ກອງປະຊຸມປະກອບຄຳເຫັນໃສ່ ຮ່າງມະຕິວ່າດ້ວຍການກວດກາ ແລະ ຕ້ານການສໍ້ລາດບັງຫລວງ ແລະ ຮ່າງມະຕິ, ຄູ່ມືກ່ຽວກັບການເຄື່ອນໄຫວວຽກງານສາຍດ່ວນ 156 ຂອງສະພາແຫ່ງຊາດ ຈັດຂຶ້ນໃນວັນທີ 30 ສິງຫາ-1 ກັນຍາ 2024 ຢູ່ແຂວງວຽງຈັນ ໂດຍການເປັນປະທານຂອງ ທ່ານ ຄໍາໃບ ດໍາລັດ ຮອງປະທານສະພາແຫ່ງ ຊາດ.
ທ່ານ ຄໍາໃບ ດໍາລັດ ໄດ້ມີຄໍາເຫັນວ່າ: ວຽກງານກວດກາ ເປັນວຽກງານທີ່ມີຄວາມສໍາຄັນ, ເປັນສິ່ງຕັດສິນຜົນສໍາເລັດ ແລະ ປະສິດທິຜົນຂອງວຽກງານ ເຊິ່ງພັກໄດ້ກຳ ນົດວ່າ “ຖ້າບໍ່ມີການກວດກາ ກໍໝາຍຄວາມວ່າບໍ່ມີການນໍາພາ’’; ການນໍາພາ ແລະ ການປະຕິບັດວຽກງານກວດການັ້ນ, ນອກຈາກມີກົດໝາຍທີ່ກ່ຽວຂ້ອງກຳນົດດ້ານຫລັກການລວມແລ້ວ, ມີຄວາມຈຳເປັນຕ້ອງໄດ້ຜັນຂະຫຍາຍເປັນນິຕິກຳໃຕ້ກົດ ໝາຍ ເພື່ອກຳນົດບັນດາຫລັກການ, ຂັ້ນຕອນ, ຄວາມຮັບຜິດຊອບໃນການເຄື່ອນ ໄຫວວຽກງານຕິດຕາມ, ກວດກາຂອງຄະນະກວດກາ ຕາມແຜນການປົກກະຕິ ແລະ ກວດກາສະເພາະກິດ ເພື່ອເປັນບ່ອນອີງໃນການເຄື່ອນໄຫວດໍາເນີນການກວດກາ, ຮັບປະກັນໃຫ້ການເຄື່ອນໄຫວຖືກຕ້ອງຕາມກົດໝາຍ ທັງຮັບປະກັນຄວາມໂປ່ງໃສ, ເຂັ້ມແຂງໃນການປະຕິບັດວຽກງານຂອງທຸກພາກສ່ວນ ສາມາດກວດກາໄດ້ ແນໃສ່ປະກອບສ່ວນແກ້ໄຂປາກົດການຫຍໍ້ທໍ້, ຕ້ານການສໍ້ລາດບັງຫລວງ ແລະ ການລະ ເມີດກົດໝາຍ, ພ້ອມທັງແກ້ໄຂຜົນຂອງການກວດກາໃຫ້ເຂັ້ມງວດ ແລະ ທັນເວລາ.
