ປີ 2022 ເປັນປີທີ່ມີຄວາມຫມາຍຄວາມສໍາຄັນຕໍ່ ພັກ, ລັດຖະບານ ແລະ ປະຊາຊົນຈີນທຸກທົ່ວໜ້າ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນຈະຈັດຂຶ້ນໃນທ້າຍປີ 2022 ຕາມການຄົ້ນຄວ້າພິຈາລະນາ ແລະ ຮັບຮອງເອົາມະຕິຕົກລົງກ່ຽວກັບການໄຂກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກ ໃນໂອກາດຈັດກອງປະຊຸມຄົບຄະນະຄັ້ງທີ 6 ຂອງຄະນະກໍາມະການສູນກາງພັກກອມມູນິດຈີນສະໄໝທີ 19 ໃນຕົ້ນເດືອນພະຈິກ 2021 ທີ່ຜ່ານມາ. ກອງປະຊຸມໃຫຍ່ຄັ້ງທີ 20 ຂອງພັກກອມມູນິດຈີນ ເປັນເຫດການສໍາຄັນໜຶ່ງໃນຊີວິດການເມືອງຂອງພັກ ແລະ ປະເທດຊາດ, ເຊິ່ງຈະມີຜູ້ແທນຈຳນວນ 2300 ສະຫາຍທີ່ໄດ້ຜ່ານການຄັດເລືອກ ແລະ ໄດ້ຮັບຄວາມໄວ້ເນື້ອເຊື່ອໃຈຈາກ ສະມາຊິກພັກກອມມູນິດຈີນ ຈຳນວນ 95 ລ້ານກວ່າສະຫາຍໃນທົ່ວປະເທດ ເຂົ້າຮ່ວມກອງປະຊຸມດັ່ງກ່າວ ເພື່ອພ້ອມກັນຄົ້ນຄວ້າປຶກສາຫາລື ແລະ ຮັບ ຮອງເອົາບັນຫາທີ່ສຳຄັນຂອງພັກ ແລະ ຂອງຊາດ, ກໍານົດທິດທາງແຜນການໃນຕໍ່ໜ້າ, ລົງຄະແນນເລືອກເອົາຄະນະບໍລິຫານງານສູນກາງພັກຊຸດໃຫມ່ ແລະ ບັນດາການນຳຂອງອົງຈັກການຈັດຕັ້ງທີ່ສຳຄັນຂອງພັກກອມມູນິດຈີນ. ປັດຈຸບັນ, ສະມາຊິກພັກ, ພະນັກງານ, ທະຫານ, ຕໍາຫລວດ, ຊາວໜຸ່ມ, ເຍົາວະຊົນ ແລະ ປວງຊົນຊາວຈີນທຸກທົ່ວໜ້າ ພວມພ້ອມພາກັນສ້າງຂະບວນການ, ແຂ່ງຂັນກັນສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 20 ຢ່າງເປັນຂະບວນຟົດຟື້ນ.
ກອງປະຊຸມຄັ້ງນີ້ຈະຈັດຂຶ້ນໃນທ່າມກາງບັນຍາກາດທີ່ ສປ ຈີນ ຍາດໄດ້ຜົນສໍາເລັດຫລາຍຢ່າງໃນການພັດທະນາເສດຖະກິດ-ສັງຄົມ, ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊົນໄດ້ຮັບການປັບປຸງໃຫ້ດີຂຶ້ນເລື້ອຍໆ, ສັງຄົມມີຄວາມສະຫງົບປອດໄພ, ປະຊາຊົນບັນດາເຜົ່າມີຄວາມສາມັກຄີປອງດອງ, ພາລະບົດບາດຂອງ ສປ ຈີນ ໄດ້ຮັບການຍົກສູງຢູ່ໃນເວທີພາກພື້ນ ແລະ ສາກົນ, ກາຍເປັນປະເທດທີ່ມີຄວາມກ້າວໜ້າຢູ່ໃນໂລກທາງດ້ານເສດຖະກິດ, ວິທະຍາສາດ-ເຕັກໂນໂລຊີ, ການທະຫານ ແລະ ອື່ນໆ. ຜົນສໍາເລັດດັ່ງກ່າວແມ່ນບໍ່ເຄີຍມີມາກ່ອນໃນຮອບຫລາຍຮ້ອຍຫລາຍພັນປີ. ພ້ອມນັ້ນ, ກອງປະຊຸມໃຫຍ່ຄັ້ງທີ 20 ຂອງພັກກອມມູນິດຈີນ ຈະໄຂຂຶ້ນໃນໄລຍະທີ່ພັກກອມມູນິດຈີນນຳພາປວງຊົນທັງຊາດ ກ້າວເຂົ້າສູ່ການສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ ແລະ ມຸ່ງໜ້າສູ່ເປົ້າໝາຍສູ້ຊົນຄົບຮອບ 100 ປີເຫດການທີສອງ ເພື່ອສ້າງ ສປ ຈີນ ໃຫ້ກາຍເປັນປະເທດຮັ່ງມີເຂັ້ມແຂງ, ມີປະຊາທິປະໄຕ ແລະ ສີວິໄລ, ສັງຄົມມີຄວາມປອງດອງ ແລະ ເປັນປະເທດທີ່ມີຄວາມທັນສະໄໝໃນໂອກາດສະຖາປະນາ ສປ ຈີນ ຄົບຮອບ 100 ປີ ໃນປີ 2049. ຄຽງຄູ່ກັນນັ້ນ, ກໍເປັນຊ່ວງໄລຍະທີ່ ສປ ຈີນ ປະເຊີນກັບຂໍ້ຫຍຸ້ງຍາກຕ່າງໆ ຍ້ອນຜົນກະທົບຈາກການລະບາດຂອງພະຍາດໂຄວິດ-19 ແລະ ສະພາບແວດລ້ອມພາຍນອກທີ່ສືບຕໍ່ຜັນແປໄປຢ່າງສະຫລັບຊັບຊ້ອນ, ອິດທິກໍາລັງປໍລະປັກສືບຕໍ່ປິດລ້ອມ ແລະ ຈຳກັດການຂະຫຍາຍຕົວຂອງ ສປ ຈີນໃນທຸກຮູບແບບ, ຊຶ່ງຮຽກຮ້ອງໃຫ້ພັກກອມ ມູນິດຈີນ ສືບຕໍ່ຍົກສູງສະຕິລະວັງຕົວ, ຍົກສູງບົດບາດຊີ້ນຳ-ນຳພາຂອງພັກ, ເຊີດຊູຄວາມສາມັກຄີພາຍໃນ ແລະ ພາຍນອກ.
ເຖິງຢ່າງໃດກໍຕາມ, ບົດຮຽນທາງດ້ານທິດສະດີ ແລະ ພຶດຕິກໍາທີ່ອຸດົມສົມບູນຂອງພັກກອມມູນິດຈີນ ສົມທົບກັບຜົນສຳເລັດທີ່ຍາດມາໄດ້ໃນໄລຍະ 100 ກວ່າປີຜ່ານມາ, ຈະເປັນປັດໃຈອັນສໍາຄັນເຮັດໃຫ້ພັກກອມມູນິດຈີນ ສືບຕໍ່ເດີນໜ້າໂດຍບໍ່ຫວັ່ນໄຫວກັບສິ່ງທ້າທາຍ ແລະ ພາຍຸລົມແດງໃດໆ. ນັບແຕ່ພັກກອມມູນິດຈີນໄດ້ຮັບການສ້າງຕັ້ງຂຶ້ນໃນປີ 1921 ເປັນຕົ້ນມາ, ພັກກອມມູນິດຈີນໄດ້ຖືເອົາການສະແຫວງຫາຄວາມສຸກຂອງປະຊາຊົນ ແລະ ການຟື້ນຟູຄວາມຈະເລີນຮຸ່ງເຮືອງຄືນໃໝ່ຂອງປະຊາຊາດຈີນເປັນອຸດົມການແຕ່ຫົວທີ ແລະ ເປັນພາລະກຳຂອງຕົນຢ່າງສະເໝີຕົ້ນສະເໝີປາຍ, ໄດ້ຍຶດໝັ້ນອຸດົມການລັດທິກອມມູນິດ ແລະ ຄວາມເຊື່ອຖືສັງຄົມນິຍົມຢ່າງສະເໝີຕົ້ນສະເໝີປາຍ, ສາມັກຄີ ແລະ ນໍາພາປະຊາຊົນບັນດາເຜົ່າໃນທົ່ວປະເທດບຸກບືນສູ້ຊົນເຮັດສຳເລັດພາລະກິດປົດປ່ອຍຊາດ, ນໍາພາປະເທດຊາດກ້າວຂຶ້ນສູ່ຄວາມມັ່ງຄັ່ງເຂັ້ມແຂງ ປະຊາຊົນມີຄວາມສຸກ, ເຊິ່ງເປັນວິລະກຳທາງປະຫວັດສາດທີ່ສະຫງ່າລາສີທີ່ສຸດໃນປະຫວັດສາດຂອງປະຊາຊາດຈີນ ໃນໄລຍະຫລາຍພັນປີ. ອັນພົ້ນເດັ່ນແມ່ນພັກກອມມູນິດຈີນ ໄດ້ນໍາພາປວງຊົນທັງຊາດສູ້ຊົນເຮັດສຳເລັດເປົ້າຫມາຍ 100 ປີ ເຫດການທີໜຶ່ງ ໃນການສ້າງລະບອບສັງຄົມນິຍົມອີ່ມໜໍາສໍາລານຢ່າງຮອບດ້ານ, ຄວາມທຸກຍາກໄດ້ຮັບການລົບລ້າງໂດຍເດັດຖານໃນຂອບເຂດທົ່ວປະເທດໃນໂອກາດສະເຫລີມສະຫລອງວັນສ້າງຕັ້ງພັກກອມມູນິດຈີນຄົບຮອບ 100 ປີໃນເດືອນກໍລະກົດປີ 2021 ຜ່ານມາ.
