ພິທີປະກາດຮັບຮອງເອົາແຂວງບໍ່ແກ້ວ ເປັນແຂວງ ຢຸດຕິການຖ່າຍຊະຊາຍ ເປັນແຂວງທີ IV ໃນວັນທີ 4 ກໍລະກົດ 2024 ທີ່ແຂວງບໍ່ແກ້ວ ໂດຍເຂົ້າຮ່ວມຂອງທ່ານ ດຣ. ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ທ່ານ ທອງຈັນ ມະນີໄຊ ເຈົ້າແຂວງໆບໍ່ແກ້ວ ພ້ອມດ້ວຍພະແນກການອ້ອມຂ້າງແຂວງ, ຜູ້ຕາງໜ້າອົງການຈັດຕັ້ງສາກົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ແຂວງບໍ່ແກ້ວປະກອບມີ 05 ເມືອງຄື: ຫ້ວຍຊາຍ, ປາກທາ, ຜາອຸດົມ, ຕົ້ນເຜີ້ງ ແລະ ເມືອງເມິງ, ມີ 248 ບ້ານ, ມີປະຊາກອນ 205.751 ຄົນ ຍິງ 101.954 ຄົນ, ມີ 37.330 ຄົວເຮືອນ, ມີບ້ານທຸກຍາກ 60 ບ້ານ, ຄົວເຮືອນທຸກຍາກ 7.007 ຄົວເຮືອນ ກວມເອົາ 22,57%, ເຊິ່ງປະກອບມີຫລາຍຊົນເຜົ່າ ທໍາມາຫາກິນ ແລະ ອາໄສຢູ່ຮ່ວມກັນ. ແຂວງບໍ່ແກ້ວ ໄດ້ເລີ່ມຈັດຕັ້ງປະຕິບັດວຽກງານ ຊຸມຊົນເປັນເຈົ້າດ້ານສຸຂະອະນາໄມ (ຊຈສ) ແຕ່ປີ 2009 ເປັນຕົ້ນມາ, ມາຮອດວັນທີ 21 ມີນາ 2023 ກໍໄດ້ປະກາດ ແລະ ຮັບຮອງ ເມືອງຫ້ວຍຊາຍ ເປັນເມືອງຢຸດຕິການຖ່າຍຊະຊາຍ ເປັນເມືອງທໍາອິດ, ເຊິ່ງສາມາດປະຕິບັດໄດ້ 99.61%, ຕໍ່ມາກໍໄດ້ປະກາດ ແລະ ຮັບຮອງເມືອງປາກທາ ເມືອງຜາອຸດົມ, ເມືອງຕົ້ນເຜິ້ງ ແລະ ເມືອງເມີງ ເປັນເມືອງຢຸດຕິການຖ່າຍຊະຊາຍ. ມາຮອດປັດຈຸບັນໃນທົ່ວແຂວງບໍ່ແກ້ວ 37.330 ຄົວເຮືອນ ມີວິດຖ່າຍເປັນຂອງຕົນເອງ 36.590 ຄົວເຮືອນ ເທົ່າກັບ 98,02% ແລະ ຄົວເຮືອນທີ່ຍັງໃຊ້ວິດຖ່າຍຮ່ວມນໍາພີ່ນ້ອງມີ 740 ຄົວເຮືອນ ເທົ່າກັບ 2.03%.
ໃນພິທີຍັງໄດ້ຮັບຟັງການຜ່ານຂໍ້ຕົກລົງຂອງເຈົ້າແຂວງບໍ່ແກ້ວ ວ່າດ້ວຍ ການອະນຸມັດຮັບຮອງເອົາແຂວງບໍ່ແກ້ວ ເປັນແຂວງຢຸດຕິການຖ່າຍຊະຊາຍ ແລະ ຜ່ານຂໍ້ຕົກລົງຂອງລັດຖະມົນຕີ ກະຊວງສາທາລະນະສຸກ ວ່າດ້ວຍການຮັບຮອງ ແຂວງບໍ່ແກ້ວ ເປັນແຂວງຢຸດຕິການຖ່າຍຊະຊາຍ ພ້ອມທັງມອບໃບຢັ້ງຢືນ ແລະ ໃບຍ້ອງຍໍ ໃຫ້ຄະນະກຳມະການຊຸມຊົນເປັນເຈົ້າການ ວຽກງານສຸຂະອະນາໄມ ຊຈສ ຕື່ມອີກ.
ຂ່າວ: ຄໍາເພັງ ສີສະຫວ່າງ
