ພິທີປະກາດຮັບຮອງເອົາເມືອງໃໝ່ ເປັນເມືອງຍຸດຕິການຖ່າຍຊະຊາຍ ຈັດຂຶ້ນໃນຕອນເຊົ້າຂອງ ວັນທີ 29 ກໍລະກົດ 2024 ທີ່ສະໂມສອນເມືອງໃໝ່ ແຂວງຜົ້ງສາລີ. ມີ ທ່ານ ຄຳເຫຼັກ ໃຈອີສານ ກຳມະການປະຈຳພັກແຂວງ ຮອງເຈົ້າແຂວງ ຜູ້ຊີ້ນຳຂົງເຂດວັດທະນະທຳ-ສັງຄົມແຂວງ, ພະນັກງານ, ແຂກຮັບເຊີນ ແລະ ປະຊາຊົນພາຍໃນເມືອງເຂົ້າຮ່ວມ.
ດຣ ພອນສະຫວັນ ມະນີວົງສີ ກຳມະການພັກເມືອງ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳ-ສັງຄົມເມືອງໃໝ່ ໄດ້ຂຶ້ນລາຍງາຍ ການຈັດຕັ້ງປະຕິບັດ ວຽກງານຢຸດຕິການຖ່າຍຊະຊາຍໃນທົ່ວເມືອງ ເຊິ່ງໃຫ້ຮູ້ວ່າ: ເມືອງໃໝ່ເປັນເມືອງໜຶ່ງທີນອນຢູ່ໃນ 7 ເມືອງ ຂອງແຂວງ ຜົ້ງສາລີ ເປັນເມືອງທີ 4 ຂອງການປະກາດຮັບຮອງເອົາເປັນເມືອງຍຸດຕິການຖ່າຍຊະຊາຍ ເປັນເມືອງທີ່ຕັ້ງຢູ່ທາງພາກໃຕ້ຂອງແຂວງຜົງສາລີ ຢູ່ຫ່າງຈາກເທດສະບານແຂວງ ປະມານ 210 ກິໂລແມັດ ເນື້ອທີ່ສ່ວນໃຫຍ່ເປັນເຂດພູດອຍ ກວມເອົາ 90% ເຊິ່ງແບ່ງອອກເປັນ 10 ກຸ່ມບ້ານ, ມີທັງໝົດ 78 ບ້ານ ມີ 6 ບ້ານ ຂຶ້ນກັບເທດສະບານເມືອງ, ປະຊາກອນລວມ 28,317 ຄົນ ຍິງ 13,936 ຄົນ, ມີ 4,984 ຄົວເຮືອນ, ມີ 6, 345 ຄອບຄົວ ແລະ ມີ 10 ຊົນເຜົ່າ, ປະຊາຊົນຍຶດຖືເອົາການຜະລິດກະສິກຳເປັນສ່ວນໃຫຍ່ ໃນການຈັດຕັ້ງປະຕິບັດ ວຽກງານຢຸດຕິການຖ່າຍຊະຊາຍໃນທົ່ວເມືອງ ມີວິດຖ່າຍ ແລະ ນຳໃຊ້ວິດຖ່າຍ ແມ່ນກວມເອົາ 100% ມີວິດຖ່າຍເປັນຂອງຕົນເອງ 4,702 ຄົວເຮືອນ ໃຊ້ຮ່ວມກັບພີ່ນ້ອງ 282 ຄົວເຮືອນ ຈາກນັ້ນກໍໄດ້ຈັດພິທີມອບ-ຮັບໃບຢັ້ງຢືນບ້ານຍຸດຕິການຖ່າຍຊະຊາຍ ຈຳນວນ 18 ບ້ານ ແລະ ມອບ-ຮັບ ໃບຍ້ອງຍໍ ບຸກຄົນ, ກົມກອງ, ຫ້ອງການ ທີ່ໃຫ້ການຊ່ວຍເຫຼືອ ຢ່າງສົມກຽດ.
ຂ່າວ: ວັນວິໄລ ຖວທ
