ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະຈຸບັນຍັງບໍ່ພົບກໍລະນີສົງໃສໃດໆທີ່ເປັນພະຍາດອັກເສບປອດຮຸນແຮງຢູ່ລາວ

ໂອກາດຖະແຫລງຂ່າວຕໍ່ສື່ມວນຊົນຈັດຂື້ນໃນວັນທີ 5 ກຸມພາ 2020 ຢູ່ກະຊວງສາທາລະນະສຸກ, ນະຄອນຫຼວງວຽງຈັນ, ດຣ ລັດຕະນະໄຊ ເພັດສຸວັນ, ຫົວຫນ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ວ່າ: ມາຮອດວັນທີ 4 ກຸມພານີ້, ພະຍາດອັກເສບປອດທີ່ເກີດຈາກເຊື້ອ novel Corona Virus ໃນສປ ຈີນ ມີທັງໝົດ 24, 324 ກໍລະນີ, ເສຍຊີວິດແລ້ວ 490 ກໍລະນີ, ຄົນປ່ວຍອາການໜັກ 3,219 ກໍລະນີ ຊື່ງມີລາຍງານຈາກ 31 ແຂວງ. ນອກຈາກຢູ່ສປ ຈີນ, ພະຍາດອັກເສບປອດ ສາຍພັນໃໝ່ 2019 ທີ່ເກີດຈາກເຊື້ອ novel Corona Virus ຍັງລະບາດຢູ່ຂົງເຂດອື່ນໆ ໃນ 24 ປະເທດ ຈໍານວນ 174 ຄົນ ແລະ 3 ເຂດປົກຄອງຂອງຈີນ 38 ຄົນ. ໃນຈຳນວນກໍລະນີສົງໄສທັງໝົດ ຢູ່ ສປປ ລາວ ຮອດວັນທີ 5 ກຸມພານີ້ ມີທັງໝົດ 14 ກໍລະນີ ແລະ ຜົນກວດທັງໝົດເປັນຜົນລົບ. ສຳລັບສະເພາະວັນທີ 5 ກຸມພານີ້, ແມ່ນບໍ່ພົບກໍລະນີສົງໄສ, ບໍ່ມີກໍລະນີຕິດຕາມຢູ່ໂຮງໝໍ ແລະ ບໍ່ມີຕົວຢ່າງສົ່ງມາກວດຢູ່ຫ້ອງວິເຄາະ ໃນຂອບເຂດທົ່ວປະເທດ.

ສໍາລັບການຕິດຕາມກໍລະນີ ສໍາຜັດໃກ້ຊິດ ກັບ ກໍລະນີຢັ້ງຢືນ ທີ່ໄດ້ເດີນທາງກັບເມື່ອຈີນແລ້ວໃນວັນທີ 31 ມັງກອນນັ້ນ ແມ່ນຍັງບໍ່ມີອາການ. ນອກນີ້, ສໍາລັບວຽກງານການປິ່ນປົວ, ລັດຖະບານໄດ້ກໍານົດເອົາໂຮງໝໍມິດຕະພາບ (150 ຕຽງ) ແລະ ໂຮງໝໍ 103 ເປັນບ່ອນປິ່ນປົວຄົນຕິດເຊື້ອ, ໃນຂະນະທີ່ ສໍາລັບລະດັບແຂວງ ແມ່ນໄດ້ກຳນົດເອົາໂຮງໝໍແຂວງເປັນບ່ອນປິ່ນປົວ. ນອກຈາກນີ້, ໂຮງໝໍຂັ້ນສູນກາງ ແລະ ໂຮງໝໍຂັ້ນແຂວງ ກໍ່ໄດ້ກະກຽມຄວາມພ້ອມໃນດ້ານຕ່າງໆເຊັ່ນ: ຫ້ອງແຍກປ່ຽວ, ອຸປະກອນປ້ອງກັນຕົນເອງ ແລະ ຝຶກອົບຮົມທວນຄືນໃຫ້ພະນັກງານແພດໝໍ. ຄົນເຈັບຈະຖືກກວດຕົວຢ່າງ ກໍ່ຕໍ່ເມື່ອມີອາການເປັນໄຂ້ຂຶ້ນສູງ, ໄອ, ແລະ ຫາຍໃຈຍາກ ຊຶ່ງເຄີຍເດີນທາງມາຈາກປະເທດຈີນພາຍໃນໄລຍະເວລາ 14 ມື້ກ່ອນເລີ່ມຕົ້ນເຈັບປ່ວຍ ຊຶ່ງຈະບໍ່ໄດ້ເສຍຄ່າໃຊ້ຈ່າຍໃດໆເລີຍ.

ທ່ານຫົວໜ້າກົມຄວບຄຸມພະຍາດຕິດຕໍ່ໃຫ້ຮູ້ຕື່ມວ່າ: ກະຊວງສາທາລະນະສຸກ ໄດ້ເຮັດວຽກຢ່າງໃກ້ຊິດກັບມະຫາວິທະຍາໄລແຫ່ງຊາດ ໃນການຕິດຕາມເຝົ້າລະວັງນັກສຶກສາຈີນ ທີ່ກໍາລັງສຶກສາຢູ່ລາວ ແຕ່ປະຈຸບັນຍັງບໍມີໃຜສະແດງອາການເທື່ອ. ມາເຖິງປະຈຸບັນ, ກະຊວງສາທາລະນະສຸກ ຍັງບໍ່ມີຄໍາສັ່ງແນະນໍາ ໃຫ້ປິດຫໍພັກໂຮງຮຽນເທື່ອ ແຕ່ກໍ່ໄດ້ຂໍການຮ່ວມມືນໍາບັນດາໂຮງຮຽນ ແລະ ຜູ້ປົກຄອງ ຈົ່ງເອົາໃຈໃສ່ຕິດຕາມສຸຂະພາບຂອງລູກຫລານຂອງທ່ານຢ່າງໃກ້ຊິດ; ຖ້າຫາກເຂົາເຈົ້າບໍ່ສະບາຍ ກໍ່ຂໍໃຫ້ເຂົາເຈົ້າພັກຜ່ອນຢູ່ເຮືອນ ແລະ ຜູ້ປົກຄອງກໍ່ຕ້ອງພາໄປກວດສຸຂະພາບຢູ່ໂຮງໝໍ ເພື່ອເປັນການຫລຸດຜ່ອນຄວາມສ່ຽງໃນການກະຈາຍເຊື້ອພະຍາດ ຊຶ່ງບໍ່ຈໍາກັດພຽງແຕ່ພະຍາດນີ້ເທົ່ານັ້ນແຕ່ຍັງລວມເຖິງພະຍາດຕິດຕໍ່ອື່ນໆອີກດ້ວຍ.