ໃນປີ 2019-2020 ເຈົ້າໜ້າທີ່ສະກັດກັ້ນ ແລະຕ້ານຢາເສບຕິດແຂວງຫຼວງພະບາງ ໄດ້ສຸມໃສ່ການໂຄສະນາຜົນຮ້າຍຂອງຢາເສບຕິດ ຢູ່ສະຖາບັນການສຶກສາ ແລະເຂດຊຸມຊົນ ຢ່າງຕໍ່ເນື່ອງ ເພື່ອໃຫ້ທຸກຄົນໃນສັງຄົມໄດ້ເປັນເຈົ້າການປະກອບສ່ວນ ວຽກງານຕ້ານ ແລະສະກັດກັ້ນບັນຫາຢາເສບຕິດ, ທັງຮັບຮູ້ໄດ້ຜົນຮ້າຍ ແລະໄພອັນ​ຕະລາຍຂອງຢາເສບຕິດ.

ພັນໂທ ບົວວັນ ແສນພົງພັນ ຫົວໜ້າພະແນກກວດກາ ແລະຄວບຄຸມຢາເສບຕິດ ກອງບັນຊາການ ປກສ ແຂວງ ໄດ້ໃຫ້ສຳພາດວ່າ: ໃນໄລຍະຜ່ານມາ ໄດ້ປະສານສົມທົບກັບທຸກພາກສ່ວນ ເພື່ອສ້າງແຜນຕິດຕາມເປົ້າໝາຍຜະລິດ, ຄ້າຂາຍ ແລະເສບຢາເສບຕິດ, ທັງໄດ້ຈັດຕັ້ງການເຝົ້າລະ​ວັງ ການລັກລອບປູກຝີ່ນຄືນໃໝ່ ແລະດຳເນີນການສ້າງສະຖາບັນການສຶກສາ, ສຳນັກງານ-ອົງການ ແລະບ້ານປອດຢາເສບຕິດຢ່າງຕໍ່ເນື່ອງ, ເຮັດໃຫ້ວຽກງານແຕ່ລະດ້ານປະສົບຜົນສຳເລັດ ໂດຍພື້ນຖານ ອັນພົ້ນເດັ່ນ ແມ່ນການມ້າງລາຍຄະດີກ່ຽວກັບຢາເສບຕິດໄດ້ 244 ເລື່ອງ ເຊີ່ງໄດ້ສັງລວມສົ່ງໃຫ ອົງການໄອຍາການປະຊາຊົນແຂວງ ຖະ​ແຫລງສັ່ງຟ້ອງ ຄະດີຢາເສບຕິດຂື້ນສານ ມີຜູ້ຖືກຫາ 247 ຄົນ, ຍີງ 23 ຄົນ, ແຕ່ໂດຍລວມຍັງເຫັນວ່າ ການປະກອບສ່ວນຂອງຄົນໃນສັງຄົມ ຕໍ່ວຽກງານຕ້ານ ແລະສະກັດກັ້ນ ບັນຫາຢາເສບຕິດ ຍັງບໍ່ທັນເລິກເຊີ່ງ ແລະກວ້າງຂວາງເທົ່າທີ່ຄວນ.

ມາຮອດເດືອນຕຸລາ ປີ 2020 ນີ້ ສານປະຊາຊົນແຂວງໄດ້ທຳການຕັດສີນຄະດີ ໃຫ້ໃຊ້ໄດ້ຢ່າງເດັດຂາດແລ້ວ ມີ 161 ເລື່ອງ, ມີນັກໂທດ 182 ຄົນ, ຍີງ 15 ຄົນ, ໃນນີ້ ຕັດສີນປະຫານຊິວິດ 4 ຄົນ, ຕັດສີນຕັດອິດສະຫຼະພາບ ຈຳຄຸກ ຕະຫລອດຊີວິດມີ 9 ຄົນ, ມີຂອງກາງປະເພດຢາບ້າ 103.125 ເມັດ, ເຮໂລອີນ 400 ກລາມ, ຢາໄອອ໌ຫຼາຍກ່ວາ 320 ກລາມ, ກັນຊາແຫ້ງຫຼາຍກ່ວາ 138 ກລາມ, ຄາເຟອີນຫຼາຍກ່ວາ 418 ກລາມ, ສານເຄມີ 1,3 ກລາມ, ແປ້ງຟຸ່ນສີຂາວຫຼາຍກ່ວາ 6 ກລາມ, ແປ້ງຟຸ່ນສີແດງເກືອບ 1 ກລາມ, ຢາຟີ່ນຫຼາຍກ່ວາ 679 ກລາມ, ແກ່ນຟີ່ນ 400 ກລາມ, ລວມທັງອຸປະກອນການເສບຢາ ແລະສິ່ງຫຸ້ມຫໍ່ ເຊີ່ງໄດ້ນຳມາຈູດທຳລາຍ ໃນພິທີສະເຫລີມສະຫລອງ ວັນແຫ່ງຊາດຕ້ານຢາເສບຕິດ ວັນທີ່ 12 ຕຸລາ ຄົບຮອບ 19 ປີ ທີ່ຈັດຂື້ນໃນກາງເດືອນຕຸລາຜ່ານມາ ຍົກເວັ້ນປະເພດຢາຟີ່ນ ເພາະຈະນຳໃຊ້ເຂົ້າທາງວິທະຍາສາດການແພດໃນຂັ້ນຕໍ່ໄປ.

Loading...