ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປະກາດບ້ານນາເພີຍ ເປັນບ້ານໂພສະນາການຕົວແບບຂອງແຂວງວຽງຈັນ
ພິທີປະກາດຮັບຮອງບ້ານນາເພີຍ ເມືອງທຸລະຄົມ ເປັນບ້ານໂພສະນາການຕົວແບບຂອງແຂວງວຽງຈັນ ຈັດຂຶ້ນໃນຕອນເຊົ້າວັນທີ 1 ມີນາ 2024 ຢູ່ສະໂມສອນຫ້ອງວ່າການເມືອງ, ໂດຍການເປັນກຽດເຂົ້າຮ່ວມ ແລະ ເປັນປະທານລະຫວ່າງ ທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ທ່ານ ດຣ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ, ພ້ອມດ້ວຍກອງເລຂາຄະນະກໍາມະການແຫ່ງຊາດດ້ານໂພສະນາການ, ອົງການປົກຄອງບ້ານ, ແລະ ພາກສ່ວນກ່ຽວຂ້ອງ.
ທ່ານ ກິຄໍາ ວົງໄຊ ຮອງເຈົ້າເມືອງທຸລະຄົມ ກ່າວໃນເປີດພິທີວ່າ: ການຈັດພິທີປະກາດບ້ານນາເພີຍ ເປັນບ້ານໂພສະນາການຕົວແບບຂອງແຂວງວຽງຈັນ ຂຶ້ນຢູ່ເມືອງທຸລະຄົມເທື່ອນີ້ ມີຄວາມໝາຍຄວາມສໍາຄັນຫລາຍ, ນັບແຕ່ປີ 2019 ເປັນຕົ້ນມາ ທີ່ອົງການແຄຣິຕັດສ໌ ລຸກຊໍາບວກ ໄດ້ໃຫ້ການສະໜັບສະໜູນ ແລະ ເຄື່ອນໄຫວຈັດຕັ້ງປະຕິບັດໂຄງການ ຢູ່ເມືອງທຸລະຄົມ, ຄະນະພັກ-ອົງການປົກຄອງເມືອງ ກໍ່ຄືຫ້ອງການສາທາລະນະສຸກເມືອງ ຕ່າງກໍ່ມີຄວາມພາກພູມໃຈ, ຮ່ວມມື ແລະ ອຳນວຍຄວາມສະດວກໃຫ້ແກ່ວຽກງານດັ່ງກ່າວ, ໂດຍໄດ້ແຕ່ງຕັ້ງຄະນະກໍາມະການ ແລະ ຜູ້ປະສານງານຂັ້ນເມືອງ, ພົວພັນປະສານສົມທົບກັບຄະນະຊີ້ນໍາໂຄງການຂັ້ນສູນກາງ, ຂັ້ນແຂວງ, ຈັດຝຶກອົບຮົມ ແລະ ລົງໄປພົບປະໂອ້ລົົມການຈັດຕັ້ງ-ປະຊາຊົນບ້ານເປົ້າໝາຍ ປະກອບມີ 13 ບ້ານ ເພື່ອຈຸດປະສົງແກ້ໄຂບນຫາການຂາດສານອາຫານ, ປັບປຸງສຸຂະພາບ, ໂພສະນາການຂອງແມ່ ແລະ ເດັກນ້ອຍ ໂດຍການຈັດຕັ້ງປະຕິບັດຍຸດທະສາດແບບໜຶ່ງດຽວ, ຫຼາຍຂະແໜງການມີສ່ວນຮ່ວມ ເຊັ່ນ: ຂະແໜງສາທາລະນະສຸກ, ສຶກສາທິການ ແລະ ກິລາ, ກະສິກໍາ ແລະ ປ່າໄມ້, ແຜນການ ແລະ ການລົງທຶນ, ອົງການຈັດຕັ້ງມະຫາຊົນ ແລະ ອື່ນໆ.
ທ່ານ ນາງ ວິໄລວັນ ລາດຊະວົົງ ນາຍບ້ານໆນາເພີຍ ກ່າວວ່າ: ໂດຍລວມແລ້ວ ປະຊາຊົນມີຄວາມພ້ອມພຽງສາມັກຄີ, ດີອົກດີໃຈ ທີ່ຍາມໃດການນໍາຂັ້ນເທິງ ແລະ ໂຄງການ ໄດ້ເອົາໃຈໃສ່ຊີ້ນໍາ-ນໍາພາຈັດຕັ້ງປະຕິບັດວຽກງານໂພສະນາການ ຈົນສາມາດປະກາດຮັບຮອງເປັນບ້ານໂພສະນາການຕົວແບບຂອງແຂວງ.
ຕອນທ້າຍ ຜູ້ເຂົ້າຮ່ວມພິທີໃນງານໄດ້ທ່ຽວຊົມຜົນຜະລິດກະສິກໍາ, ຫັດຖະກໍາ ແລະ ສິນຄ້າອື່ນໆຂອງຊາວບ້ານນາເພີຍທີ່ນໍາມາວາງສະແດງຮັບໃຊ້ງານອີກດ້ວຍ.
ຂ່າວ: ຄໍາພອນ ຈັນທະວົງສັກ.
ພາບ: ຫລ້າທໍ່ ປາຈ້າທໍ່