ປະກາດ ເມືອງສິງ ປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ

ພິທີປະກາດ ເມືອງສິງ ແຂວງຫຼວງນ້ຳທາ ເປັນເມືອງຈັດຕັ້ງປະຕິບັດຂະບວນ ການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ໄດ້ຈັດຂຶ້ນໃນວັນທີ 8 ສິງຫາ 2024 ເປັນເມືອງທີ 1 ຂອງແຂວງຫຼວງນ້ຳທາ ພາຍໃຕ້ການເປັນປະທານ ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຄະນະປະຈຳພັກ ຮອງປະທານສູນກາງແນວລາວສ້າງຊາດ, ມີ ທ່ານ ບຸນປີ ໄລປະເສີດ ກຳມະການສູນກາງແນວລາວສ້າງຊາດ, ກຳມະການພັກແຂວງ, ປະທານແນວລາວສ້າງຊາດແຂວງ, ທ່ານ ຄຳຜາຍ ສຸລິຂັນ ຮອງເລຂາພັກເມືອງ ຮອງເຈົ້າເມືອງໆສິງ, ຫ້ອງການອ້ອມຂ້າງເມືອງ, ນາຍບ້ານ 93 ບ້ານ ແລະ ປະຊາຊົນພາຍໃນເມືອງເຂົ້າຮ່ວມ.