ຜົນສໍາເລັດທີ່ພັກ, ລັດຖະບານ ແລະ ປະຊາຊົນຈີນຍາດມາໄດ້ນັ້ນ ສະແດງໃຫ້ເຫັນຢ່າງຈະແຈ້ງວ່າພາຍໃຕ້ການຊີ້ນໍາ-ນໍາພາ ຂອງພັກກອມມູນິດຈີນທີ່ສະຫລາດສ່ອງໃສ ສົມທົບກັບຄວາມເສຍສະຫລະ ແລະ ຄວາມເປັນແບບຢ່າງຢືນຢູ່ແຖວໜ້າຂອງທຸກໜ້າທີ່ວຽກງານຂອງສະມາຊິກພັກ-ພະນັກງານ, ເຮັດໃຫ້ພັກກອມມູນິດຈີນສາມາດຜ່ານຜ່າການທົດສອບຈາກພາຍຸລົມແດງ, ບໍ່ຫວັ່ນໄຫວຕໍ່ອຸປະສັກ ແລະ ສິ່ງທ້າທາຍນາໆປະການ, ນໍາພາປະຊາຊົນຈີນບັນດາເຜົ່າລຸກຂຶ້ນຕໍ່ສູ້ກູ້ຊາດ, ປົກປັກຮັກສາ ແລະ ປົວແປງລະບອບໃຫມ່ ກ້າວສູ່ຄວາມຈະເລີນເຂັ້ມແຂງຢ່າງບໍ່ຢຸດຢັ້ງ.
ປັດໃຈ ແລະ ສາຍເຫດທີ່ພາໃຫ້ພັກກອມມູນິດຈີນປະສົບຜົນສຳເລັດມີຫລາຍຢ່າງ. ໃນນັ້ນ, ການຍຶດໝັ້ນການນຳພາຂອງພັກ, ຍຶດໝັ້ນຖືປະຊາຊົນສຳຄັນກວ່າໝູ່, ຍຶດໝັ້ນການປະດິດສ້າງໃໝ່ໃນດ້ານທິດສະດີ, ຍຶດໝັ້ນຄວາມເປັນເອກະລາດເປັນເຈົ້າຕົນເອງ, ຍຶດໝັ້ນເສັ້ນທາງຈີນ, ຍຶດໝັ້ນໃນການຫ່ວງໃຍຊາຕາກຳຂອງໂລກ, ຍຶດໝັ້ນການບຸກເບີກປະດິດສ້າງໃໝ່, ຍຶດໝັ້ນໃນການກ້າຕໍ່ສູ້, ຍຶດໝັ້ນແນວໂຮມເອກະພາບ ແລະ ຍຶດໝັ້ນການປະຕິວັດໂດຍຕົນເອງ ເປັນປັດໃຈສຳຄັນຕັດສິນຜົນສຳເລັດ ໃນການຊີ້ນຳ-ນຳພາຂອງພັກກອມມູນິດຈີນຕະ ຫລອດໄລຍະ 101 ປີທີ່ຜ່ານມາ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ, ບໍ່ສະເພາະແຕ່ມີຄວາມຫມາຍຄວາມສຳຄັນຕັດສິນຊີ້ຂາດອະນາຄົດ ແລະ ໂຊກຊະຕາຂອງປະຊາຊົນຈີນ, ແຕ່ຍັງມີຄວາມຫມາຍຄວາມສໍາຄັນແກ່ປະເທດເພື່ອນມິດ ແລະ ປະເທດ ທີ່ມີອຸດົມການດຽວກັນກັບ ສປ ຈີນ ໂດຍສະເພາະແມ່ນ ສປປ ລາວ ທີ່ເປັນປະເທດບ້ານໃກ້ເຮືອນຄຽງ, ມີອຸດົມການສັງຄົມນິຍົມເຊັນດຽວກັນກັບ ສປ ຈີນ ແລະ ຍັງເປັນປະເທດຄູ່ຮ່ວມຊະຕາກໍາທີ່ມີການພົວພັນກັນຢ່າງສະໜິດແໜ້ນ ແລະ ເລິກເຊິ່ງ, ກອງປະຊຸມຄັ້ງນີ້ຈະເປັນບ່ອນອີງທາງດ້ານທິດສະດີ ແລະ ພຶດຕິກຳທີ່ສຳຄັນໃຫ້ແກ່ ພັກ ແລະ ລັດຖະບານ ສປປ ລາວ ໃນການຄົ້ນຄວ້າວາງແນວທາງນະໂຍບາຍຂອງພັກໃນຕໍ່ໜ້າ, ເພື່ອເຮັດໃຫ້ປະເທດຊາດຮັ່ງມີເຂັ້ມແຂງ, ສັງຄົມມີຄວາມສີວິໄລ, ປະຊາຊົນມີຄວາມຜາສຸກ.(ຄົ້ນຄວ້າຮຽບຮຽງໂດຍ: ໂຄງການຄົ້ນຄວ້າຮ່ວມລາວ-ຈີນ, ສະຖາບັນການຕ່າງປະເທດ)
