ປະຊາຊົນ 100 ກວ່າຄອບຄົວ ໄດ້ຮັບການຊົດເຊີຍລ່ວງໜ້າຈາກ ໂຄງການພັດທະນາເຂດເສດຖະກິດໃໝ່ ສີທັນດອນ
ມາຮອດປັດຈຸບັນ, ໂຄງການພັດທະນາເຂດເສດຖະກິດໃໝ່ ສີທັນດອນ ຢູ່ເມືອງໂຂງ, ແຂວງຈໍາປາສັກ ໄດ້ຊົດເຊີຍລ່ວງໜ້າໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການເພື່ອເຂົ້າໄປພັດທະນາກ່ອນ ມີທັງໝົດ 10 ຈຸດ, ກວມເອົາເນື້ອທີ່ 596,56 ເຮັກຕາ, ມູນຄ່າ 72,6 ຕື້ກວ່າກີບ ແລະ 5,7 ລ້ານກວ່າໂດລາສະຫະລັດ, ໃນນີ້ ລວມມີ:
– ໂຄງການສະໜາມກ໊ອບ ບ້ານທ່າມ່ວງ 50 ຄອບຄົວ, ລວມເນື້ອ ທີ່ 133,8 ເຮັກຕາ, ເປັນເງິນ 17,6 ຕື້ກວ່າກີບ.
– ໂຄງການອຸດສາຫະກໍາລ້ຽງປາຄົບວົງຈອນ ບ້ານບຶງງາມ 15 ຄອບຄົວ ລວມເນື້ອທີ່ 44,41 ເຮັກຕາ ເປັນເງິນ 2,6 ຕື້ກວ່າກີບ.
– ໂຄງການກໍ່ສ້າງຕຶກແຄນຄູ່ ບ້ານທ່າຄໍ້ 43 ຄອບບຄົວ ລວມເນື້ອ ທີ່ 188,9 ເຮັກຕາ ເປັນເງິນ 28,2 ຕື້ກວ່າກີບ.
– ໂຄງການສາງສິນຄ້າ ບ້ານບຶງງາມ 6 ຄອບຄົວ, ລວມເນື້ອທີ່ 10,7 ເຮັກຕາ ເປັນເງິນ 2,1 ຕື້ກວ່າກີບ.
– ຊົດເຊີຍທີ່ດິນປະຊາຊົນທີ່ນອນໃນໂຄງການແຫຼ່ງທ່ອງທ່ຽວຄອນພະເພັງ ບ້ານທ່າຄໍ້ 6 ຄອບຄົວ ລວມເນື້ອທີ່ 14,6 ເຮັກຕາ ເປັນເງິນ 2,3 ຕື້ກວ່າກີບ.
– ຄ່າຍົກຍ້າຍຮ້ານຄ້າເກົ່າໃນແຫຼ່ງທ່ອງທ່ຽວນໍ້າຕົກຕາດຄອນພະເພັງ 24 ຮ້ານ ລວມເປັນເງິນ 388,9 ລ້ານກວ່າກີບ.
– ຊົດເຊີຍຄືນໃຫ້ກັບບໍລິສັດ ຍິ່ງໂຊກໄຊ ໂດຍຜ່ານຫ້ອງວ່າການແຂວງຈໍາປາສັກ (ຄະນະກໍາມະການຂັ້ນແຂວງ ຕາມຂໍ້ຕົກລົງ ຂອງນາຍົກລັດຖະມົນຕີ ສະບັບເລກທີ 59/ນຍ, ລົງວັນທີ 30 ສິງຫາ 2018 ແລະ ຂໍ້ຕົກລົງ ຂອງທ່ານເຈົ້າແຂວງ ສະບັບເລກທີ 987/ຈຂ.ຈສ, ລົງວັນທີ 16 ຕຸລາ 2020) ສຳລັບແຫຼ່ງທ່ອງທ່ຽວຄອນພະເພັງ ແລະ ສົມພະມິດ 18 ຕື້ກວ່າກີບ.
– ຊົດເຊີຍໃຫ້ ບໍລິສັດອຸດົມສິນ ບ້ານທ່າມ່ວງ ໂດຍຜ່ານຫ້ອງວ່າ ການແຂວງຈໍາປາສັກ ໃນເນື້ອທີ່ 126 ເຮັກຕາ ເປັນເງິນ 255,751 ໂດລາສະຫະລັດ.
– ຊົດເຊີຍລີສອດນາແປງໃຫ້ບໍລິສັດຍິ່ງໂຊກໄຊ ໂດຍຜ່ານຫ້ອງວ່າການແຂວງຈໍາປາສັັກ ໃນເນື້ອທີ່ 65 ເຮັກຕາ ກັບ 4,623 ຕາ ແມັດ ເປັນເງິນ 5,500,000 ໂດລາສະຫະລັດ.
– ຊົດເຊີຍໂຄງການບ້ານຈັດສັນ (ນອກເຂດ) 10 ຄອບບຄົວ ລວມເນື້ອທີ່ 12,58 ເຮັກຕາ ເປັນເງິນ 1,1 ຕື້ກວ່າກີບ.
ທ່ານ ສົມບູນ ເຮືອງວົງສາ, ຮອງເຈົ້າແຂວງ, ຜູ້ຊີ້ນໍາວຽກງານເສດຖະກິດແຂວງຈໍາປາສັກ ໃຫ້ສໍາພາດຕໍ່ສື່ມວນຊົນລາວ ເມື່ອບໍ່ ດົນມານີ້ວ່າ: ການຊົດເຊີຍດັ່ງກ່າວ ແມ່ນເປັນການຊົດເຊີຍລ່ວງ ໜ້າເພື່ອໃຫ້ໂຄງການໄດ້ເຂົ້າໄປພັດທະນາເນື້ອທີ່ ກ່ອນທີ່ສະພາປະຊາຊົນແຂວງຈະຮັບຮອງເອົາຫົວໜ່ວຍຄ່າຊົດເຊີຍຢ່າງເປັນທາງການ, ເຊິ່ງປະຊາຊົນ 100 ກວ່າຄອບຄົວ ຕ່າງມີຄວາມສະ ໝັກໃຈ ແລະ ເຕັມໃຈຮັບເອົາການຊົດເຊີຍລ່ວງໜ້າ ບົນພື້ນຖານການຄິດໄລ່ລຽງຢ່າງລະອຽດຄ່າຊົດເຊີຍຈາກຄະນະກໍາມະການທີ່ກ່ຽວຂ້ອງໄດ້ຮັບຮອງໃນໄລຍະຜ່ານມາ.
ສໍາລັບການກໍານົດຫົວໜ່ວຍຄ່າຊົດເຊີຍຜົນກະທົບຈາກໂຄງ ການພັດທະນາເຂດເສດຖະກິດໃໝ່ ສີທັນດອນ, ຄະນະກໍາມະ ການທີ່ກ່ຽວຂ້ອງໄດ້ສະເໜີຫາສະພາປະຊາຊົນແຂວງຈໍາປາສັກ ກ່ອນໜ້ານີ້, ເຊິ່ງສະພາປະຊາຊົນແຂວງໄດ້ເນັ້ນໃຫ້ປັບປຸງຄືນທັງ ໝົດ 7 ຈຸດ, ໃນຈໍານວນ 7 ຈຸດດັ່ງກ່າວຄະນະກໍາມະການກ່ຽວ ຂ້ອງໄດ້ປັບປຸງສໍາເລັດແລ້ວ ແລະ ພວມລໍຖ້າເອົາເຂົ້າໄປຄົ້ນຄວ້າ ແລະ ຮັບຮອງໃນກອງປະຊຸມສະພາປະຊາຊົນແຂວງຈໍາປາສັກ ໃນໄວໆ ນີ້, ຫລັງຈາກຮັບຮອງແລ້ວເຈົ້າແຂວງຈໍາປາສັກ ຈິ່ງຈະອອກຂໍ້ຕົກລົງໃນການຈັດຕັ້ງປະຕິບັດຕົວຈິງ.
