ປະກາດ 12 ບ້ານຂອງເມືອງໄຊທານີ ເປັນບ້ານແບບຢ່າງປະຕິບັດກົດໝາຍ

ໃນຕອນເຊົ້າຂອງວັນທີ 26 ສິງຫາ 2024 ນີ້ ຢູ່ທີ່ສະໂມສອນໂຮງຮຽນ ມສ ໄຜ່ລ້ອມ ຫ້ອງການຍຸຕິທໍາເມືອງ ໄດ້ຈັດພິທີປະກາດຄອບຄົວ ແລະ ບ້ານແບບຢ່າງປະຕິບັດກົດໝາຍ ຂອງກຸ່ມຫົວຊຽງ ຈໍານວນ 12 ບ້ານ ເມືອງໄຊທານີ ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ສັກດາ ອາດວາລີ ຮອງຫົວໜ້າພະແນກຍຸຕິທໍານະຄອນຫວງວຽງຈັນ, ທ່ານ ນາງ ດໍາດວນ ຈັນທະວົງ ຮອງເຈົ້າເມືອງໄຊທານີ, ມີຫົວໜ້າຫ້ອງການ, ຄະນະອົງການປົກຄອງບ້ານ ພ້ອມດ້ວຍຄະນະແກ້ໄຂຂໍ້ຂັດແຍ່ງຂັ້ນບ້ານ ແລະ ພະນັກງານວິຊາການຂອງຫ້ອງການຍຸຕິທຳເມືອງເຂົ້າຮ່ວມ.

ໃນພິທີດັ່ງກ່າວທ່ານ ໄມເຮີ ໄຊເລ່ຍວື ຄະນະຈັດຕັ້ງຫ້ອງການຍຸຕິທໍາເມືອງໄຊທານີ ກໍໄດ້ຂຶ້ນລາຍງານກ່ຽວກັບສະພາບການຈັດຕັ້ງປະຕິບັດວຽກງານການສ້າງຄອບຄົວ ແລະ ບ້ານແບບຢ່າງປະຕິ ບັດກົດໝາຍ ໃນໄລຍະຜ່ານມາບົນພື້ນຖານການລົງຕິດຕາມກວດກາ ແລະ ຊຸກຍູ້ ໂດຍສົມທົບກັບອົງການປົກຄອງບ້ານ ແລະ ຄະນະແກ້ໄຂຂໍ້ຂັດແຍ່ງຂັ້ນບ້ານສາມາດກຳນົດເອົາບ້ານທີ່ເປັນເປົ້າໝາຍໄດ້ 12 ບ້ານ, ເຊິ່ງມີທັງໝົດ 4,279 ຄອບຄົວ, ມີຈໍານວນພົນລະເມືອງ 21,829 ຄົນ, ຍິງ 11,278 ຄົນ. ຜ່ານການຕີລາຄາຕາມ 5 ມາດຖານ ແລະ 6 ມາດຖານ ຂອງການສ້າງບ້ານແບບ ຢ່າງປະຕິບັດກົດໝາຍ ໂດຍແຕ່ລະມາດຕະຖານໄດ້ 90% ຂຶ້ນໄປ.

ບັນດາບ້ານທີ່ໄດ້ຮັບການຮັບຮອງເປັນບ້ານແບບ ຢ່າງປະຕິບັດກົດໝາຍມີ: ບ້ານຫົວຊຽງ, ບ້ານໄຜ່ລ້ອມ, ບ້ານສົມສະຫວັນ, ບ້ານນາຜາສຸກ, ບ້ານໂຄກສະຫວ່າງ, ບ້ານໂນນທອງ, ບ້ານໂພນສະຫວັນ, ບ້ານສ້າງຫົວບໍ່, ບ້ານສ້າງຄອມ, ບ້ານດົງຄວາຍ, ບ້ານດອນລຸ່ມ ແລະ ບ້ານບໍ່ເຫຼັກ ລວມທັງໝົດມີ 4,214 ຄອບຄົວ.

ໃນຕອນທ້າຍຂອງພິທີ ໄດ້ມີການມອບໃບຢັ້ງຢືນໃຫ້ແກ່ບັນດາບ້ານດັ່ງກ່າວ ໃຫ້ກຽດມອບໃບຢັ້ງຢືນໂດຍທ່ານ ນາງ ດໍາດວນ ຈັນທະວົງ ຮອງເຈົ້າເມືອງໄຊທານີ.

ຂ່າວ: ໄຊຍະສິດ

ພາບ: ຊາຍພິມພອນ