ຕອນເຊົ້າວັນທີ 01 ທັນວາ 2022 ນີ້, ໂຮງງານຊີມັງລາວວັງວຽງຫຼັງ1 ໄດ້ຈັດພິທີປະກາດແຈ້ງການຂອງລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ວ່າດ້ວຍຢຸດຕິການດໍາເນີນທຸລະກິດຜະລິດ-ຈໍາໜ່າຍຊີມັງ ຂອງໂຮງງານຊີມັງລາວວັງວຽງຫຼັງ1ຢ່າງເປັນທາງການ, ໂດຍການເຂົ້າຮ່ວມເປັນປະທານ ຂອງ ພັນເອກ ວັນທອງ ສິດທິກຸນ ຜູ້ອໍານວຍການໃຫຍ່ ລັດວິສາຫະກິດ ພັດທະນາກະສິກໍາ, ອຸດສາຫະກໍາ ແລະ ບໍລິການ ຂາເຂົ້າ-ຂາອອກ, ມີ ພັນເອກ ຕຸ່ມຄໍາ ພົນເສນາ ຮອງຫົວໜ້າກົມເສດຖະກິດ ກະຊວງປ້ອງກັນປະເທດ, ມີ ທ່ານນາງ ແສງອາລຸນ ອິນມີໄຊ ຮອງຫົວໜ້າກົມປະຕິຮູບ ກະຊວງການເງິນ, ພ້ອມດ້ວຍຄະນະນໍາລັດວິສາຫະກິດ ພກອ ແລະ ພະນັກງານ – ກໍາມະກອນທົ່ວໂຮງງານເຂົ້າຮ່ວມ.
ໂຮງງານຊີມັງລາວວັງວຽງຫຼັງ1 ແມ່ນຫົວໜ່ວຍທຸລະກິດໜຶ່ງ ຫຼື ບໍລິສັດລູກຂຶ້ນກັບ ລັດວິສາຫະກິດ ພ.ກ.ອ ຢູ່ພາຍໃຕ້ການຊີ້ນໍາ – ນໍາພາ ໂດຍກົງ, ຮອບດ້ານຂອງກະຊວງປ້ອງກັນປະເທດ ກໍ່ຄືລັດຖະບານ, ພາຍຫຼັງໄດ້ຮັບການສໍາຫຼວດ ແລະ ສ້າງຕັ້ງໃນປີ 1989 ໂດຍທຶນຂອງລັດຖະບານ 100% ໃນມູນຄ່າ 13 ລ້ານກ່ວາ ດອນລາສະຫະລັດ ແລະ ເລີ່ມດໍາເນີນການຜະລິດ-ຈໍາໜ່າຍ ໃນປີ 1994 ເປັນຕົ້ນມາ ໄດ້ສ້າງລາຍຮັບໃຫ້ແກ່ລັດຖະບານ ກໍ່ຄືກະຊວງປ້ອງກັນປະເທດ, ໄດ້ປະກອບສ່ວນຢ່າງໃຫຍ່ຫຼວງໃນການສ້າງສາ ແລະ ພັດທະນາປະເທດຊາດ, ໄດ້ສ້າງວຽກເຮັດງານທໍາໃຫ້ແກ່ປະຊາຊົນອ້ອມຂ້າງ ແລະ ໄດ້ຊ່ວຍເຫຼືອທາງດ້ານວັດຖຸເຂົ້າໃນການພັດທະນາບ້ານ, ໂຮງຮຽນ, ວັດວາອາຮາມ ແລະ ປະກອບສ່ວນຊ່ວຍເຫຼືອຄອບຄົວທຸກຍາກຢ່າງຫຼວງຫຼາຍ ຢູ່ພາຍໃນເມືອງວັງວຽງ ມາໂດຍຕະຫຼອດ. ພາຍຫຼັງໂຮງງານຊີມັງດໍາເນີນທຸລະກິດຜະລິດ-ຈໍາໜ່າຍ ມາເປັນເວລາ 26 ປີ, ມາຮອດທ້າຍປີ 2020 ຈຶ່ງໄດ້ຢຸດຕິການຜະລິດຍ້ອນສະພາບການປ່ຽນແປງຂອງໂລກ, ພາກພື້ນ ແລະ ການເຄື່ອນເໜັງຂອງທຸລະກິດພາຍໃນປະເທດ, ການແຂ່ງຂັນຂອງຄູ່ຮ່ວມທຸລະກິດ ໂດຍສະເພາະຍ້ອນໂຮງງານໄດ້ດໍາເນີນການຜະລິດມາເປັນເວລາຍາວນານເຮັດໃຫ້ເຄື່ອງຈັກການຜະລິດຊຸດໂຊມ ແລະ ເປ່ເພເສຍຫາຍ, ປະສິດທິພາບໃນການຜະລິດຕໍ່າ ຈຶ່ງບໍ່ສາມາດດໍາເນີນການຜະລິດແຂ່ງຂັນກັບໂຮງງານຫຼັງອື່ນໄດ້ ຈຶ່ງເຮັດໃຫ້ເກີດມີຄ່າໃຊ້ຈ່າຍສູງ, ແຕ່ກໍາລັງການຜະລິດຕໍ່າ ຈຶ່ງຂາດດຸນທາງການຄ້າສົມທົບກັບການເກີດມົນລະພິດທາງອາກາດ ຈຶ່ງມີຄວາມຈໍາເປັນຕ້ອງໄດ້ຢຸດຕິການຜະລິດ ຕາມແຈ້ງການຂອງຫ້ອງການສໍານັກງານນາຍົກລັດຖະມົນຕີ ຕາມຂໍ້ຕົກລົງຂອງນາຍົກລັດຖະມົນຕີ ແຫ່ງ ສປປ ລາວ ໂດຍໃຫ້ກະຊວງການເງິນສົມທົບພາກສ່ວນທີ່ກ່ຽວຂ້ອງດໍາເນີນຕາມຂັ້ນຕອນໃນການຍຸບເລີກກິດຈະການຂອງໂຮງງານຊີມັງລາວວັງວຽງຫຼັງ1 ເພື່ອຫັນໄປສູ່ຮູບການອື່ນ ໃນຂອບເຂດການທ່ອງທ່ຽວແບບອະນຸລັກທໍາມະຊາດທີ່ເປັນມິດກັບສິ່ງແວດລ້ອມ ແລະ ການບໍລິການ ໂດຍເຫັນດີໃຫ້ກະຊວງການເງິນຮັບຮອງມູນຄ່າໃນເບື້ອງຕົ້ນ ແລ້ວ ແຕ່ງຕັ້ງຄະນະກໍາມະການສະສາງຊັບສິນທີ່ກວດກາແລ້ວ ເພື່ອປະມູນເປີດກ້ວາງອັນໃດຄວນຮັກສາງໄວ້, ອັນໃດຄວນສະສາງອອກ, ພາຍສໍາເລັດການສະສາງຊັບສິນຕ່າງໆແລ້ວໃຫ້ກະຊວງການເງິນຮັບຮອງເອົາມູນຄ່າຊັບສິນທີ່ຍັງເຫຼືອຕົວຈິງ ຈົດເຂົ້າບັນຊີສັບສິນຂອງລັດ ຕາມກົດໝາຍ ແລະ ລະບຽບການ.
ສ່ວນຈໍານວນເງິນທີ່ໄດ້ຈາກການປະມູນຊັບສິນຂອງໂຮງງານແມ່ນຈະນໍາໄປຈ່າຍເປັນເງິນເດືອນນະໂຍບາຍທີ່ຄ້າງຈ່າຍໃຫ້ກໍາມະກອນ ແລະ ຈ່າຍເປັນເງິນອຸດໜູນໃຫ້ພະນັກງານ-ກໍາມະກອນ 200 ກ່ວາຄົນ ລວມເງິນທັງໝົດ 28 ຕື້ກ່ວາກີບພາຍຫຼັງໂຮງງານໄດ້ຢຸດຕິການຜະລິດ, ສ່ວນຍັງບໍ່ພໍເທົ່າໃດແມ່ນລັດວິສະຫະກິດ ພກອ ຈະສົມທົບກັບພາກສ່ວນທີ່ກ່ຽວຂ້ອງແກ້ໄຂໃຫ້ວ່ອງໄວຕາມຄວາມເໝາະສົມ ແລະ ຖືກຕ້ອງສອດຄ່ອງກັບລະບຽບກົດໝາຍ.
ໂດຍ: ກໍ ແດນດອກກ້ຽງ