ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະຈຸບັນລາວຍັງສືບຕໍ່ຕິດຕາມສະພາບການລະບາດຂອງພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫລືໂຄໂຣນາໄວຣັສ ແລະເຝົ້າລະວັງຢ່າງເຂັ້ມງວດ

ປະຈຸບັນລາວຍັງສືບຕໍ່ຕິດຕາມສະພາບການລະບາດຂອງພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫລືໂຄໂຣນາໄວຣັສ ແລະເຝົ້າລະວັງຢ່າງເຂັ້ມງວດ ເຖິງວ່າລາວຍັງບໍ່ພົບກໍລະນີຕິດເຊື້ອພະຍາດກໍ່ຕາມ ໂດຍສະເພາະການກັ່ນຕອງຜູ້ໂດຍສານເຂົ້າອອກຕາມດ່ານຊາຍແດນທັງທາງບົກ ແລະທາງອາກາດ ເພື່ອປ້ອງກັນບໍ່ໃຫ້ມີກໍລະນີໃນລາວ.
ທ່ານ ລັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃຫ້ສຳພາດໃນມື້ວານນີ້, ທີ່ກະຊວງສາທາລະນະສຸກວ່າ: ເຖິງວ່າປະເທດເຮົາຍັງບໍ່ພົບກໍລະນີຕິດເຊື້ອພະບາດໂຄໂຣນາກໍ່ຕາມແຕ່ລັດຖະບານກໍ່ຄືກະຊວງສາທາລະນະສຸກໄດ້ເອົາໃຈໃສ່ເຝົ້າລະວັງຢ່າງເຂັ້ມງວດ ໂດຍສະເພາະການແຕ່ງຕັ້ງຄະນະສະເພາະກິດ, ຈັດກອງປະຊຸມເພື່ອລະດົມການຮ່ວມມືກັບຄູ່ຮ່ວມພັດທະນາ ລວມທັງພາກທຸລະກິດ, ເອກະຊົນ ປະກອບສ່ວນເຂົ້າໃນວຽກງານການຕ້ານ ແລະສະກັດກັ້ນພະຍາດໂຄໂຣນາໄວຣສ ເປັນຕົ້ນດ້ານວັດຖຸປັດໃຈຕ່າງໆ ນອກຈາກນີ້ກະຊວງສາທາລະນະສຸກຍັງໄດ້ສຸມໃສ່ແຈກຢາຍເຄື່ອງອຸປະກອນຕ່າງໆທີ່ໄດ້ຮັບການຊ່ວຍເຫລືອຈາກອົງການຈັດຕັ້ງສາກົນໃຫ້ທ້ອງຖີ່ນຮາກຖານຢ່າງທົ່ວເຖິງ ເພື່ອກຽມຄວາມພ້ອມຢ່າງຮອບດ້ານ. ນອກຈາກນີ້ຍັງສືບຕໍ່ດຳເນີນການກັ່ນຕອງ ແລະ ຕິດຕາມຢ່າງໃກ້ຊິດ ໂດຍສະເພາະແມ່ນບັນດາກຸ່ມຄົນທີ່ເດີນທາງໄປເຂດລະບາດ ແລະ ຕິດ ຕາມບັນດາກຸ່ມຄົນທີ່ເຂົ້າມາເຮັດວຽກຕາມສະຖານທີ່ເຮັດວຽກຕ່າງໆ. ສໍາລັບການຕິດຕາມກໍລະນີຜູ້ສໍາຜັດໃກ້ຊິດກັບຄົນເຈັບທີ່ຖືກຢັ້ງຢືນວ່າຕິດເຊື້ອພະຍາດໂຄໂຣນາ ຊຶ່ງເປັນນັກທ່ອງທ່ຽວທີ່ເຂົ້າມາທ່ຽວລາວແລ້ວກັບເມືອຈີນໄປກວດພົບຢູ່ຈີນນັ້ນ, ພວກເຮົາກໍ່ໄດ້ມີການຕິດຕາມຢ່າງໃກ້ຊິດ ທັງບຸກຄົນທີ່ເຮັດວຽກໃນການບໍລິການກຸ່ມທ່ອງທ່ຽວ, ພະນັກງານຂັບລົດ, ຜູ້ບໍລິການໃນໂຮງແຮມ, ຮ້ານອາຫານ, ສະຖານທີ່ທ່ອງທ່ຽວ, ທຸກຄົນທີ່ມີການສຳພັດຢູ່ແຂວງຫຼວງພະບາງ, ແຂວງຫຼວງນໍ້າທາ ແລະ ອຸດົມໄຊ ແມ່ນໄດ້ມີການຕິດຕາມຢ່າງໃກ້ຊິດ ແລະ ເຫັນວ່າທັງໝົດຍັງມີສຸຂະພາບແຂງແຮງດີ.
ໂອກາດນີ້ຫົວໜ້າພະແນກຄວບຄຸມພະຍາດຕິດຕໍ່ ຍັງໄດ້ຊີ້ແຈງເຖິງກໍລະນີທີ່ມີຂ່າວລືວ່າມີຄົນຕິດ ເຊື້ອຈຳນວນ 8 ຄົນ ທີ່ແຂວງຫຼວງນໍ້າທານັ້ນແມ່ນບໍ່ມີຄວາມຈິງ, ທຸກຂ່າວລືທີ່ເກີດຂຶ້ນພາກສ່ວນກ່ຽວຂ້ອງໄດ້ມີທີມການໂຕ້ຕອບໄວພາກສະໜາມລົງໄປສອບສວນ ແລະ ຖ້າມີກໍລະນີສົງໃສ ພ້ອມທັງເກັບຕົວຢ່າງມາກວດທັນທີ, ສະນັ້ນໃຫ້ໜັ້ນໃຈວ່າຖ້າມີຫຍັງເກີດຂຶ້ນຈະແຈ້ງໃຫ້ສັງຄົມຊາບຢ່າງແນ່ນອນ. ສ່ວນສະພາບການລະບາດຂອງພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫລືໂຄໂຣນາໄວຣັສຢູ່ຈີນ ນັບມາຮອດວັນທີ 10 ກຸມພາ 2020 ມີລາຍງານຜູ້ຕິດເຊື້ອທັງໜົດ 42,638 ກໍລະນີ ແລະເສຍຊີວິດ 1,016 ກໍລະນີຈາກ 31 ແຂວງ.


ຂ່າວ: ຈັນທະສອນ ສີຫານາດ