ປະກາດລາງວັນ ວັນນະກຳສ້າງສັນສຸດຍອດແຫ່ງອາຊຽນ

ພິທີຖະແຫຼງຂ່າວຜົນການຕັດສິນລາງວັນ ວັນນະກຳສ້າງສັນສຸດຍອດແຫ່ງອາຊຽນ ຫຼື ຊີໄຣ ປະຈຳປີ 2022 ແລະ 2023 , ໄດ້ຈັດຂຶ້ນໃນວັນທີ 22 ສິງຫາຜ່ານມານີ້ທີ່ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ກະຊວງ ຖວທ), ໂດຍມີທ່ານ ນາງ ຈັນເພັດ ຄໍາຟອງ ຫົວໜ້າກົມວັນນະຄະດີ ແລະ ພິມຈໍາໜ່າຍ, ກະຊວງ ຖວທ, ມີ ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ຄະນະກໍາມະການຕັດສິນ, ສິລະປິນສາຂາວັນນະກໍາ, ນັກປະພັນ, ນັກກະວີອາວຸໂສ ແລະ ໜຸ່ມນ້ອຍ ພ້ອມດ້ວຍສະມາຊິກສະມາຄົມນັກປະພັນລາວເຂົ້າຮ່ວມ.

ທ່ານ ສຸບັນ ຫຼວງລາດ ຮອງປະທານ-ເລຂາທິການສະມາຄົມນັກປະພັນລາວ ຫົວໜ້າຄະນະກອງເລຂາຄະນະກຳມະການຕັດ ສິນໄດ້ກ່າວວ່າ: ສໍາລັບກໍານົດການມອບ-ຮັບ ລາງວັນ ຊີໄຣ ປະຈໍາປີ 2022 ແລະ 2023 ຊຶ່ງສະມາຄົມນັກປະພັນລາວໄດ້ປະກາດຮັບຜົນງານການປະພັນປະເພດບົດກະວີ ຊີງລາງວັນຊີໄຣ ມາແຕ່ເດືອນເມສາ 2022 ແລະ ການປະກາດຮັບຜົນງານການປະພັນປະເພດເລື່ອງສັ້ນ ຊີງລາງວັນຊີໄຣ ໃນເດືອນສິງຫາ 2023 ເປັນ ຕົ້ນມາ ແລະ ມີຜົນງານບົດກະວີ ສົ່ງແຂ່ງຂັນກວດສອບຊີງລາງ ວັນ ໃນຮອບສຸດທ້າຍ ທີ່ຖືກຕ້ອງຕາມລະບຽບການ ມີຈໍານວນ 8 ເລື່ອງ ຊຶ່ງບົດກາວີທີ່ໄດ້ທີ1 ແມ່ນເລື່ອງສົ່ງນໍ້າ ສົ່ງປາໂດຍທ່ານ ອອ່ນສີ ປະຊາວົງ ໄດ້ 302 ຄະແນນ ແລະ ຜົນງານບົດເລື່ອງສັ້ນ ທີ່ສົ່ງແຂ່ງຂັນກວດສອບຊີງລາງວັນໃນຮອບສຸດທ້າຍ ທີ່ຖືກຕ້ອງຕາມລະບຽບການ ມີຈໍານວນ 7 ເລື່ອງ ຊຶ່ງບົດເລື່ອງສັ້ນແມ່ນ ເລື່ອງ ຮັກທໍາອິດຂອງອາຈານ ສິມມາ ຂຽນໂດຍ ພູວົງ ພະລາຄອນ ໄດ້ 303 ຄະແນນ ເປັນທີ 1 ຊຶ່ງເນື້ອໃນຂອງແຕ່ລະບົດທີ່ສົ່ງເຂົ້າແຂ່ງຂັ້ນລ້ວນແລ້ວແຕ່ມີຄວາມໝາຍທີ່ລຶກຊຶ້ງ, ການປະ ດິດແຕ່ງມີຄວາມກ້າວໜ້າທັນສະໄໝ, ມີເອກະລັກສ້າງສັນ ການໃຊ້ສໍານວນພາສາທີ່ມ່ວນເກາະກ່າຍກັນ ແລະ ອື່ນໆ.

ຄະນະກຳມະການຕັດສິນໃຫ້ຄະແນນ ແມ່ນບຸກຄົນຊົງຄຸນ ວຸດທິ ມີຄວາມຮູ້ ຄວາມສາມາດທາງດ້ານການປະພັນ, ກຳມະການແຕ່ລະທ່ານ ຕັດສິນໃຫ້ຄະແນນດ້ວຍຕົນເອງ, ໂດຍຍຶດໝັ້ນ ໃນຄວາມບໍລິສຸດ, ຍຸຕິທຳ, ປາສະຈາກອະຄະຕິ ຊຶ່ງໃນການໃຫ້ຄະ ແນນ ປະກອບມີ 7 ມາດຖານຄື: ດ້ານເນື້ອໃນ (ໂດດເດັ່ນ, ເອກະ ລັກ, ສ້າງສັນ), ດ້ານຮູບການປະດິດແຕ່ງ (ກ້າວໜ້າທັນສະໄໝ), ດ້ານຫຼັກການປະພັນ (ຕາມຫຼັກວິຊາການ), ດ້ານຄໍາສັບ ສໍານວນພາສາ, ດ້ານສິລະປະການແຕ່ງ, ດ້ານຄຸນຄ່າວັນນະກຳ (ສ້າງສັນສັງຄົມ) ແລະ ດ້ານບົດບາດຜູ້ປະພັນ (ການຈັດຕັ້ງ/ສັງຄົມ).

ຂ່າວ:ພາບ : ບຸນອູ້ມ