ພິທີປະກາດສ້າງຕັ້ງກອງຮ້ອຍທະຫານຊາຍແດນໝາຍເລກ 545 ທີ່ຂື້ນກັບກອງບັນຊາການທະຫານແຂວງ ອັດຕະປື ໄດ້ຈັດຂື້ນຢ່າງເປັນທາງການ ເມື່ອທ້າຍອາທິດຜ່ານມາ ທີ່ສະໂມສອນກອງບັນຊາການທະຫານແຂວງ, ເປັນກຽດເຂົ້າຮ່ວມມີ ພັນເອກ ບຸນຈັນ ສີຫາວົງ ຮອງປະທານຄະນະກໍາມະການ ປ້ອງກັນຊາດ-ປ້ອງກັນຄວາມສະຫງົບແຂວງ ຫົວໜ້າການທະຫານກອງບັນຊາການທະຫານແຂວງ, ມີ ພັນເອກ ອຸ່ນຄໍາ ສີແຫວນວົງສັກ ຮັກສາການຫົວໜ້າກົມທະຫານຊາຍແດນ ກົມໃຫຍ່ເສນາທິການກອງທັບ, ມີຄະນະພັກ, ຄະນະບັນຊາ, ພ້ອມດ້ວພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີໄດ້ຜ່ານຂໍ້ຕົກລົງຂອງກົມໃຫຍ່ເສນາທິການກອງທັບ ວ່າດ້ວຍການສ້າງຕັ້ງກອງຮ້ອຍທະຫານຊາຍແດນໝາຍເລກ 545 ຢູ່ເມືອງ ພູວົງ ຂຶ້ນກັບກອງບັນຊາການທະຫານແຂວງ ອັດຕະປື,ພ້ອມດຽວກັນນັ້ນ ໃນພິທີຍັງໄດ້ຜ່ານມະຕິຕົກລົງຂອງກອງບັນຊາການທະຫານແຂວງ ແຕ່ງຕັ້ງ ພັນຕີ ສົມໄຊ ສີລາເພັດ ເປັນຫົວໜ້າການທະຫານ ທັງເປັນຮອງເລຂາໜ່ວຍພັກ, ຮ້ອຍເອກ ບຸນດິດ ວົງຄໍາແດງ ເປັນຫົວໜ້າການເມືອງ ທັງເປັນເລຂາໜ່ວຍພັກ, ຮ້ອຍເອກ ຊາຍນ້ອຍ ໄຊຍະສິດ ເປັນຮອງຫົວໜ້າການເມືອງ ທັງເປັນກໍາມະການໜ່ວຍພັກ, ຮ້ອຍເອກ ໂອໄດ ພົງສັກດາ ເປັນຮອງຫົວໜ້າການທະຫານ, ຮ້ອຍໂທ ເທັກອໍາພອນ ບຸດດາວົງ ຮອງກອງຮ້ອຍ ຮັບຜິດຊອບພະລາ – ເຕັກນິກ ແລະ ຍັງໄດ້ແຕ່ງຕັ້ງບັນດາ ໝວດ, ໝູ່ ແລະ ຜູ້ຮັບຜິດຊອບວິຊາສະເພາອື່ນໆອີກ ຈໍານວນ 65 ສະຫາຍ.
ຂ່າວ: ຕິ໋ມພອນ
