ປະກາດຍົກຍ້າຍການນຳຂັ້ນສູງແຂວງໄຊສົມບູນ

ພິທີປະກາດຍົກຍ້າຍການນຳຂັ້ນສູງແຂວງໄຊສົມບູນໄປຮັບໜ້າທີ່ໃໝ່ຢູ່ສູນກາງ ໄດ້ຈັດຂຶ້ນໃນວັນທີ 19 ກໍລະກົດ 2024 ທີ່ຫ້ອງວ່າການແຂວງ ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະ ເທດ, ມີສະຫາຍ ພອຍຄຳ ຮຸ່ງບຸນຍວງ ເລຂາພັກແຂວງ ເຈົ້າ ແຂວງໄຊສົມບູນ, ມີຮອງເລຂາພັກແຂວງ, ບັນດາການນຳແຂວງ, ເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ສະຫາຍ ວຽນທອງ ສິງຄຳພັນ ຫົວໜ້າຫ້ອງການຄະນະຈັດຕັ້ງສູນກາງພັກໄດ້ຂຶ້ນຜ່ານຄຳສັ່ງສະ ບັບເລກທີ 156/ຄລສພ, ລົງວັນທີ 2 ກໍລະກົດ 2024 ວ່າດ້ວຍການຍົກຍ້າຍພະນັກງານການນຳໄປຮັບໜ້າທີ່ໃໝ່ ຊຶ່ງໄດ້ຍົກຍ້າຍ ສະຫາຍ ພົຕ ວົງສອນ ອິນປານພິມ ຮອງເລຂາພັກແຂວງໄຊສົມບູນ ໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ. ໃນພິທີໄດ້ຮັບຟັງການລາຍງານຜົນສຳເລັດໃນການນຳພາ-ຊີ້ນຳຈັດຕັ້ງປະຕິບັດໜ້າທີ່ວຽກ ງານ ຕະຫຼອດໄລຍະຜ່ານມາ ຂອງສະຫາຍ ພົຕ ວົງສອນ ອິນປານພິມ ຊຶ່ງໄດ້ຮ່ວມກັບຄະນະບໍລິຫານງານພັກແຂວງ ສະມາຊິກພັກ-ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງ ແລະ ແຜນພັດທະນາເສດຖະກິດ -ສັງຄົມຄັ້ງທີ II ຂອງແຂວງມີຜົນສຳເລັດໃນຫຼາຍດ້ານ ເຮັດໃຫ້ແຂວງໄຊສົມບູນສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ເສດຖະກິດ-ສັງຄົມໄດ້ຮັບການພັດທະນາຢ່າງຕໍ່ເນື່ອງ, ວຽກງານກໍ່ສ້າງພັກ-ພະນັກງານມີບາດກ້າວຂະຫຍາຍຕົວໃໝ່ ແລະ ວຽກງານອື່ນໆໄດ້ຮັບການພັດທະນາດີຂຶ້ນເປັນກ້າວໆ.

ໃນໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດໂອ້ລົມ ພ້ອມທັງເນັ້ນໜັກໃຫ້ຄະນະບໍລິຫານງານພັກແຂວງສືບຕໍ່ນຳພາ-ຊີ້ນຳໃຫ້ແຂວງມີສະຖຽນລະພາບ, ສັງຄົມມີຄວາມສະຫງົບປອດໄພ, ເສດຖະ ກິດໄດ້ຮັບການພັດທະນາ, ສືບຕໍ່ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນແໜ້ນ ໜາ, ພ້ອມນີ້ການກໍ່ສ້າງພະນັກງານຕ້ອງໃຫ້ມີ 3 ຮຸ່ນ, ມີເພດ, ມີເຜົ່າ ແນໃສ່ເຮັດໃຫ້ການພັດທະນາແຂວງໄຊສົມບູນ ໃຫ້ນັບມື້ດີຂຶ້ນເປັນກ້າວໆ.

ຂ່າວ-ພາບ: ແສງອາລຸນ ມະນີວັນ