ພິທີປະກາດຮັບຮອງເອົາສວນວັດທະນະທໍາຊຽງຄວນເປັນມໍລະດົກແຫ່ງຊາດລະດັບທ້ອງຖິ່ນທາງດ້ານວັດທະນະທໍາແຫ່ງທີ 1 ຂອງນະຄອນຫຼວງວຽງຈັນ ແລະ ເປີດນໍາໃຊ້ປະຕູໂຂງໃຫຍ່ ຈັດຂື້ນໃນຕອນເຊົ້າວັນທີ 22 ທັນວາ 2022 ທີ່ສວນວັດທະນະທໍາຊຽງຄວນ ເມືອງຫາດຊາຍຟອງ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຖະໜອມ ທໍາທອງ ປະທານແນວລາວສ້າງຊາດນະຄອນຫລວງວຽງຈັນ, ທ່ານນາງ ວິໄລວອນ ຈັນທະລາຕີ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງ, ພ້ອມດ້ວຍເຈົ້າເມືອງຫາດຊາຍຟອງ, ຜູ້ສໍາປະທານສວນວັດທະນະທໍາຊຽງຄວນ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ແກ້ວວິໄລສັກ ແສນສັກດາ ຮອງຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງ ກ່າວວ່າ: ມໍລະດົກວັດທະນະທໍາ ແມ່ນຊັບສົມບັດອັນລໍ້າຄ່າທີ່ບັນພະບຸລຸດໄດ້ສ້າງໄວ້ ເຊິ່ງປຽບລົ້ນໄປດ້ວຍຄຸນຄ່າວັດທະນະທໍາອັນໂດດເດັ່ນເພື່ອສ່ອງແສງໃຫ້ເຫັນຄວາມເປັນເອກະລັກຂອງຊາດລາວຂອງປະຊາຊົນບັນດາເຜົ່າ, ການອະນຸລັກ ແລະ ສົ່ງເສີມຄຸນຄ່າມໍລະດົກວັດທະນະທໍາໄດ້ກາຍເປັນໜ້າທີ່ຍຸດທະສາດທີ່ບັນດາປະເທດໃນທົ່ວໂລກກໍາລັງສຸມໃສ່ຈັດຕັ້ງຜັນຂະຫຍາຍຕາມສົນທິສັນຍາຂອງອົງການ ຢູເນສໂກ ກ່ຽວກັບການຄຸ້ມຄອງ ແລະ ນໍາໃຊ້ຄຸນຄ່າມໍລະດົກຕາມທິດຍືນຍົງຢູ່ໃນມະຕິຂອງວຽກງານວັດທະນະທໍາໃນໄລຍະໃໝ່ ເຊິ່ງພັກໄດ້ກໍານົດແຈ້ງກ່ຽວກັບໜ້າທີ່ໃນການອະນຸລັກ ແລະ ສົ່ງເສີມຄຸນຄ່າມໍລະດົກຂອງຊາດ ແລະ ລັດຖະບານໄດ້ມີການຜັນຂະຫຍາຍໃນກົດ ໝາຍວ່າດ້ວຍມໍລະດົກແຫ່ງຊາດ ສະບັບເລກທີ 11/ສພຊ ລົງວັນທີ 16 ພະຈິກ 2021 ເປັນຕົ້ນແມ່ນວຽກງານຂື້ນທະບຽນມໍລະດົກແຫ່ງຊາດທີ່ກໍານົດໄວ້ໃນມາດຕາ 29 ສະບັບປັບປຸງ.
ທ່ານນາງ ສ້ອຍສຸດາ ອິນເມືອງໄຊ ຜູ້ສໍາປະທານສວນວັດທະນະທໍາຊຽງຄວນ ກ່າວວ່າ: ສວນວັດທະນະທໍາຊຽງຄວນ ຕັ້ງຢູ່ດ້ານໃຕ້ຂອງບ້ານທ່າເດື່ອ, ທິດເໜືອຕິດກັບບ້ານຖິ່ນຕົມ, ທິດໃຕ້ຕິດກັບບ້ານໜອງແປນເໜືອ ເມືອງຫາດຊາຍຟອງ ຫ່າງຈາກຂົວມິດຕະພາບລາວໄທ 7,3 ກິໂລແມັດ, ສ້າງຕັ້ງຂື້ນໃນປີ 1958 ໂດຍການປຸກລະດົມຂົນຂວາຍສັດທາສ້າງອອກແບບ ນໍາພາໂດຍ ພໍ່ຂາວບຸນເຫຼືອ ສຸລິລັດ ຫຼື ປູ່ເຫຼືອ ໃຊ້ເວລາສ້າງເປັນເວລາ 10 ປີຈື່ງສໍາເລັດ. ມາຮອດປີ 2017 ບໍລິສັດໄດ້ສໍາປະທານສວນວັດທະນະທໍາແຫ່ງນີ້ນໍາອົງການປົກຄອງເມືອງຫາດຊາຍຟອງໃນວັນທີ 24 ສິງຫາ 2017 ໃນເນື້ອທີ່21.000 ຕາແມັດ ຈາກນັ້ນກໍ່ໄດ້ຜ່ານເນື້ອໃນການອອກແບບໂດຍຜ່ານກົມມໍລະດົກ ພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງ ແລະ ຫ້ອງການວັດທະນະທໍາເມືອງຫາດຊາຍຟອງຕາມຂັ້ນຕອນຂອງກົດໝາຍ.
ການສະເຫຼີມສະຫຼອງພິທີປະກາດຮັບຮອງເອົາສວນວັດທະນະທໍາຊຽງຄວນເປັນມໍລະດົກແຫ່ງຊາດລະດັບທ້ອງຖິ່ນທາງດ້ານວັດທະນະທໍາແຫ່ງທີ 1 ຂອງນະຄອນຫຼວງວຽງຈັນ ແລະ ເປີດນໍາໃຊ້ປະຕູໂຂງໃຫຍ່ໃນຄັ້ງນີ້, ໄດ້ຈັດຫລາຍກິດຈະກໍາ ເປັນຕົ້ນ: ຕອນຊົ້າມີພິທີໃສ່ບາດຖວາຍສັງຄະທານ, ການຕັດແຖບຜ້າ ພ້ອມທັງລັ່ນຄ້ອງ 9 ບາດເພື່ອເປັນສິລິມຸງຄຸນ ຈາກທ່ານຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ຈາກນັ້ນໄດ້ມີຂະບວນແຫ່ໃບຢັ້ງຢືນ ແລະ ທ່ຽວຊົມສະຖານທີ່ວັດທະນະທໍາຊຽງຄວນ, ພິທີບາສີສູ່ຂວັນ, ຊົມການສະແດງສິລະປະ-ວັນນະຄະດີຈາກໂຮງຮຽນແຫ່ງຕ່າງໆລວມທັງນັກຮ້ອງທີ່ມີສື່ສຽງຂອງລາວ ແລະ ອື່ນໆ.
