ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປະຊາຊົນເມືອງຫລວງນໍ້າທາ ມີລາຍຮັບຈາກການລົງທຶນຂອງບໍລິສັດຈາກປະເທດ
ປັດຈຸບັນ ການເກັບກູ້ຖົ່ວເຫລືອງຂອງບໍລິສັດ ເຖິງເຟີຍ ການຄ້າ ແລະ ສົ່ງເສີມກະສິກຳຈຳກັດຜູ້ດຽວຢູ່ເມືອງ ແລະ ແຂວງຫລວງນ້ຳທາ ໄດ້ 30% ແລ້ວໃນເນື້ອທີ່ທັງໝົດ 327 ເຮັກຕາ ແລະ ຄາດວ່າຮອດທ້າຍເດືອນພຶດສະພາ 2024 ຈະເກັບກູ້ຖົ່ວເຫລືອງໃຫ້ສຳເລັດ ເພື່ອໃຫ້ທັນກັບລະດູການ.
ທ່ານ ຈຽງ ຊາງຈີ ຫົວໜ້າ ບໍລິສັດເຖິງເຟີຍ ການຄ້າ ແລະ ສົ່ງເສີມກະສິກຳ ຈຳກັດຜູ້ດຽວ ໄດ້ສຳພາດຕໍ່ສື່ມວນຊົນແຂວງຫລວງນໍ້າທາ ໃນວັນທີ 24 ເມສາ 2024 ນີ້ວ່າ: ບໍລິສັດ ເຖິງເຟີຍ ການຄ້າ ແລະ ສົ່ງເສີມກະສິກຳ ຈຳກັດ ຜູ້ດຽວ ເລີ່ມປູກໝາກຖົ່ວເຫລືອງພາຍໃນເມືອງຫລວງນໍ້າທາ ມາແຕ່ປີ 2020, ແຕ່ບໍ່ໄດ້ຮັບຜົນຕາມລະດັບຄາດໝາຍທີ່ວາງໄວ້ ເນື່ອງຈາກສະ ພາບການລະບາດພະຍາດໂຄວິດ-19, ໃນປີ 2022 ພັດຖືກນໍ້າຖ້ວມ ເຮັດໃຫ້ການເກັບກູ້ບໍ່ໄດ້ຮັບຜົນເຊັ່ນດຽວກັນ.
ສຳລັບປີ 2023 ບໍລິສັດໄດ້ປູກຖົ່ວເຫລືອງໃນເນື້ອທີ່ 65 ເຮັກຕາ, ຜົນຜະລິດໄດ້ 500 ໂຕນ, ສ່ວນປີ 2024 ນີ້ ທາງບໍລິສັດ ໄດ້ສໍາປະທານ ເຊົ່າເນື້ອທີ່ນາຂອງປະຊາຊົນ ເພື່ອປູກຖົ່ວເຫລືອງເພີ່ມອີກເປັນ 327 ເຮັກຕາ ໃນ 10 ບ້ານ, ຄາດວ່າຜົນຜະລິດຈະໄດ້ 3.300 ໂຕນ, ສະເລ່ຍ 1 ເຮັກຕາຕໍ່ 10 ໂຕນ, ເຊິ່ງເລີ່ມປູກມາແຕ່ເດືອນມັງກອນຜ່ານມາ, ປັດຈຸບັນສາມາເກັບກູ້ໝາກຖົ່ວເຫລືອງໄດ້ແລ້ວ 30% ແລະ ຄາດວ່າຮອດທ້າຍເດືອນພຶດສະພາ 2024 ຈະເກັບກູ້ຖົ່ວເຫລືອງໃຫ້ສຳເລັດ.
ສໍາລັບແຜນການປີ 2025 ທາງບໍລິສັດຈະສືບຕໍ່ລົງທຶນ ເຊົ່າ ເນື້ອທີ່ປູກຖົ່ວເຫລືອງໃຫ້ໄດ້ 400 ເຮັກຕາ, ພ້ອມທັງສົ່ງ ເສີມໃຫ້ປະຊາຊົນມີສ່ວນຮ່ວມປູກ 100 ເຮັກຕາ.
ຂ່າວ: ມຸນຕີ