ລະຫວ່າງ ວັນທີ 19-21 ສິງຫາ 2024 ທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງຊາດລາວ ພ້ອມດ້ວຍຄະນະ ໄດ້ສົມທົບກັບອົງການກາແດງແຂວງຫຼວງພະບາງ ລົງພົບປະອຳນາດການປົກຄອງ ແລະ ພໍ່ແມ່ປະຊາຊົນ ພ້ອມໃຫ້ການຊ່ວຍເຫຼືອປະຊາຊົນທີ່ຖືກຜົນກະທົບຈາກໄພນໍ້າຖ້ວມຢູ່ 13 ບ້ານ 2 ເມືອງ ຂອງແຂວງຫຼວງພະບາງຄື: ເມືອງວຽງຄໍາ ແລະ ເມືອງປາກແຊງ.
ການຊ່ວຍເຫຼືອໃນຄັ້ງນີ້ ເຊິ່ງເປັນການຊ່ວຍເຫຼືອໃນຮູບແບບແຈກຢາຍເງິນສົດ ໃຫ້ກັບພໍ່ແມ່ປະຊາຊົນ ຜູ້ໄດ້ຮັບຜົນກະທົບໂດຍກົງ ເຊິ່ງເປັນການຊ່ວຍເຫຼືອທີ່ມີປະສິດທິພາບ ແລະ ຖືກຕ້ອງຕາມຄວາມຕ້ອງການຂອງພໍ່ແມ່ປະຊາຊົນ ທີ່ຖືກຜົນກະທົບ ຈຳນວນ 511 ຄອບຄົວ ເຊິ່ງເຂົາຈະສາມາດນຳເອົາເງິນທີ່ໄດ້ຮັບໄປໃຊ້ຈ່າຍສິ່ງທີ່ຈຳເປັນພາຍໃນຄອບຄົວ ແກ້ໄຂໃນຍາມສຸກເສີນ ການຊ່ວຍເຫຼືອຮູບແບບນີ້ ໄດ້ແບ່ງອອກເປັນ 2 ລະດັບຄອບຄົວທີ່ມີຈຳນວນຄົນແຕ່ 1-4 ຄົນ ຈະໄດ້ຮັບເງິນຄອບຄົວລະ 1.000.000 ກີບ ຄອບຄົວທີ່ມີຈຳນວນຄົນແຕ່ 5 ຄົນ ຂຶ້ນໄປຈະໄດ້ຮັບເງິນຈຳນວນ 1.500.000 ກີບ ລວມມູນຄ່າການຊ່ວຍເຫຼືອທັງໝົດ 659.000.000 ກີບ ເຊິ່ງໄດ້ຮັບການສະໜັບສະໜູນງົບປະມານຈາກອົງການກາແດງສະວິດ ປະຈຳ ສປປ ລາວ.
ທີ່ມາ: ວຽງຈັນໃໝ່