ຮອງເຈົ້າແຂວງ ໃຫ້ຮູ້ຕື່ມວ່າ: ສໍາລັບປະຊາຊົນ 100 ກວ່າຄອບຄົວທີ່ໄດ້ຮັບເອົາການຊົດເຊີຍລ່ວງໜ້າໄປກ່ອນນັ້ນ, ຄະນະ ກໍາມະການທີ່ກ່ຽວຂ້ອງ ໄດ້ເຮັດບົດບັນທຶກກັບປະຊາຊົນໄວ້ແລ້ວ ໂດຍໄດ້ກໍານົດໄວ້ວ່າ: ຖ້າຫາກຫົວໜ່ວຍຄ່າຊົດເຊີຍທີ່ສະພາປະ ຊາຊົນແຂວງຮັບຮອງ ຫາກເກີນຫົວໜ່ວຍຄ່າຊົດເຊີຍທີ່ປະຊາ ຊົນໄດ້ຮັບເອົາໄປກ່ອນນັ້ນ, ຄະນະກໍາມະການທີ່ກ່ຽວຂ້ອງ ຈະຄິດ ໄລ່ເພີ່ມຄ່າຊົດເຊີຍໃຫ້ປະຊາຊົນຕື່ມອີກ ເພື່ອໃຫ້ເທົ່າກັບທີ່ສະພາປະຊາຊົນແຂວງຮັບຮອງ, ແຕ່ຖ້າຫົວໜ່ວຍຄ່າຊົດເຊີຍທີ່ສະພາປະຊາຊົນແຂວງຮັບຮອງ ຫາກຕໍ່າກວ່າຫົວໜ່ວຍຄ່າຊົດເຊີຍທີ່ປະຊາຊົນໄດ້ຮັບເອົາໄປກ່ອນໜ້ານັ້ນ, ຄະນະກໍາມະການທີ່ກ່ຽວ ຂ້ອງຈະບໍ່ຄິດໄລ່ເງິນຄ່າຊົດເຊີຍສ່ວນທີ່ເກີນທີ່ໄດ້ຈ່າຍໃຫ້ປະຊາ ຊົນໄປກ່ອນແລ້ວກັບຄືນມາແຕ່ຢ່າງໃດ.
ອີງຕາມຂໍ້ມູນຈາກບົດລາຍງານຂອງໂຄງການພັດທະນາເຂດເສດຖະກິດໃໝ່ ສີທັນດອນ ໃຫ້ຮູ້ວ່າ: ເຂດພັດທະນາເສດ ຖະກິດໃໝ່ສີທັນດອນ: ມີເນື້ອທີ່ດິນທີ່ໄດ້ຮັບອະນຸຍາດຈາກລັດ ຖະບານຕາມສັນຍາ 9,846 ເຮັກຕາ ຄື: ເບື້ອງຝັ່ງເຂດ A,B,C,D ມີເນື້ອທີ່ 7,075 ເຮັກຕາ, ກວມເອົາຂອບເຂດບ້ານທ່າຄໍ້ , ບ້ານທ່າມ່ວງ, ບ້ານບຶງງາມ,ບ້ານເສັດເຕົາເຫຼັກ,ບ້ານເສັດສະຫວັນ ແລະ ບ້ານນາໜອງເຫ້ຍ, ມີຄອບຄົວທີ່ຖືກຜົນກະທົບທັງໝົດ 1008 ຄອບຄົວ, ເນື້ອທີ່ຕອນດີນທີ່ຖືກຜົນກະທົບ 1,575 ຕອນ, ເນື້ອທີ່ຖືກຜົນກະທົບທັງໝົດ 2,099 ເຮັກຕາ (ຕາມຜົນການສໍາຫຼວດຂອງບໍລິສັດ ທີ່ປຶກສາ ເອັນວາຍໂປຼ ຈຳກັດ ສະບັບເລກ ທີ 062/EPC, ລົງວັນທີ 8 ກັນຍາ 2023).