ທ່ານ ຄຳຜາຍ ສຸລິຂັນ ໄດ້ກ່າວເປີດພິທີປະກາດເມືອງສິງ ຂຶ້ນຢ່າງເປັນທາງການ ແລະ ທ່ານ ນາງ ສຳລານ ລວງຍາວົງ ກຳມະການປະຈຳພັກເມືອງ, ປະທານແນວລາວສ້າງຊາດເມືອງສິງ ໄດ້ລາຍງານກ່ຽວກັບການຈັດຕັ້ງປະຕິບັດຂະບວນການສ້າງຄອບ ຄົວ ແລະ ບ້ານສາມັກຄີປອງດອງຂອງເມືອງ ໃນໄລຍະຜ່ານມາໂດຍຫຍໍ້ວ່າ: ເມືອງສິງ ຕັ້ງຢູ່ທິດຕາເວັນຕົກສ່ຽງເໜືອຂອງແຂວງຫຼວງນ້ໍາທາ ມີຊາຍແດນຕິດກັບປະເທດຈີນ 75 ກີໂລແມັດ, ຕິດກັບປະເທດມຽນມາຍາວ 49 ກິໂລແມັດ, ຕິດກັບເມືອງນ້ໍາທາຍາວ 33 ກີໂລແມັດ, ຕິດກັບເມືອງລອງຍາວ 66 ກີໂລແມັດ ມີເນື້ອທີທັງໝົດ 1.789 ຕາລາງກິໂລແມັດ ໃນນີ້ພູດອຍກວມເອົາ 85% , ພູພຽງກວມເອົາ 11,4%, ທົ່ງພຽງກວມເອົາ 3,6% ຂອງເນື້ອທີ່ທັງໝົດ, ມີເນື້ອທີ່ກະສິກໍາ 22.898 ຮຕ, ເນື້ອທີ່ປ່າໄມ້ 139.578 ຮຕ ປະຊາຊົນຕັ້ງພູມລຳເນົາຢູ່ກະແຈກກະຈາຍ, ມີການດໍາລົງຊີວິດ ແລະ ຮີດຄອງປະເພນີວັດທະນະທໍາແຕກຕ່າງກັນ, ປະຊາກອນສ່ວນໃຫຍ່ອາໃສຢູ່ເຂດທົ່ງພຽງ , ສ່ວນເຂດຊານເມືອງ ແລະ ເຂດພູດອຍ ແມ່ນຊົນເຜົ່າອາຄາອາໃສຢູ່; ໃນນີ້ເມືອງສິງ ປະກອບມີ 93 ບ້ານ ແບ່ງອອກເປັນ 9 ກຸ່ມບ້ານພັດທະນາ ປະກອບມີ 14 ຊົນເຜົ່າ ຄື: ເຜົ່າລາວ, ເຜົ່າໄຕລື້, ເຜົ່າໄຕດຳ, ເຜົ່າໄຕແດງ, ເຜົ່າໄຕເໜືອ, ເຜົ່າຍວນ, ເຜົ່າກຶມມຸ, ເຜົ່າມົ້ງ, ເຜົ່າແລນແຕນ, ເຜົ່າພູນ້ອຍ, ເຜົ່າອາຄ່າ, ເຜົ່າຫໍ້, ເຜົ່າໂລໂລ ແລະ ເຜົ່າອິວມຽນ ມີພົນລະເມືອງ 44.147 ຄົນ, ຍິງ 22.306 ຄົນ, ມີ 10.454 ຄອບຄົວ. ໃນນີ້ເຜົ່າອາຄ່າກວມເອົາ 53% ຂອງພົນລະເມືອງ; ປະຊາຊົນສ່ວນຫຼາຍ ແມ່ນປູກຝັງ-ລ້ຽງສັດເປັນອາຊີບຕົ້ນຕໍ. ໄລຍະຜ່ານມາແນວລາວສ້າງຊາດເມືອງໄດ້ເອົາໃຈໃສ່ ລົງໃກ້ສິດຕິດແທດກັບປະຊາຊົນ ເພື່ອຊຸກຍູ້ຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ ຕາມມາດຖານ ເງື່ອນໄຂ ແລະ ຄໍາແນະນໍາຂອງສູນກາງແນວລາວສ້າງຊາດວາງອອກ ໂດຍຕິດພັນກັບຂະບວນ ການແຂ່ງຂັນຮັກຊາດ ແລະ ພັດທະນາ ຕາມທິດ 3 ສ້າງຂອງເມືອງ ຊຶ່ງເຮັດໃຫ້ປະຊາ ຊົນມີຄວາມສາມັກຄີປອງດອງ ຊ່ວຍເຫຼືອ ເຊິ່ງກັນ ແລະ ກັນ, ມີຄວາມສະຫງົບສຸກ, ເປັນເຈົ້າຕົນເອງ ແລະ ໄດ້ເຂົ້າຮ່ວມຂະບວນການຕ່າງໆ ຂອງພັກ-ລັດ ຊຶ່ງເຮັດໃຫ້ໃນໄລຍະຜ່ານມາຈໍານວນບ້ານທັງໝົດໃນທົ່ວເມືອງໄດ້ຖືກຮັບຮອງເປັນບ້ານສາມັກຄີປອງດອງ ຕາມມາດຕະຖານທີ່ໄດ້ກໍານົດໄວ້. ໃນພິທີດັ່ງກ່າວນີ້ ທ່ານ ໄທລໍ່ ຫວາເຊັງ ຫົວໜ້າກົມຊົນເຜົ່າ ສູນກາງແນວລາວສ້າງຊາດ ໄດ້ຜ່ານຂໍ້ຕົກລົງຂອງສູນກາງແນວລາວສ້າງຊາດ ວ່າດ້ວຍການຢັ້ງຢືນ ເມືອງສິງ ເປັນເມືອງສາມັກຄີປອງດອງອັນດັບທີ 58 ຂອງລາວ;

ຈາກນັ້ນ ທ່ານ ຮອງປະທານສູນກາງແນວລາວສ້າງຊາດ ໄດ້ມອບໃບຢັ້ງຢືນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃຫ້ທ່ານຮອງເລ ຂາພັກເມືອງ ຕາມຂໍ້ຕົກລົງຂອງສູນກາງແນວລາວສ້າງຊາດ.

