ໃນວັນທີ 26 ກໍລະກົດ 2024, ທ່ານ ບຸນຈັນ ປານຟອງເພັດ ເຈົ້າເມືອງໆໂພນທອງ, ແຂວງຫລວງພະບາງ ພ້ອມດ້ວຍຄະນະຕອບໂຕ້ໄພພິບັດ ແລະ ອົງການກາແດງ ປະຈຳເມືອງໂພນທອງ ລົງກວດກາປະເມີນຄວາມເສຍຫາຍຕໍ່ກັບເຫດການ ນໍ້າ ຖ້ວມ ຢູ່ບ້ານດອນເງິນ ເມືອງໂພນທອງ ທີ່ເກີດຂຶ້ນໃນວັນທີ 25 ກໍລະກົດ 2024 ຜ່ານມາ ພ້ອມທັງນຳເອົາເຄື່ອງນຸ່ງຫົ່ມ, ເຂົ້າສານ, ອາຫານແຫ້ງ, ເຄື່ອງໃຊ້ຈຳເປັນ ພ້ອມດ້ວຍ ປັດໄຈຈຳນວນໜຶ່ງ ໃຫ້ຄອບຄົວ ທີ່ຖືກຜົນກະທົບຈາກເຫດການຄັ້ງນີ້ ຄອບຄົວລະ 500.000 ກີບ ເພື່ອຊ່ວຍເຫລືອບັນເທົາທຸກ ໃຫ້ປະຊາຊົນ ທີ່ໄດ້ຮັບຜົນກະທົບ ໃນເບື້ອງຕົ້ນ.
ຜ່ານການລົງກວດກາ ການປະເມີນຄວາມເສຍຫາຍຈາກເຫດການໄພນໍ້າຖ້ວມທີ່ບ້ານດອນເງິນ ໃນຄັ້ງນີ້, ມີຈຳນວນຄອບ ຄົວ ທີ່ຖືກຜົນກະທົບ ທັງໝົດ 13 ຄອບຄົວ ໃນນັ້ນ, ຄອບຄົວທີ່ຖືກຜົນກະທົບໜັກ 5 ຄອບຄົວ, ມີຜູ້ບາດເຈັບ 1 ຄົນ, ເຂົ້າ ເປືອກເສຍຫາຍ 8.100 ກວ່າກິໂລກຣາມ, ສັດລ້ຽງປະເພດສັດ ປີກປະມານ 482 ກວ່າໂຕ, ໜູ 35 ໂຕ, ລົດຈັກ 3 ຄັນ. ນອກນີ້, ຍັງມີອຸປະກອນເຄື່ອງໃຊ້ຄົວເຮືອນ, ເຄື່ອງນຸ່ງຫົ່ມ, ວັດຖຸກໍ່ສ້າງ ແລະ ອື່ນໆ ລວມມູນຄ່າຄວາມເສຍຫາຍ ປະມານ 253 ລ້ານກວ່າກີບ.
ໂອກາດດັ່ງກ່າວ, ທ່ານ ບຸນຈັນ ປານຟອງເພັດ ໄດ້ກ່າວໃຫ້ກຳລັງໃຈ ຕໍ່ປະຊາຊົນ ພາຍໃນບ້ານດອນເງິນ ກໍຄື ຄອບຄົວ ທີ່ຖືກຜົນກະທົບ ຈົ່ງພ້ອມກັນຮັກສາຄວາມສາມັກຄີ, ຊ່ວຍເຫລືອເຊິ່ງກັນ ແລະ ກັນ ໃນຍາມພົບອຸປະສັກ ພ້ອມທັງໃຫ້ມີສະຕິໃນທຸກດ້ານ ແລະ ພ້ອມກັນປັບປຸງສ້ອມແປງ ພື້ນທີ່ເສຍຫາຍ, ສະພາບຈິດໃຈໃຫ້ເຂັ້ມແຂງ, ການດຳລົງຊີວິດ ແລະ ພື້ນຖານໂຄງລ່າງ ຂອງບ້ານ ໃຫ້ກັບຄືນສູ່ສະພາບປົກກະຕິ ໂດຍໄວ.
ພ້ອມນີ້, ທ່ານ ບຸນຈັນ ປານຟອງເພັດ ຍັງໄດ້ແຈ້ງເຖິງນັກທຸ ລະກິດ, ບໍລິສັດ, ຜູ້ປະກອບການ, ຫ້າງຮ້ານ, ພໍ່ຄ້າຊາວຂາຍ, ຜູ້ທີ່ ມີນໍ້າໃຈທີ່ຕ້ອງການໃຫ້ຄວາມຊ່ວຍເຫລືອຕ່າງໆ ແກ່ຄອບຄົວປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມ ໃນຄັ້ງນີ້, ສາມາດມາບໍລິຈາກໄດ້ ກັບຄະນະຮັບຜິດຊອບຂອງເມືອງ ຫລື ສາມາດເຂົ້າມາພົວພັນ ມອບດ້ວຍຕົນເອງ ໄດ້ທີ່ ອົງການກາແດງປະຈຳ ເມືອງໂພນທອງ.
ຂ່າວ-ພາບ: ທອງສີ ພົມມະຈັກ
