ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີປະກາດແຕ່ງຕັ້ງ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ຈັດຂຶ້ນໃນວັນທີ 15 ພະຈິກ 2023 ໂດຍການເປັນປະທານຂອງ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນ ສູງສຸດ, ມີບັນດາຫົວໜ້າກົມ, ຮອງກົມ, ພ້ອມດ້ວຍພະນັກງານຫລັກແຫລ່ງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ທົງສັກ ກົມມະເມືອງ ຕາງໜ້າຄະນະຈັດຕັ້ງສູນກາງພັກ ໄດ້ຜ່ານລັດຖະດຳລັດ ຂອງປະທານປະເທດ ວ່າດ້ວຍການແຕ່ງຕັ້ງ ຮອງຫົວໜ້າອົງການໄອຍະການປະຊາຊົນສູງສຸດ ໂດຍແຕ່ງຕັ້ງ ທ່ານນາງ ພອນເພັດ ອຸ່ນແກ້ວ ກຳມະການຄະນະພັກ, ເລຂາໜ່ວຍພັກ, ຫົວໜ້າຫ້ອງການ ຂຶ້ນເປັນຮອງຫົວໜ້າອົງການໄອຍະການປະຊາຊົນສູງ ສຸດ.
ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ ບັນດາທ່ານທີ່ໄດ້ຮັບຕຳແໜ່ງ ໃໝ່ ໂດຍເນັ້ນໃຫ້ສືບຕໍ່ເພີ່ມທະວີກໍາລັງແຮງ ແລະ ສຸມສະຕິປັນຍາ ເຂົ້າໃນການປະຕິບັດໜ້າທີ່ການເມືອງ, ທີ່ພັກ-ລັດມອບໝາຍໃຫ້ ແລະ ເພີ່ມທະວີກຳລັງແຮງຄວາມສາມັກຄີພາຍໃນ, ຄວາມເປັນແບບຢ່າງນຳໜ້າໃນການຊີ້ນຳ-ນຳພາ, ເດັດຂາດໃນການປະຕິບັດໜ້າທີ່ວຽກງານບົນຫລັກການເຮັດວຽກເປັນໝູ່ຄະນະເພື່ອຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງ, ວຽກງານໄອຍະການໃນໄລຍະໃໝ່. ພ້ອມນີ້, ຍັງໄດ້ຮຽກຮ້ອງໃຫ້ພະນັກງານຫລັກແຫລ່ງ ນໍາພາທຸກຂັ້ນຢູ່ພາຍໃນອົງການໄອຍະການປະຊາຊົນສູງສຸດເຊີດຊູຄວາມເປັນແບບຢ່າງນໍາໜ້າໃນການຊີ້ນຳ-ນຳພາ ແລະ ຈັດຕັ້ງປະຕິບັດ ໜ້າທີ່ວຽກງານທີ່ພັກ-ລັດມອບໝາຍໃຫ້, ໂດຍສະເພາະ ການນຳພາຈັດຕັ້ງປະຕິບັດວຽກງານຕິດຕາມກວດກາການປະຕິບັດ ແລະ ເຄົາລົບກົດໝາຍ ແລະ ສັງຟ້ອງຜູ້ຖືກຫາຂຶ້ນສານຕັດສິນ ໃຫ້ໄດ້ຮັບຜົນສຳເລັດ.
ໃນໂອກາດດຽວກັນ, ທ່ານ ນາງ ພອນທີບ ສາວະລີ ຫົວໜ້າກົມກວດກາ ປະທານສະຫະພັນແມ່ຍິງ ຂອງອົງການໄອຍະການປະຊາຊົນສູງສຸດ ພ້ອມດ້ວຍເອື້ອຍນ້ອງແມ່ຍິງ ໄດ້ເຂົ້າສະແດງຄວາມຊົມເຊີຍ ຕໍ່ ທ່ານ ຮອງຫົວໜ້າອົງການໄອຍະການປະຊາຊົນສູງສຸດ ຜູ້ໃໝ່ ກໍຄືຜົນງານຂອງເອື້ອຍນ້ອງເພດຍິງ ທີ່ສາມາດຍາດແຍງມາໄດ້ ເວົ້າລວມ ຖືວ່າເປັນຄັ້ງທຳອິດ ທີ່ເພດຍິງໄດ້ຍົກຂຶ້ນ ເປັນຄະນະນໍາຂັ້ນສູງ ຂອງອົງການໄອຍະການປະຊາຊົນສູງສຸດ ເຊິ່ງເປັນປະຫວັດສາດຂອງອົງການໄອຍະການປະຊາຊົນສູງສຸດ ທີ່ບໍ່ມີມາກ່ອນ.
ຂ່າວ: ທະນູທອງ
ພາບ: ເກດສະໜາ