ປະຊາຊົນ 15 ຄອບຄົວພາຍໃນ 3 ບ້ານຂອງເມືອງໂຂງ, ແຂວງຈໍາປາສັກ ທີ່ໄດ້ຮັບຜົນກະທົບຈາກໂຄງການພັດທະນາເຂດເສດຖະກິດໃໝ່ສີທັນດອນ ເຊິ່ງປະກອບມີ ບ້ານ ບຶງງາມ, ທ່າຄໍ້ ແລະ ບ້ານເສັດເຕົາເຫຼັກ ໄດ້ຮັບການຊົດເຊີຍ ລວມມີຄ່າ 1,131,158,000 ກີບ.
ພິທີມອບ-ຮັບການຊົດເຊີຍດັ່ງກ່າວ, ຈັດຂຶ້ນໃນຕອນບ່າຍວັນທີ 20 ສິງຫາ 2024 ທີ່ໂຮງແຮມ ມ່ວນມ່ວນ ບູຕິກ ທີ່ຕັ້ງຢູ່ພາຍໃນໂຄງການພັດທະນາເຂດເສດຖະກິດໃໝ່ສີທັນດອນ ໂດຍການມອບຂອງ ທ່ານ ຈາງສີ (Zhang Qi) ຜູ້ອໍານວຍບໍລິສັດ ຮ່ວມພັດທະນາ ສີທັນດອນ ຈໍາກັດ. ໂດຍມີ ທ່ານ ສົມບູນ ເຮືອງວົງສາ, ຮອງເຈົ້າແຂວງຈໍາປາສັກ, ທ່ານ ນາງ ຄໍາພູ ລິດທິສັກ, ເຈົ້າເມືອງໆ ໂຂງ, ພ້ອມດ້ວຍຕາງໜ້າຈາກອົງການຈັດຕັ້ງທີ່ກ່ຽວຂ້ອງຂອງແຂວງ ແລະ ປະຊາຊົນພາຍໃນ 3 ບ້ານເຂົ້າຮ່ວມ.
ໃນໂອກາດມີຄໍາເຫັນໃນພິທີຄັ້ງນີ້ ທ່ານ ສົມບູນ ເຮືອງວົງສາ ໃຫ້ຮູ້ວ່າ: ການຮັບເອົາເງິນຊົດເຊີຍໃນຄັ້ງນີ້ ແມ່ນຄວາມຄວາມ ສະໝັກໃຈ ແລະ ເຕັມໃຈຂອງປະຊາຊົນຈໍານວນ 15 ຄອບຄົວພາຍໃນ 3 ບ້ານ ບົນພື້ນຖານການຄິດໄລ່ລຽງຢ່າງລະອຽດຈາກຄະນະກໍາມະການທີ່ກ່ຽວຂ້ອງ ເຊິ່ງປະກອບມີຕາງໜ້າຈາກແຂວງ, ເມືອງ ແລະ ທາງໂຄງການ ທີ່ໄດ້ຮັບຮອງໃນໄລຍະຜ່ານມາ, ເຊິ່ງທ່ານໄດ້ສະແດງຄວາມຂອບໃຈ ແລະ ຊົມເຊີຍຕໍ່ປະຊາຊົນດັ່ງກ່າວທີ່ໃຫ້ການຮ່ວມມືກັບອົງການປົກຄອງແຂວງ ແລະ ໂຄງການດັ່ງ ກ່າວ ເພື່ອເຮັດໃຫ້ໂຄງການສາມາດດໍາເນີນໄປໄດ້ຢ່າງສະດວກ ແລະ ປະສົບຜົນສໍາເລັດຕາມທີ່ຄາດໝາຍໄວ້.
