ອາທິດຜ່ານມານີ້ ທີ່ຫ້ອງປະຊຸມພະແນກຊັບພະຍາກອນທຳມະຊາດ ແລະສິ່ງແວດລ້ອມ ແຂວງຫຼວງພະບາງ ໄດ້ຈັດງານປະກວດສິ່ງປະດິດຈາກສິ່ງເສດເຫຼືອ ໂດຍເປັນປະທານຂອງ ທ່ານ ຈັນທະວົງ ຜົນນະຈິດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ.
ສິ່ງປະດິດຈາກສິ່ງເສດເຫຼືອ ທີ່ນຳເຂົ້າມາປະກວດໃນຄັ້ງນີ້ມີ ທັງໝົດ 28 ລາຍການ ໂດຍໄດ້ແບ່ງອອກເປັນ 2 ລະດັບຄື: ລະດັບວິທະຍາໄລ ແລະບຸກຄົນທົ່ວໄປມີ 14 ລາຍການ ແລະລະດັບມັດທະຍົມມີ 14 ລາຍການ.
ຜ່ານການນຳສະເໜີສິ່ງປະດິດຂອງຜູ້ເຂົ້າປະກວດທັງ 28 ລາຍການ ແລະການຕັດສິນຂອງຄະນະກຳມະການ, ລະດັບວິທະຍາໄລ ແລະບຸກຄົນທົ່ວໄປ, ທີ 1 ແມ່ນ ຊຸດແຍກຖັງຂີ້ເຫຍື້ອ 4 ສີ ທີ່ເຮັດຈາກຕຸກນໍ້າເກົ່າ ຜົນງານຂອງທິມງານຈາກ ໂຮງຮຽນມັດທະຍົມສົມບູນປ່ອງຄຳ, ທີ 2 ກະເປົາໂອວັນຕິນຊ່ອຍ ທີ່ຂ້ອຍຮັກ ໂດຍເຮັດຈາກຖົງໂອວັນຕິນຊອຍເກົ່າ ຜົນງານຂອງ ນາງ ບຸນມີ ພັດທະນາ ບ້ານພູຊ້າງຄຳ, ທີ 3 ຖ່ານອັດແທ່ງຊີວະຈາກໃບໄມ້ແຫ້ງ ຜົນງານຂອງ ນາງ ເພັດສາຄອນ ລະຕະນະມະນີ ບ້ານຂົວທີ 1 ແລະລາງວັນຊົມເຊີຍອີກ 3 ລາງວັນ.
ສ່ວນລະດັບມັດທະຍົມ ທີ 1 ໄກ່ຜູ້ໂອກ ທີ່ເຮັດຈາກໂຟມ ແລະຕຸກນໍ້າເປົ່າຜົນງານຂອງນັກຮຽນໂຮງຮຽນມັດທະຍົມສົມບູນເດັກກຳພ້າ, ທີ 2 ໂຖດອກໄມ້ ເຮັດຈາກເຈ້ຍ, ຕຸກນໍ້າ ແລະໄມ້ ຜົນງານຂອງນັກຮຽນໂຮງຮຽນ SOS, ທີ 3 ເຮືອຊ່ວງ ເຮັດຈາກໄມ້ເສດ ຜົນງານຂອງ ທ້າວ ອານຸສິດ ຈາກໂຮງຮຽນມັດທະຍົມສົມບູນສັນຕິພາບ ແລະລາງວັນຊົມເຊີຍ ອີກ 3 ລາງວັນ. ສຳລັບລາງວັນໄດ້ຈັດເປັນເອກະພາບກັນທັງສອງປະເພດຄື ທີ 1 ໄດ້ຮັບເງິນສົດ 1 ລ້ານກີບ, ທີ 2 ໄດ້ຮັບງເງິນສົດ 7 ແສນກີບ, ທີ 3 ໄດ້ຮັບເງິນສົດ 5 ແສນກີບ ແລະລາງວັນຊົມເຊີຍ 2 ແສນກີບ, ເຊິ່ງຜົນງານທີ່ໄດ້ຮັບລາງວັນທີ່ 1 ຈະມີການຈັດວາງສະແດງໂອກາດສະເຫຼີມສະຫຼອງ ວັນສິ່ງແວດລ້ອມໂລກ ທີ່ຈະມາເຖິງນີ້.
