ໂດຍປະຕິບັດຕາມວາລະແຫ່ງຊາດ ໃນການແກ້ໄຂບັນຫາຢາເສບຕິດ ຕິດພັນກັບການແກ້ໄຂບັນຫາປະກົດການຫຍໍ້ທໍ້ໃນສັງຄົມ ທາງເຈົ້າໜ້າທີ່ວິຊາສະເພາະໄດ້ລົງເຄື່ອນໄຫວ ຊັນນະສູດເປົ້າໝາຍລະແວງສົງໄສ ວ່າມີການເຄື່ອນໄຫວກະທໍາຜິດຕໍ່ລະບຽບກົດໝາຍ ເປັນຕົ້ນແມ່ນບັນຫາຢາເສບຕິດ, ອາວຸດເສິກ ແລະ ຄ້າຂາຍເຖື່ອນ ຜ່ານການດໍາເນີນການຊັນນະສູດ ເກັບກໍາຂໍ້ມູນເຫັນວ່າ ການເຄື່ອນໄຫວ ທີ່ເປັນການລະເມີດລະບຽບກົດໝາຍ ເປົ້າໝາຍດັ່ງກ່າວ, ໂດຍປະຕິບັດຕາມຂໍ້ຕົກລົງຂອງ ກອງບັນຊາການ ປກສ ແຂວງ ວ່າດ້ວຍການແຕ່ງຕັ້ງ ຄະນະຮັບຜິດຊອບລົງແກ້ໄຂມ້າງເປົ້າຫມາຍຄ້າ-ຂາຍຢາເສບຕິດ ເລກທີ 854/ປກສ.ອຊ ລົງວັນທີ 4 ມິຖຸນາ 2024;
ໃນເວລາ 6 ໂມງເຊົ້າ ຂອງວັນທີ 11 ມິຖຸນາ 2024 ເຈົ້າໜ້າທີ່ວິຊາສະເພາະຈີ່ງໄດ້ບັນຈຸກໍາລັງເຂົ້າແກ້ໄຂມ້າງເປົ້າຫມາຍ 2 ຈຸດ ຢູ່ບ້ານໝູຕື່ນ ເມືອງນາໝໍ້ ແຂວງອຸດົມໄຊ ດ້ວຍຮູບການເຂົ້າຈັບກຸມ ແລະ ກວດຄົ້ນເຄຫະສະຖານ (ເຮືອນ) ໃນກໍລະນີເຊິ່ງຫນ້າ ແລະ ຮີບດ່ວນ ໂດຍຊ້ອງຫນ້າຜູ້ຕາງຫນ້າຈາກອົງການໄອຍະການ ປະຊາຊົນເຂດ I ແລະ ອົງການປົກຄອງບ້ານໝູຕືນ, ຜ່ານການຈັດຕັ້ງປະຕິບັດທັງ 2 ຈຸດເປົ້າຫມາຍ ສາມາດກັກຕົວເປົ້າຫມາຍ ແລະ ຍຶດເຄື່ອງຂອງກາງທີ່ພົວພັນກັບການກະທໍາຜິດ ໄດ້ທັງຫມົດດັ່ງນີ້:
ຈຸດເປົ້າຫມາຍທີ 1: ກັກຕົວເປົ້າຫມາຍໄດ້ 4 ຄົນ ແລະ ຍຶດເຄື່ອງຂອງກາງທີ່ພົວພັນກັບລາຍຄະດີຄື: ທ້າວ ສາເຈີ ອາຍຸ 54 ປີ, ທ້າວ ເຈີພູ ອາຍຸ 27 ປີ, ທ້າວ ເຈີເຕີ ອາຍຸ 26 ປີ, ທ້າວ ລີເຊີ ອາຍຸ 24 ປີ, ເປົ້າໝາຍທັງ 4 ຄົນ ອາຊີບປະຊາຊົນ ເປັນພໍ່-ລູກກັນ ຢູ່ບ້ານໝູຕືນ ເມືອງນາໝໍ້ ແຂວງອຸດົມໄຊ.
ເຄື່ອງຂອງກາງທີ່ຍຶດໄດ້ມີ: ຢາຝິ່ນ ຈໍານວນ 2 ກ້ອນ, ນໍ້າຫນັກ 437,3 ກຣາມ, ເງິນ ກີບ 90.000.000 ກີບ, ເງິນຢວນ 5.135.637 ຢວນ, ເງິນບາດໄທ 251.000 ບາດ, ປຶ້ມບັນຊີ 5 ຫົວ, ບັດ ATM 2 ບັດ, ລູກປືນ AK 28 ລູກ, ລູກປືນກາມ້າ 4 ລູກ, ລົດປຣາໂດ ສີຂາວມຸກ 1 ຄັນ ໝາຍເລກທະບຽນ ຮລ 5168 ກໍາແພງນະຄອນ, ລົດກະບະລີໂວ 2 ຄັນຄື: ສີຂາວ ເລກທະບຽນ ກກ 4294 ອຸດົມໄຊ ແລະ ເລກທະບຽນ ກວ 8156 ກໍາແພງນະຄອນ, ໂທລະສັບ 2 ເຄື່ອງ.
ຈຸດເປົ້າຫມາຍທີ 2: ກັກຕົວເປົ້າຫມາຍໄດ້ 1 ຄົນຄື: ທ້າວ ສໍຕໍ ອາຍຸ 27 ປີ, ປະຊາຊົນ ຢູ່ບ້ານ ໝູຕືນ ເມືອງນາຫມໍ້, ແຂວງ ອຸດົມໄຊ; ເຄື່ອງຂອງກາງທີ່ຍຶດໄດ້ມີ: ປືນສັ້ນ ຍີ່ຫໍ້ RAMBO (ແລັມໂບ) 1 ກະບອກ, ລູກກະສູນ 4 ລູກ, ເງິນຢວນ 384,200 ຢວນ, ໝື້ໝາກຟ້າ 2 ຫຼອດ, ແກັບໝາກຟ້າ 4 ດອກ, ປຶ້ມຝາກປະຢັດ 1 ຫົວ, ໂທລະສັບ 3 ເຄື່ອງ.
ປັດຈຸບັນລາຍລະອຽດຄະດີດັ່ງກ່າວທາງເຈົ້າໜ້າທີ່ ພວມສືບຕໍ່ດໍາເນີນສືບສວນ-ສອບສວນ ຂະຫຍາຍຜົນຫາກຸ່ມແກ້ງພັກພວກ ທີ່ຮ່ວມຂະບວນການ ເພື່ອນຳຕົວມາດຳເນີນຄະດີຕາມກົດໝາຍ.
ຂໍ້ມູນຈາກ ປກສ ແຂວງອຸດົມໄຊ
