ໃນວັນທີ 13 ສິງຫາ 2024, ຄະນະຮັບຜິດຊອບໄພພິບັດຂອງເມືອງຫ້ວຍຊາຍ ແຂວງບໍ່ແກ້ວ ລົງຕິດຕາມ, ກວດກາຜົນກະທົບ ຈາກນ້ຳໄຫລຊຸ ຢູ່ບ້ານໃຫຍ່ພັດທະນານໍ້າປຸກ ເມືອງຫ້ວຍຊາຍ ນໍາພາໂດຍ ທ່ານ ຄຳເກີ່ງ ຜິວວັນນາ ເຈົ້າເມືອງໆຫ້ວຍຊາຍ ພ້ອມດ້ວຍຂະແໜງການທີ່ກ່ຽວຂ້ອງ.
ທ່ານ ສົງຄາມ ຂັນທິປັນຍາ ນາຍບ້ານໃຫຍ່ພັດທະນານ້ຳປຸກ ໄດ້ລາຍງານເບື້ອງຕົ້ນຈາກເຫດນ້ຳຖ້ວມຄັ້ງນີ້ວ່າ: ເນື່ອງຈາກວ່າຝົນຕົກແຮງຕິດຕໍ່ກັນ ເປັນເວລາຫລາຍຊົ່ວໂມງ ໃນວັນທີ 12 ຫາ 13 ສິງຫາ 2024 ເຮັດໃຫ້ປະລິມານນ້ຳປຸກ ເພີ່ມຂຶ້ນສູງຢ່າງໄວວາ ນ້ຳໄດ້ລົ້ນ ແລະ ໄຫລຊຸ ເຂົ້າຖ້ວມເຮືອນປະຊາຊົນ ເຮັດໃຫ້ເຄື່ອງໃຊ້ໃນເຮືອນທຸກຢ່າງ ລວມເຖິງເຂົ້າເປືອກ, ເຂົ້າສານຖືກເສຍຫາຍ ແລະ ຈຳນວນໜຶ່ງກໍຖືກນ້ຳພັດໄຫລໄປ ເຫດການນ້ຳຖ້ວມຄັ້ງນີ້ເປັນຄັ້ງທີ 3 ຂອງປີນີ້ ຖືວ່າເປັນເຫດການນໍ້າຖ້ວມຄັ້ງໃຫຍ່ໃນຮອບຫລາຍ 10 ປີ, ຊຶ່ງໄດ້ມີເຮືອນປະຊາຊົນເສຍຫາຍ 6 ຫລັງ, ເສັ້ນທາງຖືກນ້ຳເຊາະເຈື່ອນເສຍຫາຍ 3 ຈຸດ, ເສົາໄຟຟ້າລົ້ມ 1 ຕົ້ນ, ເນື້ອທີ່ນາ, ສວນປູກພືດ, ຄອກສັດ, ບໍ່ລ້ຽງກົບ, ລ້ຽງປາ ແລະ ວັດວາອາຮາມ ໄດ້ຮັບຜົນກະທົບເປັນຈຳນວນຫລາຍສົມຄວນ. ບາງຈຸດຖືກນ້ຳຖ້ວມສູງປະມານ 1 ແມັດ, ບາງຈຸດສູງເກືອບ 2 ແມັດ ເຮັດໃຫ້ການສັນຈອນໄປ-ມາພົບຄວາມຫຍຸ້ງຍາກ ແລະ ສ້າງຄວາມເສຍຫາຍທັງຊັບສິນ, ເງິນ, ຄຳ, ສ້າງຄວາມເດືອດຮ້ອນ ໃຫ້ພໍ່ແມ່ປະຊາຊົນ, ແຕ່ເຫດການຄັ້ງນີ້ ບໍ່ມີຄົນໄດ້ຮັບບາດເຈັບ ຫລື ເສຍຊີວິດ ແລະ ຍັງບໍ່ສາມາດປະເມີນມູນຄ່າຄວາມເສຍຫາຍທັງໝົດໄດ້. ຕໍ່ສະພາບການດັ່ງກ່າວ, ຄະນະນຳຂອງເມືອງ ຮ່ວມກັບຫ້ອງການທີ່ກ່ຽວຂ້ອງຂັ້ນແຂວງ, ເມືອງ ແລະ ອົງການປົກຄອງບ້ານ ໄດ້ນຳພາປະຊາຊົນ ຊ່ວຍກັນເກັບມ້ຽນສິ່ງກີດຂວາງທາງນ້ຳ, ສ້ອມແປງເສັ້ນທາງ ໃຫ້ສາມາດສັນຈອນໄປ-ມາໄດ້ຊົ່ວຄາວ ພ້ອມນີ້, ອົງການກາແດງປະຈໍາແຂວງບໍ່ແກ້ວ ກໍໄດ້ມອບເຄື່ອງບັນເທົາທຸກ ໃຫ້ປະຊາຊົນຈຳນວນໜຶ່ງ ເພື່ອແກ້ໄຂໃນເບື້ອງຕົ້ນ.
ໂອກາດນີ້, ທ່ານ ຄຳເກີ່ງ ຜິວວັນນາ ໄດ້ໃຫ້ທິດຊີ້ນຳ ໂດຍເນັ້ນໃຫ້ພາກສ່ວນກ່ຽວຂ້ອງແຕ່ລະຂັ້ນ ຕ້ອງເອົາໃຈໃສ່ ລົງເກັບກຳຂໍ້ມູນສະຖິຕິຜົນເສຍຫາຍທັງໝົດ ພ້ອມທັງໃຫ້ການຊ່ວຍເຫລືອຄອບຄົວທີ່ໄດ້ຮັບຜົນກະທົບໃນເບື້ອງຕົ້ນ ແລະ ໄລຍະຍາວ ຕາມສະພາບຄວາມເປັນຈິງ ໃຫ້ທັນການເປັນສຳຄັນ, ຮຽກຮ້ອງໃຫ້ປະຊາຊົນບັນດາເຜົ່າ ທີ່ອາໄສຢູ່ລຽບຕາມແຄມສາຍນ້ຳຕ່າງໆ ຈົ່ງມີສະຕິລະວັງຕົວສູງ ພ້ອມກັນເຝົ້າລະວັງເຫດການນ້ຳຖ້ວມ ຍົກສູງການປົກປັກຮັກສາປ່າໄມ້ ໂດຍບໍ່ລັກລອບຕັດໄມ້ທຳລາຍປ່າ ພ້ອມໃຈກັນປົກປັກຮັກສາປ່າສະຫງວນເຂດຕົ້ນນ້ຳ, ປ່າສະຫງວນຂອງບ້ານ, ຂອງແຂວງ ກໍຄື ປ່າສະຫງວນແຫ່ງຊາດ ໃຫ້ມີຄວາມອຸດົມສົມບູນແໜ້ນໜາ ຈະຊ່ວຍເຮັດໃຫ້ຜົນກະທົບຈາກໄພທຳມະຊາດ ຫລື ໄພນ້ຳຖ້ວມຫລຸດໜ້ອຍຖອຍລົງ.
ຂ່າວ: ທອງເພັດ