ສໍາລັບໂຄງການ ເຂດພັດທະນາເສດຖະກິດໃໝ່ ສີທັນດອນ, ມາຮອດປັດຈຸບັນ ບໍລິສັດຜູ້ພັດທະນາໄດ້ຊົດເຊີຍລ່ວງໜ້າໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການເພື່ອເຂົ້າໄປພັດທະນາກ່ອນ ມີທັງໝົດ 10 ຈຸດ, ກວມເອົາເນື້ອທີ່ 596,56 ເຮັກຕາ, ມູນຄ່າ 72,629,255,673 ກີບ ແລະ 5,755,751 ໂດລາສະຫະລັດ ຄື:
– ໂຄງການສະໜາມກ໋ອບ ບ້ານທ່າມ່ວງ ຈຳນວນ 50 ຄອບຄົວ ລວມເນື້ອທີ່ດິນ ຈຳນວນ 133.8 ເຮັກຕາ ເປັນເງິນ 17,671,152,500 ກີບ.
-ໂຄງການ ອຸດສາຫະກຳລ້ຽງປາຄົບວົງຈອນ ບ້ານບຶງງາມ ຈຳນວນ 15 ຄອບຄົວ ລວມເນື້ອທີ່ດິນ ຈຳນວນ 44.41 ເຮັກຕາ ເປັນເງິນ 2,698,271,800 ກີບ.
– ໂຄງການກໍ່ສ້າງຕຶກແຄນຄູ່ ບ້ານທ່າຄໍ້ ຈຳນວນ 43 ຄອບບຄົວ ລວມເນື້ອທີ່ດິນຈຳນວນ 188.9 ເຮັກຕາ ເປັນເງິນ 28,211,926,750 ກີບ.
– ໂຄງການສາງສິນຄ້າ ບ້ານບຶງງາມ ຈຳນວນ 06 ຄອບຄົວ ລວມເນື້ອທີ່ດິນ ຈຳນວນ 10.7 ເຮັກຕາ ເປັນເງິນ 2,102,640,300 ກີບ.
-ຊົດເຊີຍທີ່ດິນປະຊາຊົນທີ່ນອນໃນໂຄງການແຫຼ່ງທ່ອງທ່ຽວຄອນພະເພັງ ບ້ານທ່າຄໍ້ ຈຳນວນ 06 ຄອບຄົບ ລວມເນື້ອທີ່ດິນ ຈຳນວນ 14.6 ເຮັກຕາ ເປັນເງິນ 2,375,809,425 ກີບ.
– ຄ່າຍົກຍ້າຍຮ້ານຄ້າເກົ່າໃນແຫຼ່ງທ່ອງທ່ຽວນຳ້ຕົກຕາດຄອນພະເພັງ ຈຳນວນ 24 ຮ້ານ ລວມເປັນເງິນ 388,905,839 ກີບ.
– ຊົດເຊີຍຄືນໃຫ້ກັບບໍລິສັດ ຍິ່ງໂຊກໄຊ ໂດຍຜ່ານຫ້ອງວ່າການແຂວງຈຳປາສັກ ສຳລັບແຫຼ່ງທ່ອງທ່ຽວຄອນພະເພັງ ແລະ ສົມພະມິດ ຈຳນວນ 18,049,391,059 ກີບ.
– ມອບເງິນຊົດເຊີຍໃຫ້ ບໍລິສັດອຸດົມສິນ ບ້ານທ່າມ່ວງ ໂດຍຜ່ານຫ້ອງວ່າການແຂວງຈຳປາສັກ ໃນເນື້ອທີ່ດິນ ຈຳນວນ 126 ເຮັກຕາ ເປັນເງິນ 255,751 ໂດລາສະຫະລັດ.
– ຊົດເຊີຍລີສອດນາແປງໃຫ້ບໍລິສັດຍິ່ງໂຊກໄຊ ໂດຍຜ່ານຫ້ອງວ່າການແຂວງຈຳປາສັັກ ໃນເນື້ອທີ່ດິນ ຈຳນວນ 65 ເຮັກຕາ ກັບ 4,623 ຕາແມັດ ເປັນເງິນ 5,500,000 ໂດລາສະຫະລັດ.
– ຍັງມີໂຄງການບ້ານຈັດສັນ (ນອກເຂດ) ຈຳນວນ 10 ຄອບບຄົວ ລວມເນື້ອທີ່ດິນຈຳນວນ 12.58 ເຮັກຕາ ເປັນເງິນ 1,131,158,000 ກີບ.
