ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະຈຸບັນ ທົ່ວໂລກມີຜູ້ຕິດເຊື້ອພະຍາດໂຄວິດ19 ທັງໝົດ 6.678.992 ຄົນ

ປະຈຸບັນ ທົ່ວໂລກມີຜູ້ຕິດເຊື້ອພະຍາດໂຄວິດ19 ທັງໝົດ 6.678.992 ຄົນ, ເພີ່ມຂຶ້ນ 116.514 ຄົນ, ເສຍຊີວິດ 391.584 ຄົນ, ຂະນະທີ່ ສປປ ລາວ ຍັງມີຜູ້ຕິດເຊື້ອກໍາລັງປິ່ນປົວຢູ່ໂຮງໝໍພຽງຄົນດຽວ.
ດຣ. ພອນປະເສີດ ໄຊຍະມຸງຄຸນ, ຮອງຫົວໜ້າ ກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 5 ມິຖຸນານີ້ ເຖິງສະພາບການຄວບຄຸມໂຄວິດ19 ວ່າ: ວັນທີ 4 ມິຖຸນາ 2020, ໄດ້ເກັບຕົວຢ່າງມາກວດວິເຄາະທັງໝົດ 261 ຄົນ, ທັງໝົດແມ່ນແຮງງານລາວທີ່ກັບມາແຕ່ໄທ. ຜົນກວດ ມື້ວານນີ້ ບໍ່ພົບເຊື້ອ. ແລະບໍ່ມີຜູ້ຕິດເຊື້ອໃໝ່.
ວັນທີ 4 ມິຖຸນາ 2020 ມີຜູ້ເດີນທາງເຂົ້າມາ ສປປ ລາວ ທັງໝົດ 2,498 ຄົນ, ໃນນັ້ນຜ່ານດ່ານລາວ-ໄທ 1,720 ຄົນ , ຜ່ານດ່ານລາວ-ຈີນ 28 ຄົນ, ຜ່ານດ່ານລາວ-ຫວຽດນາມ 750 ຄົນ. 54 ມື້ແລ້ວທີ່ບໍ່ພົບຜູ້ຕິດເຊື້ອໃໝ່ ສ່ວນຄົນເຈັບ ທີ່ນອນຕິດຕາມຢູ່ໂຮງໝໍມິດຕະພາບ 1 ຄົນ, ເປັນເພດຊາຍ ກໍມີອາການປົກກະຕິດີ .
ປະຈຸບັນການຖ່າຍທອດສຽງ ພິທີຖະແຫລງຂ່າວປະຈໍາວັນໄດ້ຢຸດຕິແລ້ວແຕ່ວັນທີ 3 ມິຖຸນາ2020 ຂໍໃຫ້ທ່ານຕິດຕາມຂ່າວ ຈາກພາກປົກກະຕິຂອງໂທລະພາບ, ວິທະຍຸກະຈາຍສຽງ, ໜັງສືພິມ ແລະ ສື່່ຕ່າງໆ. ນອກຈາກນັ້ນ ທ່ານຍັງສາມາດຕິດຕາມໄດ້ຈາກເວັບໄຊ້ຂອງຄະນະສະເພາະກິດຄື: www.covid19.gov.la ແລະ ເຟດບຸກຂອງສູນຂ່າວສານການແພດ ແລະ ສຸຂະສຶກສາ.