ວັນທີ 21 ກຸມພາ 2021 ນີ້ ປະຊາຊົນບັນດາເຜົ່າຜູ້ມີສິດປ່ອນບັດເລືອກຕັ້ງ ທົ່ວແຂວງຫຼວງພະບາງ ໄດ້ຮ່ວມກັນອອກມາໃຊ້ສິດ ປ່ອນບັດເລືອກຕັ້ງຕາມລະບຽບການທີ່ກຳນົດໄວ້ ໃນລັດຖະທຳມະນູນ ແລະກົດໝາຍ ສະເພາະໜ່ວຍປ່ອນບັດເລືອກຕັ້ງ ໜ່ວຍທີ່ 43 ມະຫາວິທະຍາໄລສຸພານຸວົງ ນະຄອນ ຫຼວງພະບາງ ໄດ້ມີການນຳຂອງແຂວງ ພ້ອມດ້ວຍ ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 6 ແຂວງຫຼວງພະບາງ ແລະສະມາຊິກສະພາປະຊາຊົນແຂວງຫຼວງພະບາງ ປະຈຳນະຄອນ ຫຼວງພະບາງ ແລະຜູ້ມີສິດປ່ອນບັດເລືອກຕັ້ງ ພາຍໃນໜ່ວຍເຂົ້າຮ່ວມ.
ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ປະທານຄະນະກຳມະການເລືອກຕັ້ງຂັ້ນນະຄອນ ຫຼວງພະບາງ ໄດ້ກ່າວເປີດພິທີວ່າ: ເພື່ອປະຕິບັດຕາມລັດຖະທຳມະນູນ ແລະກົດໝາຍ ກ່ຽວກັບການປ່ອນບັດເລືອກຕັ້ງ ຄະນະພັກ-ອົງການປົກຄອງແຕ່ລະຂັ້ນ ໄດ້ຖືເອົາບັ້ນເລືອກຕັ້ງຄັ້ງນີ້ ເປັນປາງບຸນໃຫຍ່ ແລະປຸກລະດົມໃຫ້ທົ່ວສັງຄົມປະກອບສ່ວນ ເຮັດໃຫ້ການປ່ອນບັດເລືອກຕັ້ງ ຮັບປະກັນ 3 ຄາດໝາຍຄື: ຜູ້ມີສິດປ່ອນບັດ ຕື່ນຕົວໄປໃຊ້ສິດ 100%, ຮັບປະກັນການປ່ອນບັດຖືກຕ້ອງ-ບໍ່ມີບັດຕຕາຍ 100% ແລະມື້ປ່ອນບັດເລືອກຕັ້ງ ຕ້ອງມີຄວາມສະຫງົບປອດໄພ 100%.
ສໍາລັບເຂດເລືອກຕັ້ງທີ່ 6 ແຂວງຫຼວງພະບາງ ມີຜູ້ລົງສະໝັກຮັບເລືອກຕັ້ງ ເປັນສະມາຊິກສະພາແຫ່ງຊາດທັງໝົດ 13 ທ່ານ, ຍິງ 3 ທ່ານ, ໃນນີ້ ມາຈາກສູນກາງ 4 ທ່ານ ແລະພາຍໃນແຂວງ 9 ທ່ານ, ເຊິ່ງຈະໄດ້ເລືອກເອົາ 10 ທ່ານ. ສ່ວນຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງ ມີທັງໝົດ 57 ທ່ານ ຍີງ 13ທ່ານ, ເລືອກເອົາ 33 ທ່ານ. ປະຈຸບັນທົ່ວແຂວງ ມີພົນລະເມືອງທັງໝົດ 474.744 ຄົນ, ຍິງ 231.294 ຄົນ ໃນນັ້ນ ມີປະຊາຊົນອາຍຸ 18 ປີຂື້ນໄປຕາມບັນຊີສຳມະໂນຄົວ ທັງໝົດ 283.009 ຄົນ, ຍິງ 138.112 ຄົນ, ຜ່ານການເກັບກຳຂໍ້ມູນຕົວຈິງ ຜູ້ສາມາດໃຊ້ສິດປ່ອນບັດຕາມລະບຽບການທັງໝົດ 256.460 ຄົນ, ຍິງ 127.104 ຄົນ, ມີໜ່ວຍປ່ອນບັດເລືອກຕັ້ງຄົງທີ່ 677 ໜ່ວຍປ່ອນບັດເຄື່ອນທີ່ 106 ໜ່ວຍ, ສະເພາະໜ່ວຍປ່ອນບັດເລືອກຕັ້ງທີ່ 43 ມະຫາວິທະຍາໄລສຸພານຸວົງ ນະຄອນ ຫຼວງພະບາງ ໄດ້ມີການນຳຂອງແຂວງ ພ້ອມດ້ວຍ ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 6 ແຂວງຫຼວງພະບາງ ແລະສະມາຊິກສະພາປະຊາຊົນແຂວງຫຼວງພະບາງ ປະຈຳນະຄອນ ຫຼວງພະບາງ ແລະຄູ-ອາຈານ ແລະນັກສຶກສາພາຍໃນມະຫາວິທະຍາໄລສຸພານຸວົງ ຜູ້ມີສິດປ່ອນບັດເລືອກຕັ້ງ ຮ່ວມກັນໃຊ້ສິດປ່ອນບັດເລືອກຕັ້ງ ເຂົ້າຮ່ວມຫຼາຍກ່ວາ 500 ຄົນ, ສ່ວນແຕ່ລະໜ່ວຍປ່ອນບັດເລືອກຕັ້ງໃນທົ່ວແຂວງຫຼວງພະບາງ ໄດ້ດຳເນີນການປ່ອນບັດເປັນເອກະພາບພ້ອມກັນໃນຂອບເຂດທົ່ວປະເທດ ໃນວັນທີ່ 21 ກຸມພາ 2021 ແລະຕັ້ງຄາດໝາຍໃຫ້ໄດ້ລາຍງານຜົນການປ່ອນບັດ ໃນເວລາ 17 ໂມງ 00 ຂອງວັນດຽວກັນ.
ຂ່າວ: ອາພຸດເດດ ບຸບຜາ
Loading...