ໂຄງການກໍ່ສ້າງໂຮງໝໍຫຼັງໃໝ່ ຂອງເມືອງໂພນທອງ ໄດ້ຮັບທຶນຊ່ວຍເຫຼືອລ້າຈາກລັດຖະບານ ສສ ຫວຽດນາມ ລວມມຸນຄ່າທັງໝົດ 12 ຕື້ດົງ ຊຶ່ງໄດ້ເລີ້ມຕົ້ນກໍ່ສ້າງໃນວັນທີ 20 ຕຸລາ 2023 ມາເຖິງ ວັນທີ 28 ມິຖຸນາ 2024 ໄດ້ສໍາເລັດ 100% ແລະໄດ້ຈັດພິທີມອບ-ຮັບ ໃນວັນທີ 24 ກັນຍາ 2024, ມີ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ທ່ານ ຫຼໍວັນມຶງ ຫົວໜ້າຄະນະຂົນຂວາຍ ແຂວງດຽນບຽນ, ພ້ອມການນໍາຂອງທັງສອງແຂວງ ເຂົ້າຮ່ວມ. ການປັບປຸງ ແລະຍົກລະດັບໂຮງໝໍເມືອງໂພນທອງ ຄັ້ງນີ້ປະກອບມີການກໍ່ສ້າງອາຄານປິ່ນປົວຫຼັງໃໝ່ ສອງຊັ້ນຂະໜາດກວ້າງ 15 ແມັດ ຍາວ 34 ແມັດ, ປະກອບມີຫ້ອງປິ່ນປົວຄົນເຈັບ, ຫ້ອງຜ່າຕັດນ້ອຍ, ຫ້ອງຍາມຂອງແພດ ແລະຫ້ອງນ້ຳ ໂດຍປະກອບອຸປະກອນໄຟຟ້າ ແລະນ້ຳສະອາດຕາມສັນຍາ, ພ້ອມນັ້ນ ໄດ້ສ້ອມແປງອາຄານຫຼັງເກົ່າ, ສ້າງປ້ອມຍາມ ນອກອາຄານຂະໜາດ ກວ້າງ 3 ແມັດເຄິ່ງ ຍາວ 3 ແມັດເຄິ່ງ 1 ຫຼັງ, ສ້າງປະຕູໂຂງທາງເຂົ້າຂະໜາດ ກວ້າງ 2 ແມັດ ຍາວ 8 ແມັດ, ກໍ່ສ້າງເຮືອນເຢັນ ຂະໜາດກວ້າງ 4 ແມັດ 6 ແມັດ 1 ຫຼັງ, ເຮືອນຄົວ ສຳລັບພີ່ນ້ອງຄົນເຈັບ ຂະໜາດ ກວ້າງ 3 ແມັດ ຍາວ 5 ແມັດ 1 ຫຼັງ, ໄດ້ສ້ອມແປງຫ້ອງນໍ້າສາທາລະນະຄືນ 1 ຫ້ອງ ແລະກໍ່ສ້າງໃໝ່ 2 ຫ້ອງ, ສະຖານທີ່ບ່ອນບຳບັດນໍ້າເສຍ, ຮ່ອງລະບາຍນໍ້າ ຍາວ 22 ແມັດ, ຮົ້ວກຳແພງອ້ອມສະຖານທີ່ໂຮງໝໍ ຍາວ 365 ແມັດ, ເທເບຕົງເສີມເຫຼັກພາຍໃນເດີ່ນໂຮງໝໍ, ປະກອບອຸປະກອນເຟີນີເຈີ ຕຽງ 4 ໜ່ວຍ, ໂຕະ ແລະຕັ່ງເຮັດວຽກຂອງແພດ ຈຳນວນ 7 ຊຸດ, ໂດຍແມ່ນບໍລິສັດສົມປະສົງ ກໍ່ສ້າງເຄຫະສະຖານ, ຂົວທາງ ແລະຊົນລະປະທານຈຳກັດຜູ້ດຽວ ໃນນາມຜູ້ຮັບເໝົາການກໍ່ສ້າງ. ໂອກາດນີ້ ທ່ານ ຫຼໍວັນມືງ ໄດ້ມີຄໍາເຫັນກ່າວມອບໂຄງການກໍ່ສ້າງ ແລະມອບອຸປະກອນການແພດ ຊ່ວຍເຫຼືອໃຫ້ໂຮງໝໍ ລວມມຸນຄ່າ 500 ລ້ານດົງ, ໃຫ້ກັບ ທ່ານ ບຸນເລື່ອມ ມະນີວົງ ເຊິ່ງທ່ານຮອງເຈົ້າແຂວງຫຼວງພະບາງ ໄດ້ສະແດງຄວາມຂອບໃຈເປັນຢ່າງຍິ່ງ ຕໍ່ຄະນະພັກ ອົງການປົກຄອງແຂວງ ແຂວງດຽນບຽນ ກໍ່ຄືພັກລັດຖະບານ ສສ ຫວຽດນາມ ທີ່ໄດ້ມີຄວາມເປັນຮ່ວງເປັນໄຍ ຕໍ່ປະຊາຊົນລາວ ໂດຍສະເພາະປະຊາຊົນເມືອງໂພນທອງ ແຂວງຫຼວງພະບາງ ໂດຍໄດ້ຮັບທຶນສະໜັບສະໜູນຊ່ວຍເຫຼືອ ດ້ານງົບປະມານກໍ່ສ້າງ ແລະຍົກລະດັບໂຮງໝໍ ໃຫ້ກາຍເປັນຈຸດສູນກາງ ໃນການບໍລິການສຸຂະພາບ ແກ່ປະຊາຊົນຢູ່ຂັ້ນທ້ອງຖິ່ນ ແລະໄດ້ຕອບສະໜອງອຸປະກອນການແພດທິ່ທັນສະໄໝ, ຮັບປະກັນການປິ່ນປົວຄົນເຈັບໃຫ້ທັນກັບເວລາ ແລະສະພາບການ ທ່ານກ່າວຕື່ມວ່າ ການກໍ່ສ້າງ ແລະຍົກລະດັບໂຮງໝໍເມືອງໂພນທອງ ໃຫ້ມີຄວາມທັນສະໄໝ ເປັນການຍົກລະດັບ ທາງດ້ານວິຊາສະເພາະຂອງພະນັກງານແພດໃຫ້ແທດເໝາະກັບສະພາບການຜັນແປໃນແຕ່ລະໄລຍະ ແນໃສ່ເຮັດໃຫ້ກາຍເປັນໂຮງໝໍ ທີ່ສາມາດບໍລິການສັງຄົມ ຕາມນະໂຍບາຍ 5 ດີ 1 ພໍໃຈທີ່ກະຊວງສາທາລະນະສຸກລາວວາງອອກ ຢ່າງມີປະສິດທິພາບ.
ພາບ-ຂ່າວ: ສາຄອນເຮີ
