜ້າທີ່ວິຊາສະເພາະລົງກວດກາ, ຜ່ານການຕິດຕາມຕົວຈິງ ພົບເຫັນຊາວໜູຸ່ມຂີ່ລົດເປັນກຸ່ມແທ້ ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະລົງແກ້ໄຂ, ມາຮອດເວລາ 14:20 ໂມງ ເຈົ້າໜ້າທີ່ ສາມາດກັກລົດຈັກທີ່ດັດແປງສະພາບໄດ້ຈໍານວນ 48 ຄັນ ເຊັ່ນ: ໃສ່ຢາງນ້ອຍ, ດັດແປງທໍ່ດັງ ແລະອື່ນໆ ພ້ອມທັງນໍາລົດຈໍານວນດັ່່ງກ່າວມາໄວ້ຫ້ອງການ ປກສ ເມືອງ.
ຕໍ່ກັບບັນຫາດັ່ງກ່າວ, ເຈົ້າໜ້າທີ່ຈະໄດ້ສຶກສາອົບຮົມ, ກ່າວເຕືອນ ເຮັດບົດບັນທຶກໂດຍຊ່ອງໜ້າຜູ້ປົກຄອງ ພ້ອມດ້ວຍພາກສ່ວນກ່ຽວຂ້ອງ ເພື່ອເປັນການຕັກເຕືອນລູກຫຼານບໍ່ໃຫ້ພາກັນຂັບຂີ່ລົດດັດແປງສະພາບສ້າງສຽງເນືອງນັນເຮັດໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ ແລະ ມີຄວາມສ່ຽງທີ່ຈະພາໃຫ້ເກີດອຸບັດຕິເຫດຕາມທ້ອງຖະໜົນ; ຕໍ່ກັບລົດທີ່ດັດແປງສະພາບ ແມ່ນໃຫ້ນໍາເອົາອາໄຫຼ່ທີ່ຖືກຕ້ອງມາປ່ຽນໃສ່ແລ້ວຈຶ່ງນໍາລົດອອກໄປນໍາໃຊ້ໄດ້ ແລະ ສໍາລັບອາໄຫຼ່ທີ່ດັດແປງເຈົ້າໜ້າທີ່ຈະຮັກສາໄວ້ ເພື່ອທໍາລາຍຖິ້ມ.
