ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະກາດສ້າງຕັ້ງເຂດອະນຸລັກປ່າໂຄກໂອງ-ມັ່ງ ແຫ່ງຊາດ ທີ່ສະຫວັນນະເຂດ

ກົມປ່າໄມ້ ກະຊວງກະສິກໍາ ແລະ ປ່າໄມ້ ຮ່ວມກັບອົງການປົກຄອງແຂວງສະຫວັນນະເຂດ ຈັດພິທີປະກາດສ້າງຕັ້ງເຂດອະນຸລັກປ່າໂຄກໂອງ-ມັ່ງ ແຫ່ງຊາດໃນວັນທີ 13 ກໍລະກົດ 2020 ທີ່ເມືອງຊົນນະບູລີ. ມີ ທ່ານ ສັນຕິ ພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ນາງ ຣິຄາດາ ຣິເກີ ຫົວໜ້າອົງການສະຫະປະຊາຊາດ ເພື່ອການພັດທະນາ ປະຈໍາລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ ໃຫ້ຮູ້ວ່າ: ໄລຍະຜ່ານມາປະຊາຊົນທີ່ດໍາລົງຊີວິດໃນເຂດປ່າໂຄກແຫ່ງນີ້ ຮູ້ຈັກ ແລະ ຄຸ້ນເຄີຍກັບໂອງ -ມັ່ງ ເປັນເວລາດົນນານແລ້ວ ແຕ່ໃນໄລຍະຜ່ານມາ ຍັງບໍ່ທັນມີມາດຕະການຄຸ້ມຄອງ, ອະນຸລັກ ແລະ ປົກປັກຮັກສາດີເທົ່າທີ່ຄວນ ເຮັດໃຫ້ໂອງ-ມັ່ງ ແລະ ສັດປ່າຫລາຍຊະນິດໃນປ່າໂຄກແຫ່ງນີ້ ມີຈໍານວນຫລຸດລົງ ແລະ ມີຄວາມສ່ຽງທີ່ຈະສູນພັນ. ມາຮອດປີ 2016 ອົງການສະຫະປະຊາຊາດເພື່ອການພັດທະນາ (NUDP) ສົມທົບກັບທຶນປະກອບສ່ວນຂອງ NUDP ໄດ້ໃຫ້ທຶນສະໜັບສະໜູນ ມູນຄ່າທັງໝົດ 12 ລ້ານກວ່າໂດລາ ແລະ ການປະ ກອບສ່ວນຂອງລັດຖະບານລາວ ຈໍານວນໜຶ່ງ ເພື່ອຈັດຕັ້ງປະຕິບັດໂຄງການອະນຸລັກລະບົບນິເວດປ່າໂຄກ ໂອງ-ມັ່ງ ໃນໄລຍະເວລາ 6 ປີ (2016-2022) ເພື່ອສ້າງຄວາມເຂັ້ມແຂງໃນການຄຸ້ມຄອງປົກປັກຮັກສາປ່າໄມ້, ທີ່ດິນປ່າໄມ້ ແລະ ລະບົບນິເວດປ່າໂຄກ ໂດຍສະເພາະໂອງ-ມັ່ງ ແລະ ສັດປ່າຊະນິດອື່ນໃຫ້ມີຄວາມຍືນຍົງ-ອຸດົມສົມບູນຂຶ້ນກ່ວາເກົ່າ.

ເຂດອະນຸລັກປ່າໂຄກໂອງ-ມັ່ງແຫ່ງຊາດແຫ່ງນີ້ ຖືເປັນແຫ່ງທໍາອິດຂອງລາວທີ່ຈະໄດ້ຮັບການປະກາດເປັນເຂດອະນຸລັກສັດປ່າ ເຊີ່ງມີເນື້ອທີ່ທັງ ໝົດ 130.000 ກ່ວາເຮັກຕາ, ກວມເອົາ 5 ເມືອງ ຄື: ເມືອງຊົນນະບູລີ, ທ່າປາງທອງ, ພະລານໄຊ, ສອງຄອນ ແລະ ເມືອງພິນ, ໃນນີ້ ກວມເອົາເນື້ອທີ່ຫລາຍກ່ວາໝູ່ ແມ່ນເມືອງຊົນນະບູລີ. ປັດຈຸບັນເຂດດັ່ງກ່າວມີໂອງ-ມັ່ງເກືອບ 200 ໂຕ, ນົກ 278 ຊະນິດ, ສັດລ້ຽງລູກດ້ວຍນໍ້ານົມ 67 ຊະນິດ, ສັດເລືອຄານ 47 ຊະນິດ, ສັດເຄີ່ງບົກ-ເຄີ່ງນໍ້າ 38 ຊະນິດ ແລະ ປາ 9 ຊະນິດ, ສ່ວນຕົ້ນໄມ້ ແລະ ພືດຊະນິດຕ່າງໆ ລວມມີ 126 ຊະນິດ.

ຂ່າວໂດຍ: ບຸນຕຽງ ຈັນທະວົງ