ພິທີປະກາດສ້າງຕັ້ງສານປະຊາຊົນເຂດ II ເມືອງດາກຈຶງ ແຂວງເຊກອງ ໄດ້ຈັດຂຶ້ນໃນວັນທີ 1 ສີງຫາ 2024 ທີ່ເມືອງດາກຈຶງ ໂດຍການເຂົ້າຮ່ວມຂອງທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ, ປະທານສານປະຊາຊົນສູງສຸດ, ມີຂະແໜງການກ່ຽວຂ້ອງຂັ້ນສູນກາງ, ຂັ້ນແຂວງ ແລະ ເມືອງດາກຈຶງ ເຂົ້າຮ່ວມ.
ໃນພິທີ, ທ່ານ ຂຸນສຸວັນ ສຸທໍາມະວົງ ຫົວໜ້າກົມຈັດຕັ້ງ-ພະນັກງານ ສານປະຊາຊົນສູງສຸດ ໄດ້ຜ່ານມະຕິຕົກລົງ ຂອງຄະນະປະຈໍາສະພາແຫ່ງຊາດ ສະບັບເລກທີ 119/ຄປຈ, ລົງວັນທີ 11 ກໍລະກົດ 2024 ວ່າດ້ວຍການສ້າງຕັ້ງສານປະຊາຊົນເຂດ II ແຂວງເຊກອງ, ຂໍ້ຕົກລົງຂອງປະທານສານປະຊາຊົນສູງສຸດ ສະບັບເລກທີ 844/ສປສສ, ລົງວັນທີ 24 ກໍລະກົດ 2024 ວ່າດ້ວຍການແຕ່ງຕັ້ງທ່ານ ລິນເຕີຍ ວາດສະໝານ ຮັກສາການປະທານສານປະຊາຊົນເຂດ II ເມືອງດາກຈຶງ ແຂວງເຊກອງ ແລະ ຂໍ້ຕົກລົງສະບັບເລກທີ 865/ສປສສ, ລົງວັນທີ 29 ກໍລະກົດ 2024 ວ່າດ້ວຍການແຕ່ງຕັ້ງທ່ານ ນາງ ບົວພອນ ທໍາມະວົງ ຮອງຫົວໜ້າຫ້ອງການ-ການເງິນ ສານປະຊາຊົນເຂດ I ເປັນຮັກສາການຫົວໜ້າຫ້ອງການ-ການເງິນ ສານປະຊາຊົນເຂດ II ເມືອງດາກຈຶງ ແຂວງເຊກອງ.
ໂອກາດນີ້, ທ່ານ ນາງ ວຽງທອງ ສີພັນດອນ ໄດ້ມີຄໍາເຫັນໂອ້ລົມ ຊຶ່ງພາຍຫຼັງປະກາດສ້າງຕັ້ງສານປະຊາຊົນເຂດ II ແລ້ວ ສະເໜີໃຫ້ຄະນະພັກ-ຄະນະນໍາ ກໍຄືຂະແໜງການກ່ຽວຂ້ອງ ຂັ້ນແຂວງ-ເມືອງ ໂດຍສະເພາະແມ່ນບັນດາສະຫາຍຜູ້ທີ່ໄດ້ຮັບການແຕ່ງຕັ້ງ ຕ້ອງເພີ່ມທະວີຄວາມເປັນແບບຢ່າງນໍາໜ້າ, ເອົາໃຈໃສ່ສຶກສາອົບຮົມການເມືອງ-ແນວຄິດ, ໂຄສະ
ນາເຜີຍແຜ່ບັນດາແນວທາງຂອງພັກ, ແຜນນະໂຍບາຍ ແລະ ລະບຽບກົດໝາຍຂອງລັດ ກໍຄືພາລະບົດບາດ, ສິດ ແລະ ໜ້າທີ່ຂອງສານປະຊາຊົນແຂວງ, ສານປະຊາຊົນເຂດ ເພື່ອໃຫ້ປະຊາຊົນຮັບຮູ້-ເຂົ້າໃຈຢ່າງເລິກເຊິ່ງ ແລະ ທົ່ວເຖິງ; ຕັ້ງໜ້າປະຕິບັດໜ້າທີ່ການເມືອງທີ່ໄດ້ຮັບມອບໝາຍ, ແບ່ງງານ-ແບ່ງຄວາມຮັບຜິດຊອບໃຫ້ໝູ່ຄະນະ, ບັນດາໜ່ວຍງານປິ່ນອ້ອມຢ່າງຈະແຈ້ງ ແລະ ສິ່ງສໍາຄັນຕ້ອງເອົາໃຈໃສ່ຄົ້ນຄວ້າ, ພິຈາລະນາ, ແກ້ໄຂ, ຕັດສິນຄະດີໃຫ້ວ່ອງໄວ, ໂປ່ງໃສ, ຖືກຕ້ອງຕາມຂໍ້ມູນຫຼັກຖານ ແລະ ຮັບປະກັນຄວາມຍຸຕິທໍາ. ພ້ອມນີ້ ທ່ານ ນາງວຽງ ສີພັນດອນ ພ້ອມຄະນະ ຍັງໄດ້ຮ່ວມຕັດແຖບຜ້າເປີດປ້າຍ ແລະ ເຄື່ອນໄຫວຢ້ຽມຢາມເຂດຖານທີ່ໝັ້ນການປະຕິວັດລາວໃຕ້ ທີ່ບ້ານດາກປໍາ ເມືອງດາກຈຶງຕື່ມອີກ.
ຂ່າວ: ສັນຍາ
