ວັນທີ 25 ມັງກອນ 2023, ຜູ້ພັດທະນາແຫຼ່ງທ່ອງທ່ຽວນ້ຳຕົກຕາດເຍືອງ ໄດ້ຈັດພິທີ ປະກາດການສ້າງຕັ້ງກຸ່ມຜະລິດກະສິກຳອິນຊີບ້ານຫຼັກ 40 ເມືອງປາກຊ່ອງ ແຂວງຈຳປາສັກ ຢ່າງເປັນທາງການ ພາຍຫລັງມີນິຕິກຳຂອງເມືອງອະນຸຍາດໃຫ້ຈັດຕັ້ງເຄື່ອນໄຫວມາໃນໄລຍະ 1 ປີ ຜ່ານມາ. ພິທີຈັດຂຶ້ນຢູ່ແຫຼ່ງທ່ອງທ່ຽວນໍ້າຕົກຕາດເຍືອງ ໂດຍການເປັນປະທານຮ່ວມຂອງ ທ່ານ ດຣ.ຊັບປະທີບ ໄຊຍະວົງ ຮອງເລຂາພັກເມືອງປາກຊ່ອງ, ທ່ານ ນາງ ສອນທິດາ ອຸນາພົມ ຜູ້ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ. ມີທ່ານ ຄໍາຫຼ້າ ສຸວັນນະສີ ຫົວໜ້າຫ້ອງການ ຖວທ ເມືອງ, ທ່ານ ຄໍາຮູ້ ມຸກດາລາ ຫົວໜ້າຫ້ອງການກະສິກໍາ – ປ່າໄມ້ເມືອງ, ທ່ານສົມຈິດ ໄຊອາສາ ຫົວໜ້າຫ້ອງການ ຮສສ ເມືອງ, ທ່ານ ອິນປອນ ສຸລິຍະວົງ ເລຂາຄະນະພັກຮາກຖານກຸ່ມ III ພ້ອມດ້ວຍເຈົ້າໜ້າທີ່ຕໍາຫຼວດທ່ອງທ່ຽວ, ຄະນະພັກຮາກຖານກຸ່ມບ້ານ, ນາຍບ້ານ ຫຼັກ40, ພໍ່ແມ່ປະຊາຊົນ ແລະ ສະມາຊິກກຸ່ມ ເຂົ້າຮ່ວມ.
ໃນພິທີ ທ່ານ ນາງ ສອນທິດາ ອຸນາພົມ ຜູ້ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ປະທານຄະນະບໍລິຫານກຸ່ມ ຜູ້ຜະລິດກະສິກໍາອິນຊີ ບ້ານຫຼັກ 40 ໄດ້ຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານຂອງກຸ່ມ ໃນຊຸມປີຜ່ານມາ, ຊຶ່ງກຸ່ມຜະລິດກະສິກໍາອິນຊີ ບ້ານຫຼັກ 40 ໄດ້ຮັບອະນຸຍາດສ້າງຕັ້ງ ແລະ ຄຸ້ມຄອງ ໂດຍທ່ານເຈົ້າເມືອງ ແລະ ຫ້ອງການກະສິກຳ ແລະ ປ່າໄມ້ເມືອງ ໃນການດໍາເນີນກິດຈະການຜະລິດກະສິກໍາອິນຊີ ປູກພືດຜັກ ປອດສານພິດ ເປັນສີນຄ້າ ລວມໝູ່ຂອງປະຊາຊົນບ້ານຫຼັກ 40 ເມືອງປາກຊ່ອງ ໃນຕົ້ນປີ 2021. ປະຈຸບັນ ມີສະມາຊິກທັງໝົດ 60 ຄອບຄົວ, ສະມາຊິກສໍາຮອງ 11 ຄອບຄົວ, ແບ່ງເປັນ 4 ຈຸຜະລິດ ໂດຍໄດ້ປູກພືດຜັກ ແລະ ໜາກໄມ້ໃນແບບສວນປະສົມປະສານ ແຊມໃສ່ໃນເນື້ອທີ່ສວນກາເຟ ຂອງແຕ່ລະຄອບຄົວ ຈໍານວນ 87 ເຮັກຕາ, ລົງທຶນຈົດທະບຽນສ້າງຕັ້ງກຸ່ມຈໍານວນ 100 ລ້ານກີບ ເຊິ່ງບໍລິສັດພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ຈໍາກັດ (ຄູ່ສັນຍາ) ໄດ້ກໍານົດນະໂຍບາຍສົ່ງເສີມກຸ່ມ ດ້ວຍວິທີການເກັບຊື້ຜົນຜະລິດແບບຄໍ້າປະກັນລາຄາທີ່ເໝາະສົມກັບກຸ່ມ ໂດຍອີງຕາມສະພາບຕົວຈິງໃນແຕ່ລະໄລຍະ. ນອກນີ້ ຍັງມີບໍາເນັດເພີ່ມຕື່ມໃຫ້ ກິໂລລະ 200 ກີບ ເພື່ອໃຫ້ກຸ່ມມີເງີນສະສົມສ້າງກອງທຶນຄັງສະຫວັດດີການຂອງກຸ່ມ. ໃນ 1 ປີຜ່ານມາ ກຸ່ມສາມາດຈໍາໜ່າຍຜົນຜະລິດໃຫ້ບໍລິສັດ (ຄູ່ສັນຍາ) ໄດ້ຈໍານວນ 48,9 ໂຕນ ຄິດເປັນເງີນ 561 ລ້ານກ່ວາກີບ. ໃນນີ້, ບໍລິສັດໄດ້ວາງແຜນຈະເກັບຊື້ພືດຜັກ - ໝາກໄມ້ ໃຫ້ໄດ້ 44 ຊະນິດ/ເດືອນ, ແຕ່ການເຄື່ອນໄຫວຕົວຈິງ ສາມາດສະໜອງໄດ້ພຽງແຕ່ 24 ຊະນິດ, ໃນນັ້ນ ປະເພດຜັກ 18 ຊະນິດ, ປະເພດໝາກໄມ້ 5 ຊະນິດ ແລະ ຖ່ານດັງໄຟ ລວມທັງໝົດ 48.994 ກິໂລກຼາມ ແລະ ສາມາດເກັບເງີນກອງທຶນຄັງສະສົມສະຫວັດດີການຂອງກຸ່ມ ກິໂລລະ 200 ກີບ ໄດ້ 9.798.940 ກີບ.
ທ່ານ ນາງ ສອນທິດາ ອຸນາພົມ ໃຫ້ຮູຕື່ມວ່າ: ສໍາລັບທິດທາງແຜນການໃນປີ 2023, ຈະສືບຕໍ່ຜະລິດ ແລະ ຈໍາໜ່າຍຜົນຜະລິດກະສິກໍາອີນຊີພືດຜັກປອດສານພິດ ເປັນສີນຄ້າ ໃຫ້ແຂງແຮງກ່ວາເກົ່າ ເຊິ່ງຢູ່ພາຍໃນສວນປູກ ຂອງແຕ່ລະຄອບຄົວ ຈະບຸກບືນສູ້ຊົນສະໜອງໃຫ້ ຄູ່ສັນຍາ ກໍຄືແຫຼ່ງທ່ອງທ່ຽວຕາດເຍືອງ ແລະ ສາມາດຈໍາໜ່າຍທົ່ວໄປ ຫຼື ໃນຕະຫຼາດສົດກັບທີ່ ຕາດເຍືອງ ແລະ ສົ່ງອອກຂາຍພາຍໃນ ແລະ ຕ່າງປະເທດ ໃຫ້ໄດ້ 75 ໂຕນຕໍ່ປີ ເພື່ອໃຫ້ສະມາຊິກແຕ່ລະຄອບຄົວ ມີລາຍຮັບເພີ່ມ ແລະ ມີເງີນກອງທຶນສະສົມ ພາຍໃນກຸ່ມ ເພື່ອເປັນສະຫວັດດີການໃຫ້ສະມາຊິກ. ພ້ອມນີ້ກໍຈະຂະຫຍາຍເນື້ອທີ່ສວນລວມຂອງກຸ່ມ ຢູ່ໃນເນື້ອທີ່ຂອງບໍລິສັດ ພັດທະນາແຫຼ່ງທ່ອງທ່ຽວຕາດເຍືອງ ໃຫ້ຫລາຍຂຶ້ນກ່ວາເກົ້າ.