ສຳລັບວຽກງານສາຍດ່ວນຂອງສະພາແຫ່ງຊາດ ກໍມີຄວາມສໍາຄັນຫລາຍ ໂດຍສະເພາະການປະຕິບັດພາລະບົດບາດເປັນອົງການຕົວແທນແຫ່ງສິດ ແລະ ຜົນປະ ໂຫຍດຂອງປະຊາຊົນລາວບັນດາເຜົ່າ ເຊິ່ງຕ້ອງໄດ້ເກັບກໍາ ແລະ ຮັບຟັງຄວາມຄິດເຫັນຂອງປະຊາຊົນ, ການຮັບຄໍາສະເໜີຂອງປະຊາຊົນຜ່ານໂທລະສັບສາຍດ່ວນ ແມ່ນການສ່ອງແສງໃຫ້ເຫັນສະພາບດ້ານຜົນສໍາເລັດໃນການເຄື່ອນໄຫວປະຕິບັດໜ້າທີ່ຂອງສະພາແຫ່ງຊາດ ເປັນຕົ້ນ ການປະຕິບັດກົດໝາຍ, ນິຕິກໍາໃຕ້ກົດໝາຍ ທັງຢູ່ສູນກາງ ແລະ ທ້ອງຖິ່ນໃນຂອບເຂດທົ່ວປະເທດ. ພ້ອມກັນນັ້ນ, ກໍເຫັນໄດ້ເຖິງບັນຫາຂໍ້ຄົງຄ້າງທີ່ຕ້ອງໄດ້ຄົ້ນຄວ້າ, ພິຈາລະນາ ເພື່ອເປັນຂໍ້ມູນໃຫ້ແກ່ສະພາແຫ່ງ ຊາດ ໃນຖານະທີ່ເປັນອົງການນິຕິບັນຍັດ ມີພາລະບົດບາດໃນການພິຈາລະນາຮັບ ຮອງເອົາການສ້າງ ແລະ ປັບປຸງກົດໝາຍ ເພື່ອກໍານົດມາດຕະການແກ້ໄຂບັນຫາທີ່ເກີດຂຶ້ນໄດ້ທັນເວລາ.
ນອກນັ້ນ, ບັນດາຄໍາສະເໜີຂອງປະຊາຊົນ ຜ່ານໂທລະສັບສາຍດ່ວນທີ່ສົ່ງເຖິງສະພາແຫ່ງຊາດ ເປັນຂໍ້ມູນທີ່ສຳຄັນໃຫ້ແກ່ສະພາແຫ່ງຊາດ ເພື່ອຄົ້ນຄວ້າ, ກໍານົດເປັນຄໍາຊັກຖາມມອບໃຫ້ກະຊວງ, ອົງການກ່ຽວຂ້ອງມາຊີ້ແຈງບັນຫາດັ່ງກ່າວຕໍ່ກອງປະຊຸມສະໄໝສາມັນຂອງສະພາແຫ່ງຊາດແຕ່ລະຄັ້ງ. ສະນັ້ນ, ການຮ່າງນິຕິກໍາ ເພື່ອກໍານົດວິທີການແກ້ໄຂບັນຫາທີ່ຮີບດ່ວນ, ເຄັ່ງຮ້ອນຂອງສັງຄົມ ໃຫ້ໄດ້ຮັບການປັບ ປຸງແກ້ໄຂໄດ້ທັນເວລາ.
ໂອກາດນີ້, ຜູ້ເຂົ້າຮ່ວມໄດ້ຮັບຟັງການສະເໜີບົດກ່ຽວກັບຄວາມຈໍາເປັນໃນການຮ່າງມະຕິວ່າດ້ວຍການກວດກາ ແລະ ຕ້ານການສໍ້ລາດບັງຫລວງຂອງສະພາແຫ່ງ ຊາດ ແລະ ຜ່ານຮ່າງມະຕິດັ່ງກ່າວ, ລາຍງານໂດຍຫຍໍ້ການ ຈັດຕັ້ງປະຕິບັດວຽກງານສາຍດ່ວນໃນໄລຍະຜ່ານມາ ແລະ ຄວາມຈໍາເປັນໃນການຮ່າງມະຕິ ແລະ ຄູ່ມືການເຄື່ອນໄຫວວຽກງານສາຍດ່ວນຂອງສະພາແຫ່ງຊາດ ແລະ ຜ່ານຮ່າງມະຕິ ແລະ ຄູ່ມືດັ່ງກ່າວ. ພ້ອມນີ້, ຜູ້ແທນກອງປະຊຸມ ໄດ້ສຸມສະຕິປັນຍາຄົ້ນຄວ້າ, ປະກອບຄໍາຄິດຄຳເຫັນຢ່າງມີຈຸດສຸມ, ກະທັດຮັດ, ເລິກເຊິ່ງ ແລະ ຕິດແທດກັບຕົວຈິງ ເພື່ອເປັນຂໍ້ມູນໃຫ້ແກ່ຄະນະຮັບ ຜິດຊອບຮ່າງນິຕິກຳດັ່ງກ່າວ ນຳໄປຄົ້ນຄວ້າ, ປັບປຸງ ກະກຽມນໍາເຂົ້າລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ພິຈາລະນາ ແລະ ຮັບ ຮອງ.
ຂ່າວ: ສອນສັກ ວັນວິໄຊ
