ພິທີປະກາດການແຕ່ງຕັ້ງຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງແຂວງ ສາລະວັນ ຈັດຂຶ້ນໃນວັນທີ 18 ກັນຍາ 2024 ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກ ລັດຖະມົນຕີ, ລັດຖະມົນຕີກະຊວງປ້ອງກັນປະເທດ.
ໃນພິທີ, ສະຫາຍ ພູຂົງ ພິລາເພັດ ຫົວໜ້າກົມກໍ່ສ້າງພັກ, ຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການຍົກຍ້າຍພະນັກງານ ໄປຮັບໜ້າທີ່ໃໝ່ຢູ່ແຂວງ ສາລະວັນ, ຄຳສັ່ງຂອງນາຍົກລັດຖະມົນຕີ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ໂດຍໄດ້ຍົກຍ້າຍ ສະຫາຍ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄປຮັບໜ້າທີ່ໃໝ່ຢູ່ແຂວງສາລະວັນ ແລະ ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ສະຫາຍ ປະເດີມພອນ ສົນທະນີ ເປັນກຳມະການບໍລິຫານງານພັກແຂວງ, ກຳມະການຄະນະປະຈຳພັກແຂວງ, ເປັນຮອງເລຂາຄະນະບໍລິຫານງານພັກແຂວງ.
ພ້ອມນີ້, ສະຫາຍ ນາງ ບຸນທະວີ ດວງລາສີ ຮອງເລຂາຄະນະບໍລິຫານງານພັກແຂວງ ຜູ້ຊີ້ນໍາວຽກງານພັກ-ພະນັກງານ ແຂວງສາລະວັນ ຍັງໄດ້ຜ່ານມະຕິຕົກລົງຂອງຄະນະປະຈໍາສະພາປະຊົນຊົນແຂວງສາລະວັນ ວ່າດ້ວຍການຮັບຮອງເອົາການແຕ່ງຕັ້ງ ສະຫາຍ ປະເດີມພອນ ສົນທະນີ ເປັນຮອງເຈົ້າແຂວງສາລະວັນ.
ໃນໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນໂອ້ລົມວ່າ: ການປະກາດແຕ່ງຕັ້ງໃນຄັ້ງນີ້ ແມ່ນບາດກ້າວສຳຄັນ ໃນການແຕ່ງຕັ້ງພະນັກງານການນຳຂັ້ນຍຸດທະສາດ ເຊິ່ງ ສະຫາຍ ເປັນຜູ້ໜຶ່ງທີ່ມີຄວາມຮູ້, ຄວາມສາມາດ ໃນການນຳພາ-ຊີ້ນໍາວຽກງານປະກັນສັງຄົມ, ວຽກງານກໍ່ສ້າງພັກ-ພະນັກງານ ແລະ ວຽກງານການພົວຮ່ວມມືກັບຕ່າງປະເທດ ຂົງເຂດການເກັບກູ້ລະເບີດບໍ່ທັນແຕກ ເພື່ອຊ່ວຍແຂວງສາລະວັນ ວາງແຜນພັດທະນາເສດຖະກິດ-ສັງຄົມຂອງແຂວງ ໃນການຂຸດຄົ້ນທ່າແຮງບົ່ມຊ້ອນທີ່ມີຢູ່, ດຶງດູດເອົາການລົງທຶນທັງພາຍໃນ ແລະ ຕ່າງປະເທດ ເພື່ອສ້າງແຫລ່ງລາຍຮັບໃຫ້ເພີ່ມຂຶ້ນ.
ພ້ອມນີ້, ສະຫາຍ ຍັງໄດ້ຮຽກຮ້ອງມາຍັງບັນດາສະຫາຍໃນຄະນະບໍລິຫານງານພັກແຂວງ ແລະ ພະນັກງານຫລັກແຫລ່ງໃຫ້ ການຊ່ວຍເຫລືອ ສະຫາຍ ຮອງເລຂາຄະນະບໍລິຫານງານພັກແຂວງ ຮອງເຈົ້າແຂວງຜູ້ໃໝ່ ບົນພື້ນຖານເຮັດວຽກເປັນໝູ່ຄະນະ, ແບ່ງໃຫ້ບຸກຄົນຮັບຜິດຊອບ, ມີຄວາມເປັນເອກະພາບພາຍໃນຢ່າງໜັກແໜ້ນ ພ້ອມກັນພັດທະນາແຂວງສາລະວັນ ໃຫ້ຈະເລີນກ້າວໜ້າ ແລະ ເຕີບໃຫຍ່ເຂັ້ມແຂງ.
