ເມື່ອບໍ່ດົນມານີ້, ຢູ່ທີ່ກອງບັນຊາການປ້ອງກັນຄວາມສະຫງົບ ເມຶອງທຸລະຄົມ ແຂວງວຽງຈັນ ໄດ້ຈັດພິທີສຶກສາອົບຮົມໃຫ້ບັນດານັກຂັບຂີ່ກຸ່ມໄວໜຸ່ມດັດແປງສະພາບເຕັກນິກລົດຈັກ, ດັດແປງທໍ່ ລົບກວນສັງຄົມດ້ວຍສຽງຟົດນັນ, ໂດຍການເປັນປະທານຂອງ ພັທ ຕຽງທອງ ໄຊຍະວົງ ຮອງຫົວໜ້າພະແນກຕໍາຫລວດ, ຫົວໜ້າໜ່ວຍງານຈະລາຈອນ, ກອງບັນຊາການປ້ອງກັນຄວາມສະຫງົບເມືອງທຸລະຄົມ, ມີເຈົ້າໜ້າທີ່ໜ່ວຍງານຈະລາຈອນ, ຜູ້ປົກຄອງ, ກຸ່ມໄວໜຸ່ມເປົ້າໝາຍ ແລະ ພາກສ່ວນກ່ຽວຂ້ອງເຂົ້າຮ່ວມ. ທັງນີ້ເພື່ອເຮັດໃຫ້ສະພາບການສັນຈອນໃນທ້ອງຖະໜົນມີຄວາມເປັນລະບົບລະບຽບ, ຫຼຸດຜ່ອນສຽງເນືອງນັນ ແລະ ສ້າງຄວາມເຂັ້ມແຂງທາງດ້ານວຽກງານວິຊາສະເພາະຕາມພາລະບົດບາດ, ສິດ ແລະ ໜ້າທີ່ຂອງຕົນ.
ພັທ ຕຽງທອງ ໄຊຍະວົງ ກາວວ່າ: ຈຸດປະສົງຂອງການດໍາເນີນການແກ້ໄຂປະກົດການຫຍໍ້ທໍ້ໃນຄັ້ງນີ້, ນອກຈາກປະຕິບັດວຽກງານວິຊາສະເພາະແລ້ວ ຕົ້ນຕໍແມ່ນການຜັນຂະຫຍາຍຈັດຕັ້ງປະຕິບັດຄໍາເຫັນຊີ້ນໍາຂອງຄະນະພັກ, ຄະນະບັນຊາກອງບັນຊາການ, ສ້າງຂະບວນການຂໍ່ານັບຮັບຕ້ອນ ແລະ ຊົມເຊີຍຜົນສໍາເລັດຂອງການດໍາເນີນກອງປະຊຸມໃຫຍ່ບັນດາໜ່ວຍພັກບ້ານ ຕິດພັນກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດທີ່ກຳລັງສືບຕໍ່ດຳເນີນຢູ່ໃນປັດຈຸບັນ, ໂດຍສະເພາະແມ່ນການດຳເນີນກອງປະຊຸມໃຫຍ່ 3 ຂັ້ນຂອງພັກ. ການສຶກສາອົບຮົມ, ກ່າວເຕືອນ ແລະ ສ້າງບົດບັນທຶກ ແກ້ໄຂສະພາບດັດແປງລົດ, ແນໃສ່ສ້າງແນວຄິດຫັນປ່ຽນຈິນຕະນາການເກົ່າ, ຄ່ານິຍົມຂອງກຸ່ມໄວໜຸ່ມໃນທາງທີ່ບໍຖືກຕ້ອງ. ໃຫ້ຫັນແນວຄິດໃນທາງຕັ້ງໜ້າ ສ້າງສັນໃຫ້ເປັນປະໂຫຍດ, ບັນຫາສຳຄັນອີກອັນໜຶ່ງ ກໍເພື່ອຊ່ວຍຜູ້ປົກຄອງໃນການອົບຮົມບອກສອນເຂົາເຈົ້າໃຫ້ເປັນຄົນດີຂອງສັງຄົມ, ເປັນພົນລະເມືອງດີຂອງຊາດ, ຕັ້ງໃຈສຶກສາຮ່ຳຮຽນ, ຊອກຫາວິຊາຊີບຫາລ້ຽງຕົນເອັງ, ຊ່ວຍວຽກຄອບຄົວ ແລະ ອື່ນໆ.
ໂອກາດດຽວກັນນີ້ ເຈົ້າໜ້າທີ່ໜ່ວງານຈະລາຈອນ ໄດ້ຜ່ານລະບຽບຫລັກການການຂັບຂີ່ທີ່ຖືກຕ້ອງຕາມກົດໝາຍວ່າດ້ວຍການຈະລາຈອນທາງບົກ, ຂໍ້ຫ້າມ ແລະ ມາດຕະການຕໍ່ຜູ້ລະເມີດການຂັບຂີ່, ຊຶ່ງຜ່ານການປະຕິບັດໜ້າທີ່, ຂຶ້ນເປົ້າໝາຍຕິດຕາມ, ໂດຍສົມທົບກັບຕຳຫຼວດກຸ່ມບ້ານ, ການຈັດຕັ້ງບ້ານ ສາມາດກັກລົດຈັກໄດ້ຈໍານວນ 15 ຄັນ ແລະ ຢຶດໄວ້ຢູ່ກອງບັນຊາການ ປກສ ເມືອງ ຊົ່ວຄາວ. ການດັດແປງພາຫະນະສ່ວນຫລາຍແມ່ນໃສ່ຕີນນ້ອຍ, ດັດແປງທໍ່ຄວັນໃຫ້ສຽງດັງແຮງ ແລະ ອື່ນໆ.
(ຂ່າວ: ເມືອງທຸລະຄົມ)