ຈຸດປະສົງ ກໍເພື່ອເປີດໂອກາດໃຫ້ປະຊາຊົນ ທີ່ຢູ່ໃນເຂດພື້ນທີ່ໃກ້ຄຽງແຫຼ່ງທ່ອງທ່ຽວນໍ້າຕົກຕາດເຍືອງ ທີ່ມີມູນເຊື້ອດຸໝັ່ນຫ້າວຫັນ ໄດ້ມີຜົນປະໂຫຍດ ແລະ ປະກອບສ່ວນຮ່ວມໃນກິດຈະກໍາການພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ແບບຍືນຍົງ ປະຊາຊົນມີສ່ວນຮ່ວມ ເຊິ່ງຈະມີລາຍໄດ້ສໍາຮອງເພີ່ມຈາກການປູກກາເຟ ໂດຍການສະໜອງພືດຜັກ, ໝາກໄມ້ປອດສານພິດ ໃຫ້ແຫຼ່ງທ່ອງທ່ຽວ ນໍາມາປຸງແຕ່ງອາຫານ ເພື່ອສຸຂະພາບ ທີ່ມີເອກລັກ ໃຫ້ແກ່ນັກທ່ອງທ່ຽວທັງພາຍໃນ - ຕ່າງປະເທດ ແລະ ຈໍາໜ່າຍກັບທີ່, ທົ່ວໄປ ແລະ ພາຍໃນຕະຫຼາດສົດຕາດເຍືອງ ແລະ ສົ່ງອອກໄປຂາຍ ພາຍໃນ ແລະ ຕ່າງປະເທດ ເພື່ອແກ້ໄຂຊີວິດການເປັນຢູ່ຂອງຄອບຄົວພໍ່ແມ່ປະຊາຊົນ ໃຫ້ດີຂຶ້ນເທື່ອລະກ້າວ. ເຮັດໃຫ້ພໍ່ແມ່ປະຊາຊົນ ເປັນເຈົ້າການ, ປະກອບສ່ວນໃນການອະນຸລັກປົກປັກຮັກສາທໍາມະຊາດ, ສິ່ງແວດລ້ອມ, ປ່າໄມ້ ແລະ ແຫຼ່ງນໍ້າ ໃຫ້ມີຄວາມອຸດົມສົມບູນ ຕິດພັນກັບການອະນຸລັກຮັກສາວັດທະນາທໍາ, ຮີດຄອງປະເພນີ ທີ່ມີເອກະລັກ ໃຫ້ຍືນຍົງ ໂດຍສະເພາະແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງ
ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວຊົມ ຢ່າງຫຼວງຫຼາຍ ໃນ ພິທີໄດ້ ມອບຂອງຂັວນ ແລະ ຍ້ອງຍໍ ພ້ອມນະໂຍບາຍໃຫ້ແກ່ສະມາຊິກກຸ່ມທີ່ດີເດັ່ນໃນການປູກ ແລະ ສົ່ງຜົນມາຜະລິດອິນເຂົ້າມາຈຳໜາຍພາຍໃນກຸ່ມຕື່ມອີກ.
ຈາກນັ້ນ, ທ່ານ ດຣ.ຊັບປະທີບ ໄຊຍະວົງ ຮອງເລຂາພັກເມືອງ ພ້ອມຂະແໜງການ,ຫ້ອງການກ່ຽວຂ້ອງ ເຊັ່ນ:ຫ້ອງການ ຖວທ ເມືອງ, ຫ້ອງການກະສິກໍາ – ປ່າໄມ້ເມືອງ, ຫ້ອງການ ຮສສ ເມືອງ ແລະ ເລຂາຄະນະພັກຮາກຖານກຸ່ມບ້ານທີ III ກໍໄດ້ມີຄໍາເຫັນເປັນເອກກະພາບສູງຕໍ່ຜົນຜົນງານການເຄື່ອນໄຫວຂອງກຸ່ມ ໃນໄລະຍະຜ່ານມາ ແລະຝາກຄວາມຫວັງເຊື່ອໝັນວ່າ ພາຍໃຕ້ການບໍລິຫານຈັດການ ທີ່ດີ ແລະ ມີປະສົບການສູງຂອງ ທ່ານ ນາງ ສອນທິດາ ອຸນາພົມ ຜູ້ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ໃນຕໍ່ໜ້າຈະສາມາດຂະຫຍາຍກິດຈຳການໄດ້ຢ່າງກວ້າງຂວາງ ແລະ ເຂັ້ມແຂງ ນຳຜົນປະໂຫຍດຢ່າງຫລວງຫລາຍໃ້ຫ້ແກ່ປະຊາຊົນສໍາເລັດຕາມຄາດໝາຍທີ່ວາງໄວ້.
ເກດສະໜາ ແກ້ວສຸວັນນະແສງ