ໃນໂອກາດດຽວກັນນີ້, ທ່ານຮອງປະທານສູນກາງແນວລາວສ້າງຊາດຕາງໜ້າຄະ ນະນຳສູນກາງແນວລາວສ້າງຊາດ, ຄະນະນຳຂອງແຂວງ ໄດ້ສະແດງຄວາມຍ້ອງຍໍຊົມ ເຊີຍຕໍ່ອົງການຈັດຕັ້ງແຕ່ລະຂັ້ນ ທີ່ສາມາດຍາດໄດ້ຜົນງານທີ່ດີເດັ່ນ ຊຶ່ງເປັນຜົນງານການນໍາພາລວມຂອງແຂວງເວົ້າລວມ ເວົ້າສະເພາະເມືອງສິງ ວ່າ: ໃຫ້ອົງການປົກ ຄອງເມືອງ ແລະ ບ້ານ ສືບຕໍ່ປຸກລະດົມປະຊາຊົນໃຫ້ມີຄວາມສາມັກຄີປອງດອງເປັນປຶກແຜ່ນແຫນ້ນຫນາ ຊ່ວຍເຫຼືອເຊິ່ງກັນ ແລະ ກັນ; ປະກອບສ່ວນເຂົ້າໃນສອງຫນ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືເມືອງສິງ ເປັນຕົ້ນແມ່ນ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ, ຂອງເມືອງ ຕິດພັນກັບ 2 ວາລະແຫ່ງຊາດ; ສືບຕໍ່ປຸກລະດົມໃຫ້ປະຊາຊົນເປັນເຈົ້າຕົນເອງ, ຂຸດຄົ້ນທ່າແຮງທີ່ບົ່ມຊ້ອນຢູ່ຂັ້ນຮາກຖານບ້ານ ເຊັ່ນ: ຊຸກຍູ້ການປູກ-ການລ້ຽງຢ່າງແຂງແຮງ ໃຫ້ກາຍເປັນສິນຄ້າຂາຍຢູ່ພາຍໃນ ແລະ ສົ່ງອອກຕ່າງເມືອງ, ຕ່າງແຂວງ ແລະ ຕ່າງປະເທດ ເພື່ອສ້າງເສດຖະກິດຄອບຄົວຂອງປະຊາຊົນໃຫ້ໄດ້ຮັບການພັດທະນາດີຂື້ນເທື່ອລະກ້າວ; ພ້ອມກັນນັ້ນ ກໍ່ຕ້ອງສືບຕໍ່ຊຸກຍູ້ໃຫ້ປະຊາຊົນຈົ່ງຮັກສາມູນເຊື້ອກຽດຕິຄຸນທີ່ໄດ້ຮັບໃນຄັ້ງນີ້ ໃຫ້ມີຄວາມຍືນຍົງ ແລະ ພ້ອມກັນແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມໃຫ້ຫຼຸດນ້ອຍຖອຍລົງ.

ຫຼັງຈາກນັ້ນ, ທ່ານ ຮອງປະທານສູນກາງແນວລາວສ້າງຊາດ ແລະ ການນຳແຂວງ, ການນຳເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ໄດ້ຮ່ວມເປີດປ້າຍ ຮັບຮອງເມືອງດັ່ງກ່າວ ເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ແລະ ຮ່ວມເປັນກຽດລັ່ນຄ້ອງ 9 ບາດ ຂອງທ່ານຮອງປະທານສູນກາງແນວລາວສ້າງຊາດ ເພື່ອເປັນສິລິມຸງຄຸນໃນພິທີ, ຕໍ່ຈາກນັ້ນໄດ້ພ້ອມກັນຮັບຊົມການສະແດງສິລະປະ-ວັດທະນະທໍາຊົນເຜົ່າ ທີ່ຕິດພັນກັບວິຖີຊີວິດຂອງເມືອງຕື່ມອີກ.

ຂ່າວ-ພາບ: ວັນດີ ຢ່າງຈູຕົວ