ປະຊາຊົນບ້ານປ່າໄລ່ ຫລາຍກວ່າ 60 ຄອບຄົວ ໄດ້ຮັບຜົນກະທົບຈາກນ້ຳຖ້ວມ

ໃນໄລຍະນີ້ຫລາຍພື້ນທີ່ຂອງປະເທດລາວມີຝົນຕົກຢ່າງຕໍ່ ເນື່ອງເຮັດໃຫ້ນ້ຳຫລາຍສາຍມີລະດັບນ້ຳສູງຂຶ້ນເປັນຕົ້ນ ສາຍນ້ຳທີ່ເປັນສາຂາຂອງແມ່ນ້ຳຂອງ, ຊຶ່ງມີລະດັບນ້ຳເພີ່ມຂຶ້ນສູງ ເຮັດໃຫ້ສາຍນ້ຳທີ່ໄຫລປ່ອງໃສ່ແມ່ນ້ຳຂອງມີການລະບາຍໄດ້ບໍ່ທັນ ເຮັດໃຫ້ບາງພື້ນທີ່ທີ່ຕໍ່າ ແລະ ຢູ່ລຽບຕາມແຄມນ້ຳ ເກີດມີນ້ຳຖ້ວມຂັງ ໃນນີ້, ເມືອງທ່າພະບາດ ແຂວງບໍລິຄຳໄຊ ກໍມີຫລາຍບ້ານ ຖືກນ້ຳຖ້ວມ ເປັນຕົ້ນ ບ້ານປ່າໄລ່ ເຮັດໃຫ້ນ້ຳຖ້ວມບ້ານເຮືອນ ແລະ ພື້ນທີ່ທໍາການຜະລິດຂອງປະຊາຊົນເປັນຈໍານວນຫລວງຫລາຍ.

ທ່ານ ວຽງສະຫວັນ ບານທະວົງ ນາຍບ້ານໆປ່າໄລ່ ເມືອງທ່າພະບາດ ໄດ້ໃຫ້ຮູ້ໃນວັນທີ 26 ສິງຫາ 2024 ນີ້ວ່າ: ນັບແຕ່ວັນທີ 23 ສິງຫາ 2024 ເປັນຕົ້ນມາ ລະດັບນ້ຳມັງ ມີປະລິມານເພີ່ມຂຶ້ນສູງເຮັດໃຫ້ນ້ຳໄຫລເຂົ້າຖ້ວມເຮືອນພໍ່ແມ່ປະຊາຊົນຫລາຍກວ່າ 60 ຄອບຄົວ ມີລະດັບຄວາມສູງເຖິງ 1-2 ແມັດ ພ້ອມນີ້ຍັງມີນາ, ສວນໄດ້ຮັບຜົນກະທົບຈາກນໍ້າຖ້ວມປະມານ 70% ຂອງພື້ນທີ່ທັງໝົດ.

ປັດຈຸບັນ ລະດັບນໍ້າແມ່ນຍັງສືບຕໍ່ເພີ່ມຂຶ້ນເລື້ອຍໆ, ຊຶ່ງທາງອົງການປົກຄອງບ້ານ ໄດ້ແຈ້ງເຕືອນ ໃຫ້ພໍ່ແມ່ປະຊາຊົນ ເຄື່ອນ ຍ້າຍວັດຖຸສິ່ງຂອງ ແລະ ສັດລ້ຽງຂອງຕົນໄປໄວ້ໃນທີ່ສູງ ພ້ອມທັງໄດ້ເຝົ້າລະວັງ ເພື່ອກຽມຄວາມພ້ອມຮັບມືກັບໄພພິບັດຄັ້ງນີ້ໃຫ້ທັນເຫດການ ແລະ ໃຫ້ໄດ້ຮັບຜົນກະທົບໃຫ້ໜ້ອຍທີ່ສຸດ.