ລະຫວ່າງວັນທີ 19-20 ຕຸລາ 2023 ອົງການກາແດງແຫ່ງຊາດລາວ ແລະ ອົງການກາແດງແຂວງອຸດົມໄຊ ໄດ້ລົງເຜີຍແຜ່ວຽກງານກາແດງໃຫ້ແກ່ປະຊາຊົນໃນ 18ບ້ານ ຂອງເມືອງໄຊ ແຂວງອຸດົມໄຊ; ໂດຍການເຂົ້າຮ່ວມຂອງທ່ານ ຮສ.ດຣ. ສິງ ເມໂນລາດ ຮອງປະທານອົງການກາແດງແຫ່ງຊາດລາວ, ທ່ານ ສົມດີ ສິດທິປັນຍາ ຮອງເລຂາພັກເຂດນໍ້າແຫງ,ແລະ ອຳນາດການປົກຄອງບ້ານຕ່າງໆ ຄື: ບ້ານນ້ຳແຫງ,ຕົງປຼາງ, ບ້ານແກ, ບ້ານແປຼນ, ສະລວງ, ນ້ຳຈອງ, ມົກຄະ, ບ້ານຫລັກ32, ຫລັກ44,ບ້ານລາວວາ, ບ້ານຢາວ, ປຸ່ງຫວີງ, ປຸ່ງລຽນ, ຫວ້ຍແພ, ພູສະຫວັນ, ກີ້ວເຮ້ຍ,ນາຊາຍທອງ ແລະບ້ານມົກກົກ
ໃນພິທີດັ່ງກ່າວ ທ່ານ ດຣ. ນາງ ສິດທິວອນ ຫົງສາຄອນ ຫົວຫນ້າອົງການກາແດງແຂວງ ອຸດົມໄຊໄດ້ນຳສະເໜີ ປະຫວັດຄວາມເປັນມາ ການເຄື່ອນໄຫວຂອງຂະບວນການກາແດງສາກົນ, ເຄື່ອງໝາຍ ແລະ ການນຳໃຊ້ເຄື່ອງໝາຍມະນຸດສະທຳ, ປະຫວັດ ແລະ ພາລະບົດບາດ, ສິດໜ້າທີ່ ຂອງອົງການກາແດງລາວ ໃນແຕ່ລະໄລຍະ, ຜົນງານການເຄື່ອນໄຫວວຽກງານກາແດງ, ໂດຍສະເພາະ 9 ໜ້າວຽກຕົ້ນຕໍຄື: ການຊ່ວຍເຫຼືອບັນເທົາທຸກເບື້ອງຕົ້ນ, ການບໍລິຈາກເລືອດ-ສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການປະຖົມພະຍາບານ, ການກູ້ໄພສຸກເສີນ, ການໂຄສະນາ ແລະ ຂົນຂວາຍແຫຼ່ງທຶນ, ການສ້າງອາສາສະໝັກກາແດງ, ການສືບທາວຫາຍາດພີ່ນ້ອງ ແລະ ການພົວພັນຮ່ວມມືສາກົນ, ນອກຈາກນັ້ນ, ຍັງໄດ້ນຳສະເໜີກົດໝາຍວ່າດ້ວຍວຽກງານກາແດງ ເຊິ່ງມີຜູ້ເຂົ້າຮ່ວມທັງໝົດ 200 ກວ່າຄົນ, ການເຜີຍແຜ່ວຽກງານກາແດງໃນຄັ້ງນີ້, ກໍ່ເພື່ອໃຫ້ສັງຄົມຮັບຮູ້, ເຂົ້າໃຈ ແລະ ເຮັດໃຫ້ສັງຄົມປະກອບສ່ວນເຂົ້າໃນວຽກງານມະນຸດສະທຳຂອງກາແດງໃຫ້ກ້ວາງຂວາງຂຶ້ນ, ເພື່ອປະກອບສ່ວນຊ່ວຍເຫຼືອໃນການໂຄສະນາປຸກລະດົມ, ປູກຈິດສຳນຶກ, ໃຫ້ຄວາມຮູ້ແກ່ສັງຄົມມີສ່ວນຮ່ວມໃນການບໍລິຈາກເລືອດໃຫ້ຫຼາຍຂຶ້ນ; ໃຫ້ຄວາມຮ່ວມມືໃນການເຄື່ອນໄຫວວຽກງານກາແດງ.
ໂດຍ: ນັກຂ່າວອົງການກາແດງ
