ທ່ານ ພັນໂທ ສົມສັກ ຈັນທະລາສອນ ຫົວໜ້າກອງບັນຊາການ ປກສ ເມືອງອຸທຸມພອນ ລາຍງານໃຫ້ຮູ້ວ່າ:ການແກ້ໄຂມ້າງລາຍຄະດີກຸ່ມຊື້ຂາຍຊັບບໍ່ຖືກຕ້ອງຕາມກົດໝາຍ ເປັນຕົ້ນແມ່ນບັນຫາປະກົດການຫຍໍ້ທໍ້ທີ່ເກີດຂື້ນໃນສັງຄົມ ໂດຍສະເພາະ ບັນຫາທີ່ພົ້ນເດັ່ນໃນປັດຈຸບັນຂອງເມືອງອຸທຸມພອນ ເປັນຕົ້ນ: ມົ້ວສຸມເສບຢາເສບຕິດ, ດື່ມນໍ້າກະທ້ອມ,ຂາຍນໍ້າກະທ້ອມ,ໃບກະທ້ອມ ໂດຍໄດ້ນໍາຕົວມາສຶກສາອົບຮົມກ່າວເຕືອນໃຫ້ເຫັນໄດ້ຜົນຮ້າຍຂອງຢາເສບຕິດ ຈໍານວນ 23 ຄົນ,ຍິງ 03 ຄົນ ແລະ ບັນຫາລັກຊັບ ຊິງຊັບ ( ລັກລົດຈັກ ) ເຊິ່ງໄດ້ສຸມໃສ່ມ້າງບັນດາເປົ້າ ໝາຍທີ່ມີການເຄື່ອນໄຫວລັກຊັບ ພັກເຊົາຢູ່ຫ້ອງແຖວໃຫ້ເຊົ່າແຫ່ງໜຶ່ງພາຍໃນເມືອງ.
ພາຍຫຼັງທີ່ກວດກາສໍາເລັດແລ້ວ ຈິ່ງໄດ້ນໍາເອົາລົດຈັກ ຈໍານວນ 30 ຄັນ ແລະ ສິ້ນສ່ວນລົດຈັກທີ່ຖືກມ້າງ,ລົດກະບະ ອີຊູຊຸ ດີແມັກ ຈໍານວນ 02 ຄັນ ມາກວດກາ ແລະ ຮັກສາໄວ້ຢູ່ກອງບັນຊາການ ປກສ ເມືອງ,ພ້ອມທັງກັກຕົວຜູ້ຕ້ອງສົງໃສ ມາທໍາການສືບສວນ-ສອບສວນ ທັງໝົດ 25 ຄົນ,ໃນນີ້ມີຄົນຕ່າງປະເທດ 02 ຄົນ, ທີ່ເຂົ້າເມືອງຜິດກົດໝາຍ ທີ່ພັກຢູ່ຫ້ອງເຊົ່າ,ຜ່ ານການສືບສວນ-ສອບສວນຂອງກຸ່ມແກ້ງພວກຊື້ຂາຍຊັບທີ່ບໍ່ຖືກຕ້ອງຕາມກົດໝາຍໄດ້ທັງໝົດ 08 ຄົນ,ແມ່ນຈະໄດ້ສືບຕໍ່ດໍາເນີນຄະດີຕາມຂັ້ນຕອນຂອງລະບຽບກົດໝາຍ, ສ່ວນຄົນຕ່າງປະເທດ 02 ຄົນ ທີ່ເຂົ້າເມືອງຜິດກົດໝາຍ ພາກສ່ວນກ່ຽວຂ້ອງໄດ້ດໍາເນີນຕາມຂັ້ນຕອນລະບຽບກົດໝາຍຕໍ່ໄປ ແລະ ຈໍານວນຜູ້ທີ່ບໍ່ມີສ່ວນພົວພັນກັບການຊື້ຂາຍຊັບ ແຕ່ມີສ່ວນຮ່ວມມົ້ວສຸມດື່ມນໍ້າກະທ້ອມ ຈໍານວນ 12 ຄົນ, ທາງກອງບັນການ ປກສ ເມືອງກໍ່ໄດ້ສຶກສາອົບຮົມກ່າວເຕືອນໃຫ້ຮູ້ໄດ້ຜົນຮ້າຍ ແລະ ພິດໄພຂອງຢາເສບຕິດ ມັນທໍາລາຍຊີວິດ ແລະ ຮ່າງກາຍ ແລ້ວມອບໃຫ້ຜູ້ປົກຄອງ,ອໍານາດການປົກຄອງບ້ານ ນໍາເມືອປິ່ນປົວບໍາບັດໃຫ້ກາຍເປັນພົນລະເມືອງຂອງສັງຄົມ
ສໍາລັບພິທີຖະແຫຼງກ່ຽວກັບການແກ້ໄຂມ້າງລາຍຄະດີກຸ່ມຊື້ຂາຍຊັບບໍ່ຖືກຕ້ອງຕາມກົດໝາຍແມ່ນໄດ້ຈັດຂື້ນໃນວັນທີ 30 ສິງຫາ 2024 ທີ່ກອງບັນຊາການ ປກສ ເມືອງອຸທຸມພອນ.
ທີ່ມາ: ນາງ ເກດສະດາພອນ ສີທໍາມະວັນ, ນັກຂ່າວເມືອງອຸທຸມພອນ
